79 ხმით არცერთის წინააღმდეგ-ანრი ოხანაშვილი 6 წლის ვადით სუსს უხელმძღვანელებს
სადავო პარლამენტის სხდომაზე, განხილვის გარეშე უყარეს კენჭი და 79 ხმით არცერთის წინააღმდეგ სახელმწიფო უსაფრთხოების სამსახურის უფროსად, 6 წლის ვადით, დაამტკიცეს ანრი ოხანაშვილის კანდიდატურა.
იუსტიციის ყოფილი მინისტრის კანდიდატურა სუსის ხელმძღვანელის პოსტზე დასანიშნად “ქართული ოცნების” დეპუტატებს ირაკლი კობახიძემ წარუდგინა. ოხანაშვილმა თანამდებობაზე გრიგოლ ლილუაშვილი შეცვალა.
ანრი ოხანაშვილს აქვს მრავალმხრივი, მრავალფეროვანი გამოცდილება და არის უაღრესად კეთილსინდისიერი ადამიანი, ეს კრიტერიუმი განსაკუთრებით მნიშვნელოვანია სახელმწიფო უსაფრთხოების სამსახურში, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.
პრემიერმა სახელმწიფო უსაფრთხოების სამსახურის ახალ ხელმძღვანელს შემდეგი ექვსი წლის განმავლობაში წარმატებები უსურვა.
„ყოველთვის არის ორი ძირითადი კრიტერიუმი, ეს არის კომპეტენცია და კეთილსინდისიერება. ამ ორივე კუთხით ანრი ოხანაშვილი აბსოლუტურად გამორჩეულია. ის არის ძალიან კომპეტენტური, აქვს დიდი გამოცდილება, მრავალმხრივი და მრავალფეროვანი გამოცდილება და უაღრესად კეთილსინდისიერი ადამიანია. ეს კრიტერიუმი განსაკუთრებით მნიშვნელოვანია სახელმწიფო უსაფრთხოების სამსახურში. ანრი ოხანაშვილი ამ თანამდებობისთვის, სახელმწიფო უსაფრთხოების სამსახურისთვის ხელმძღვანელობისთვის არა მარტო ძალიან კარგი კანდიდატია, არამედ ის არის ყველაზე მეტად შესატყვისი ამ თანამდებობისთვის, გამომდინარე მისი გამორჩეული კომპეტენციიდან და გამორჩეული კეთილსინდისიერებიდან. მინდა, მას წარმატებები ვუსურვო შემდეგი ექვსი წლის განმავლობაში“, – განაცხადა პრემიერმა.
სადაო პარლამენტის თავმჯდომარე შალვა პაპუაშვილმა ანრი ოხანაშვილს წარმატებები უსურვა “გამოწვევებით სავსე და ხანდახან შეშლილ სამყაროში” და თქვა, რომ სუსის დამსახურებაა ის, რომ “უსაფრთხოების არცერთი რისკი, რომელიც რეალური იყო, არ განხორციელდა არც გარე ჩარევით, არც შიდა არეულობით”.
“ბატონ ანრის, საქართველოს პარლამენტის გამორჩეულ წევრს, იქამდე კი იუსტიციის გამორჩეულ მინისტრს მინდა წარმატება ვუსურვო დღევანდელ გამოწვევებით სავსე, ხანდახან კი შეშლილ სამყაროში. განსაკუთრებული პასუხისმგებლობა აკისრია თქვენს უწყებას, პირადად თქვენ და თქვენს თანამშრომლებს. მინდა ვისარგებლო შემთხვევით და სახელმწიფო უსაფრთხოების სამსახურის თითოეულ თანამშრომელს მადლობა გადავუხადო მათი საქმიანობისთვის. მ გამოწვევებით სავსე რეგიონში იმ კონფლიქტების შემყურე, რაც ჩვენს გარშემო ტრიალებს, სწორედ თქვენი სამსახურის თანამშრომლების დამსახურება არის, რომ უსაფრთხოების არცერთი რისკი, რაც რეალური იყო, არ განხორციელდა არც გარე ჩარევით და არც შიდა არეულობით. დღეიდან კი უკვე თქვენ იქნებით პასუხისმგებელი პირი ამ საკითხებზე. გისურვებთ წარმატებას. თქვენი პატრიოტიზმი და პროფესიონალიზმი ჩვენ ეჭვის ნატამალსაც არ გვიტოვებს, რომ შეძლებთ სრულად გაართვათ ამ დიდ პასუხისმგებლობას თავი“, – განაცხადა შალვა პაპუაშვილმა.
