Hereti FM - ჩვენ ვსაუბრობთ თქვენს ენაზე

ვახო სანაიაზე თავდამსხმელები სასამართლომ პატიმრობაში დატოვა

72

თბილისის საქალაქო სასამართლომ პატიმრობაში დატოვა სამივე ბრალდებული, რომელსაც გამოძიება ტელეკომპანია”ფორმულას” ჟურნალისტ ვახო სანაიაზე ჯგუფურ თავდასხმას ედავება.

მოსამართლემ მიიჩნია, რომ არსებობდა დანაშაულის ჩადენის განმეორების მაღალი რისკი.

მოსამართლემ არ დააკმაყოფილა “აი იას” შეგროვებული ხელწერილები, რომლითაც მომღერალი გია გაჩეჩილაძე (“უცნობი”) და თბილისის საკრებულოს წევრი, ვატო შაქარიშვილი დაკავებულების თავდებობით გათავისუფლებას ითხოვდნენ.

“როცა ვაყენებთ პირად თავდებობას, მნიშვნელოვანია, პირები, რომლებიც თავდებობის პასუხისმგებლობას იღებენ, უშუალო და ახლო ურთიერთობაში უნდა იყვნენ ბრალდებულებთან. ვერც ერთმა პირმა სასამართლოს ვერ დაუსაბუთა, რა კონკრეტული მექანიზმებით აპირებს ბრალდებულთა სათანადო ქცევის უზრუნველყოფას”, – განაცხადა მოსამართლემ.

სასამართლოსთან მისული იყო გია გაჩეჩილაძეც და ვატო შაქარშვილიც. გაჩეჩილაძემ თქვა, რომ “ქვეყანაში კანონი არის ტელევიზა” და “იმას გახდიან კანონს, რაც ტელევიზიებს უნდათ”.

“ისეთი ადამიანები ხდებიან პოლიტპატიმრები, რომლის მოღვაწეობაც მთელმა საქართველომ იცის და ისეთი ადამიანები რჩებიან ციხეში, რომლის კეთილშობილობაც მთელმა ქალაქმა იცის”, – თქვა გაჩეჩილაძემ სასამართლოს გადაწყვეტილების გაგების შემდეგ.

ვახო სანაიას თქმით, 24 თებერვალს ღამით თავდამსხმელები მცირეწლოვანი შვილის თვალწინ ფიზიკურად მაშინ გაუსწორდნენ, როდესაც მას მანქანა ავარიული სიტუაციიდან ამოჰყავდა. 

ტელეწამყვანმა ტვინის შერყევა მიიღო.

შსს-მ ჯგუფურად ძალადობის ბრალდებით 3 ადამიანი დააკავა. მათ აღკვეთის ღონისძიებად პატიმრობა შეუფარდეს.

ჟურნალისტზე თავდასხმა დაგმეს არასამთავრობო და მედიაორგანიზაციებმა, ოპოზიციურმა პარტიებმა და ხელისუფლებამ, აშშ-ის საელჩომ. ჟურნალისტმა მასზე თავდასხმა თავისსავე ჟურნალისტურ საქმიანობას დაუკავშირა.

ფეისბუქ კომენტარები
რადიო ჰერეთი