ბიზნესრევიუმნიშვნელოვანი

ფინკა ბანკი – არსებულ გამოწვევებს სწორი ფინანსური გადაწყვეტილებები სჭირდება

“ფინკა ბანკი” სპეციალურ განცხადებას ავრცელებს, რომელსაც რადიო ჰერეთი სრულად გთავაზობთ:

ფინკა ბანკმა სპეციალური საშეღავათო პირობები იმ მომხმარებლებს შესთავაზა, რომელთა შემოსავლებსა და საქმიანობაზეც ქვეყანაში შექმნილმა მდგომარეობამ უარყოფითად იმოქმედა. ამის შესახებ ბანკმა განცხადება 19 მარტს გააკეთა.

გვინდა აღვნიშნოთ, რომ ფინკა ბანკი მომხმარებლებს  შეღავათებს მსგავს სიტუაციებში ყოველთვის სთავაზობს. კორონავირუსის გავრცელებამდეც იყო შემთხვევები, როდესაც მსესხებელს ექმნებოდა გადახდისუნარიანობის პრობლემა და ბანკი მას შესაბამის გამოსავალს ინდივიდუალურად სთავაზობდა.

მნიშვნელოვანია ის ფაქტორი, რომ სესხის გადავადება ხშირად აღიქმება, როგორც გადავადების პერიოდში პროცენტის დარიცხვის შეჩერება, სესხის „პატიება“ და ა.შ. აღსანიშნავია, რომ გადავადების შედეგად ბანკებს მნიშვნელოვნად უმცირდებათ ფულადი სახსრების შემოდინება, მაგრამ, მეორეს მხრივ, უმნიშვნელოდ ან საერთოდ არ მცირდება საოპერაციო ხარჯები. როგორც მსესხებლებს აქვთ ბანკების წინაშე ვალდებულებები, ასევე ბანკებსაც გააჩნიათ გარკვეული ფინანსური ვალდებულებები თანამშრომლების, დეპოზიტარების, აქციონერების, საერთაშორისო ორგანიზაციების მიმართ და მათდამი ფინანსური ვალდებულებების შესრულება გრძელდება. ბევრი გარემოებაა, რაც განსაკუთრებულ სიფრთხილესა და სწორ ფინანსურ გადაწყვეტილებებს საჭიროებს, რათა კრიზისით გამოწვეული ზარალი ნაკლებ მტკივნეული იყოს როგორც მომხმარებლებისთვის, ასევე მთელი სექტორისათვის.

ფინკა ბანკმა მომხმარებლებს, რომელთა საქმიანობაც შექმნილმა სიტუაციამ დააზარალა, სამთვიანი საშეღავათო პერიოდი შესთავაზა. რატომ 3 თვე და არა მეტით, ან ნაკლები პერიოდით გადავადება? ფინკა ბანკში ინდივიდუალური მიდგომა გვაქვს-თუ ამისი ობიექტური გარემოება და საჭიროებაა, სესხებს ზოგიერთ შემთხვევაში, უფრო ნაკლები ან მეტი დროითაც გადავავადებთ.  ბანკის მიდგომა ერთია – დღეს მიღებული სწორი გადაწყვეტილებები, რაც ერთი შეხედვით შეიძლება არ იყოს პოპულარული, გრძელვადიან პერსპექტივაში დადებითი გავლენას მოახდენს მომხმარებელთა ფინანსურ კეთილდღეობასა და მთლიანად სექტორის სტაბილურად განვითარებაზე.

19 მარტიდან 25 მარტამდე 9000-მდე განაცხადი მივიღეთ. თითოეული განაცხადი ძალიან მოკლე დროში ინდივიდუალურად განვიხილეთ, რაც საკმაოდ დიდ რესურსებთან იყო დაკავშირებული. დაწყებულია მომხმარებლებისათვის პასუხის გაცნობა, რაც ასევე არ არის მარტივი, ვინაიდან მომხმარებელი  ყოველთვის სასურველ პასუხს ვერ მიიღებს – ისევ და ისევ განვმარტავთ, რომ ბანკი მაქსიმალურად ითვალისწინებს საგანგებო მდგომარეობის რეალურ გავლენას მომხმარებელთა გადახდისუნარიანობაზე და თითოეული მომხმარებლის სესხზე ამის მიხედვით იღებს გადაწყვეტილებას.

მნიშვნელოვანია აღვნიშნოთ, რომ პასუხისმგებლიანი დაკრედიტების პოლიტიკის მაღალ დონეზე შესრულებისა და დაზოგვის კულტურის ამაღლებაზე გაწეული მთელი რიგი აქტივობების შედეგია ის, რომ დღეს ფინკა ბანკის მომხმარებლების საკმაოდ დიდი ნაწილი მიუხედავად შექმნილი ვითარებისა, კვლავ გადახდისუნარიანია (დიდ ნაწილს შერეული შემოსავლები აქვს, აქვთ დანაზოგიც).

კიდევ ერთხელ აღვნიშნავთ, რომ ფინკა ბანკი ყველა ობიექტური გარემოებების გათვალისწინებით იღებს ყველა საჭირო ზომას, რათა უზრუნველვყოთ მომხმარებელთა მხარდაჭერა, მეწარმეთა ბიზნესების მდგრადობა და ბანკის გამართული მუშაობა. დღეს მიღებულ სწორ გადაწყვეტილებებზე და მათ ეფექტურად აღსრულებაზეა დამოკიდებული ის, თუ როგორ გადავლახავთ არსებულ კრიზისს. ყველაფერს გავაკეთებთ იმისათვის, რომ ჩვენი საერთაშორისო გამოცდილების საუკეთესო პრაქტიკა გამოვიყენოთ.

მსგავსი პოსტები

Back to top button