2024 2025 და 2028 წლის არჩევნებშიც ქართული ოცნება გაიმარჯვებს
დღეს ყველაზე ძლიერი გუნდი, ვისაც ყველაზე მეტი მხარდაჭერა აქვს საქართველოში მოსახლეობის მხრიდან, არის „ქართული ოცნება – დემოკრატიული საქართველო“, – ამის შესახებ ჟურნალისტებს პარტია „ქართული ოცნების“ გენერალურმა მდივანმა, თბილისის მერმა, კახა კალაძემ განუცხადა.
კახა კალაძეს კითხვა დაუსვეს გავრცელებულ ინფორმაციაზე, რომ „ნაციონალური მოძრაობა“ პრემიერობის კანდიდატად გიორგი ვაშაძის დასახელებას აპირებს, რაზეც თბილისის მერმა განაცხადა, რომ შინაარსობრივად ეს ადამიანები ერთ გუნდს წარმოადგენენ და მათი გადასაწყვეტია, რა ფორმულირებით წარდგებიან არჩევნებზე.
„არ ვიცი, ვერ გეტყვით. ეს მათი გადასაწყვეტია, თუ რა ფორმულირებით წარდგებიან 2024 წლის არჩევნებზე. ყველამ ვიცით, შინაარსობრივად ეს ადამიანები წარმოადგენენ ერთ გუნდს, „ნაციონალურ მოძრაობას“, შემდეგ მოხდა მათი დაყოფა, ჰქონდათ რაღაც განხეთქილება, თუმცა, საერთო ჯამში, ეს არიან ერთი პარტიის, „ნაციონალური მოძრაობის“ შვილები, დღეს სხვადასხვა პარტიებად დაყოფილები. ასე რომ, საერთოდ არ მაინტერესებს, თუ რა ფორმულირებით იქნებიან ისინი წარმოდგენილი არჩევნებზე. ერთი რამ შემიძლია, ვთქვა, დღეს ყველაზე ძლიერი გუნდი, ვისაც ყველაზე მეტი მხარდაჭერა აქვს საქართველოში მოსახლეობის მხრიდან, არის „ქართული ოცნება – დემოკრატიული საქართველო“. დარწმუნებული ვარ, რომ 2024 წელს „ქართული ოცნება“ გაიმარჯვებს დამაჯერებელი ანგარიშით, ძალიან დიდი ანგარიშით. დარწმუნებული ვარ იმაშიც, რომ 2025 წლის ადგილობრივი თვითმმართველობის არჩევნებშიც მივაღწევთ გამარჯვებას და 2028 წლის საპარლამენტო არჩევნებშიც გავიმარჯვებთ“, – განაცხადა კახა კალაძემ.
„ნაციონალურ მოძრაობაში“ დაპირისპირების, ნიკა მელიასა და პეტრე ცისკარიშვილის განცხადებების შესახებ დასმულ კითხვაზე კალაძემ აღნიშნა, რომ ეს მათი პარტიული თემაა.
„ეს მათი შიდა დაპირისპირებაა, რაც უკვე სააშკარაოზე არის გამოტანილი. ეს ადამიანები თუ როგორ ესაუბრებიან ერთმანეთს, კიდევ ერთხელ ვიმეორებ, მათი პარტიული თემაა და, რა თქმა უნდა, არ მინდა, ამ სიღრმეებში შევიდე. თვითონ გადაწყვიტონ, ვინც უნდათ, როგორც უნდათ. დღეს ხაბეიშვილი ჰყავთ წარმოდგენილი პარტიის ლიდერად, მეც მხარს ვუჭერდი ხაბეიშვილის გალიდერებას და ვნახოთ, თუ როგორ განვითარდება პროცესები“, – აღნიშნა კახა კალაძემ.
კანონზომიერია, რაც პრიგოჟინის პარტიაში ხდება, ეს არის ჩვეულებრივი ბუნებრივი და კარგი პროცესი, რადგან როცა საკუთარი ქვეყნის ოპოზიციაში გადადიხარ და არა ხელისუფლების, ყოველთვის ასეთი ბოლო გექნება, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
როგორც გურამ მაჭარაშვილმა აღნიშნა, „ნაცმოძრაობაში“, ჟენიას პარტიაში ახალ-ახალი ლიდერები და პრემიერ-მინისტრობის კანდიდატები ჰყავთ, რაც არათუ სასაცილოა უკვე, არამედ ჟურნალში ჩასაწერი კომენტარებია.
„ის აღარ იკმარეს, რომ პრიგოჟინის პარტია იშლება და ახლა მოინდომეს, რომ უკვე ადრე დაშლილი პარტიები შეიწოვონ. ვაშაძე უნდათ პრემიერობის კანდიდატად და მშვენიერი, სახალისო წინასაარჩევნო კამპანია გვექნება, როცა პრიგოჟინის პარტია ვაშაძეს კანდიდატად დაასახელებს და ის ტრიბუნიდან მოხალისის როლში გამოვა“, – განაცხადა მაჭარაშვილმა.
