Hereti FM - ჩვენ ვსაუბრობთ თქვენს ენაზე

შსს ცესკოსთან მიმდინარე აქციაზე, განცხადებას ავრცელებს

104

შინაგან საქმეთა სამინისტრო ცესკოს მიმდებარედ აქციის დაშლის საკითხთან დაკავშირებით სპეციალურ განცხადებას აქვეყნებს. უწყების განცხადებით, ისინი მომიტინგეების წინააღმდეგ პროპორციულ ძალას იყენებენ.

“საქართველოს შინაგან საქმეთა სამინისტრო წარმოადგენს საზოგადოების უსაფრთხოებასა და მართლწესრიგის დაცვაზე პასუხისმგებელ უწყებას. სამინისტრო მთელი დღის განმავლობაში, აქციაზე უზრუნველყოფდა, როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ გასცდა კანონით დასაშვებ ფარგლებს.

დღის ბოლოს, ცენტრალურ საარჩევნო კომისიასთან მიმდინარე აქციის დროს, აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში, რაც კადრებშიც კარგად ჩანს და რისი საშუალებაც მათ პოლიციამ არ მისცა.

ვინაიდან აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ მისთვის კანონით მინიჭებული უფლებამოსილების ფარგლებში გამოიყენა პროპორციული ძალა.

შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, აქციის ორგანიზატორებსა და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. აქციის მიმდინარეობისას, სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი,”- ნათქვამია განცხადებაში.

შეგახსენებთ, რომ ცესკოსთან მიმდინარე აქციაზე, მომიტინგეების მისვლისთანავე, წყლის ჭავლის გამოყენება დაიწყო, მოგვიანებით კი გამოყენებულ იქნა ცრემლსადენი გაზიც.

ფეისბუქ კომენტარები
რადიო ჰერეთი