კენჭისყრამდე კი ოხანაშვილს თავდაცვისა და უშიშროების კომიტეტის წევრებმა მოუსმინეს.
მან განსაკუთრებული მადლობა გადაუხადა ირაკლი კობახიძეს და სამთავრობო გუნდს ნდობისთვის.
მისი თქმით, “სახელმწიფო უსაფრთხოების სამსახურის ეფექტიანმა საქმიანობამ უზრუნველყო ჩვენს ქვეყანაში უსაფრთხო და მშვიდობიანი გარემოს შენარჩუნება”.
გამოწვევებს შორის მან დაასახელა რეგიონში შექმნილი უსაფრთხოების გარემო, რომელიც უკრაინაში მიმდინარე ომს უკავშირდება, და რუსეთის მიერ საქართველოს ორი რეგიონის ოკუპაცია. ასევე – სხვადასხვა პოლიტიკური ძალის მიერ საქართველოში ვითარების გამწვავების მცდელობა და „ხელისუფლების ძალადობრივი გზით შეცვლისთვის ნიადაგის მომზადება, რესურსების მობილიზება“.
„გამოიკვეთა უცხო ქვეყნების სპეციალურ სამსახურებთან დაკავშირებულ პირთა მცდელობები საქართველოში მოქმედ მედიასაშუალებებსა და ცალკეულ ჯგუფებთან ურთიერთობის ჩამოყალიბებისა და მათი გამოყენების მიმართულებით“.
“მოხერხდა საქართველოს საზიანო ღონისძიების განეიტრალება”, – თქვა ოხანაშვილმა.
მან შს მინისტრს, ვახტანგ გომელაურს, განსაკუთრებული მადლობა გადაუხადა სახელმწიფო უსაფრთხოების სამსახურთან მჭიდრო თანამშრომლობისა და კოორდინაციისთვის.
ანრი ოხანაშვილმა ისაუბრა ჰიბრიდულ საფრთხეებზეც. მაგალითად კი დაასახელა „სხვადასხვა უცხოური ძალისა და მათთან დაკავშირებული კერძო პირების მიერ საინფორმაციო ომის ფარგლებში წარმოებული კამპანიის შედეგად ევროკავშირში საქართველოს ინტეგრაციის პროცესის შეფერხებისა და ჩვენს პარტნიორებთან ურთიერთობების დაზიანების მცდელობები“.
„ქართული ოცნების“ გადაწყვეტილებას, დღის წესრიგიდან ოთხი წლით ამოეღო ევროკავშირში გაწევრიანების მოლაპარაკებების საკითხი, მწვავე რეაქციები მოჰყვა როგორც საქართველოში, ასევე ქვეყნის ფარგლებს გარეთ.
„დღეს მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი“; „2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან“, – განაცხადა ირაკლი კობახიძემ პარტიის ოფისში, 28 ნოემბერს პოლიტსაბჭოს სხდომის შემდეგ გამართულ საგანგებო ბრიფინგზე.
ოხანაშვილს თქმით, მონიტორინგს აწარმოებენ, მათ შორის “საინფორმაციო კამპანიის დაფინანსების წყაროების გამოსავლენად”.
“სუსი აქტიურად იმუშავებს კონტრტერორისტული მიმართულებით, ტერორისტული საფრთხეების წინააღმდეგ ღონისძიების გატარებით”, “სამსახური გააგრძელებს ასევე კორუფციასთან ბრძოლას აქტიურად”, – თქვა ანრი ოხანაშვილმა.
კითხვა-პასუხის ეტაპზე სხდომა დაიხურა. რის შემდეგად კომიტეტმა მხარი დაუჭირა ანრი ოხანაშვილი კანდიდატურისთვის განხილვის გარეშე კენჭისყრას.
თავდაცვისა და უშიშროების კომიტეტის თავმჯდომარის პირველმა მოადგილემ თენგიზ შარმანაშვილმა კენჭისყრის შემდეგ ანრი ოხანაშვილს მიმართა, რომ “ორიოდ თბილი სიტყვის გარეშე” ვერ გაუშვებდა, ვინაიდან “ჩვენი წიაღიდან წამოსული ბრძანდებით”.
“ბატონმა ანრი ოხანაშვილმა წლების განმავლობაში აჩვენა, რომ მას შეუძლია დიდი სახელმწიფოებრივი ამოცანებისთვის თავის გართმევა. მრავალჯერ შეეჭიდა ის დიდ სახელმწიფოებრივ ამოცანებს და ეს ჩვენს თვალწინ ხდებოდა. როგორ და რა ორგანიზაციული სიძლიერით აკეთებდა ამას, ამის მოყოლა სხვებისგან ჩვენ არ გვინდა – ეს ჩვენი თვალით გვაქვს ნანახი და ჩვენმა მოსახლეობამაც იცის. ამიტომ დარწმუნებული ვართ, რომ ამ დიდ სახელმწიფოებრივ ამოცანასაც ბატონი ანრი ფრიად და მაღალ დონეზე გაართმევს თავს. უფალს ვთხოვ, იყოს თქვენი შემწე და ჩვენი თანადგომის იმედი კი ყოველთვის გექნებათ“, – თქვა თენგიზ შარმანაშვილმა. სუსის ახალი ხელმძღვანელი ანრი ოხანაშვილი მანამდე იუსტიციის მინისტრად მუშაობდა, იყო “ქართული ოცნების” დეპუტატი მე-9 და მე-10 მოწვევის პარლამენტებში. მე-10 მოწვევის პარლამენტში ის იურიდიულ საკითხთა კომიტეტს ხელმძღვანელობდა.
მსურს, განსაკუთრებული მადლობა გადავუხადო საქართველოს პრემიერ-მინისტრსა და სამთავრობო გუნდს გამოცხადებული დიდი ნდობისთვის. ვაცნობიერებ იმ დიდ პასუხისმგებლობას, რომელიც დაკავშირებულია სახელმწიფო უსაფრთხოების სამსახურის საქმიანობასთან, – ამის შესახებ სახელმწიფო უსაფრთხოების სამსახურის ხელმძღვანელობის კანდიდატმა, ანრი ოხანაშვილმა პარლამენტის თავდაცვისა და უშიშროების კომიტეტის სხდომაზე განაცხადა.
ოხანაშვილმა სახელმწიფო უსაფრთხოების სამსახურის ყოფილ უფროსს, გრიგოლ ლილუაშვილსა და ამავე სამსახურის თანამშრომლებს მადლობა გადაუხადა.
„ჩემთვის ეს არის განსაკუთრებული, გამორჩეული პატივი და დიდი პასუხისმგებლობა. ვაცნობიერებ იმ დიდ პასუხისმგებლობას, რომელიც დაკავშირებულია სახელმწიფო უსაფრთხოების სამსახურის საქმიანობასთან, ამ სამსახურის ხელმძღვანელის პოზიციასთან და ამ პოზიციიდან ჩვენი სამშობლოს ეროვნული ინტერესების დაცვასთან. მსურს, მადლობა გადავუხადო გრიგოლ ლილუაშვილს, რომელმაც გამოწვევებით სავსე პერიოდში საქართველოს სახელმწიფო უსაფრთხოების სამსახურის ეფექტიანი, გამართული ფუნქციონირება უზრუნველყო. მადლობა საქართველოს სახელმწიფო უსაფრთხოების სამსახურის ყველა იმ თანამშრომელს, რომელმაც დაუღალავი შრომით, ჩვენი სახელმწიფოსთვის საფრთხეების თავიდან აცილებაში წვლილი შეიტანა“, – განაცხადა ანრი ოხანაშვილმა.
ცნობისთვის, 2 აპრილს, ირაკლი კობახიძემ საკადრო გადაწყვეტილებების თაობაზე გააკეთა განცხადება, რითაც ცნობილი გახდა, რომ გრიგოლ ლილუაშვილმა სახელმწიფო უსაფრთხოების სამსახურის ხელმძღვანელის თანამდებობა დატოვა. სუს-ის უფროსის პოსტზე კი, კობახიძემ ანრი ოხანაშვილი წარადგინა.
ოხანაშვილი იუსტიციის მინისტრის თანამდებობაზე „ქართული ოცნების“ დეპუტატმა, პაატა სალიამ შეცვალა.
რაც შეეხება გრიგოლ ლილუაშვილს, როგორც კობახიძის ბრიფინგზე გახდა ცნობილი, ინფრასტრუქტურისა და რეგიონული განვითარების სამინისტრო გაიყოფა, რის შემდეგაც ლილუაშვილი რეგიონული განვითარების მინისტრის თანამდებობას დაიკავებს.
ლილუაშვილი სახელმწიფო უსაფრთხოების სამსახურის ხელმძღვანელად პარლამენტმა 2019 წლის ოქტომბერში დაამტკიცა.
