Hereti FM - ჩვენ ვსაუბრობთ თქვენს ენაზე

საქართველოს ქალი მოჭადრაკეები მსოფლიო ჩემპიონატის ლიდერები არიან

21

ესპანეთის ქალაქ სიტჯესში მიმდინარე საერთაშორისო გუნდურ საჭადრაკო ტურნირზე საქართველოს ქალთა ნაკრები წაუგებლად თამაშობს.

წელს ასპარეზობა განსხვავებული ფორმატით დაიგეგმა.12 გუნდი 2 ჯგუფად დაიყო და თითოეული ჯგუფიდან 4 გუნდი ფინალურ, ნოკაუტ-სისტემით პლეი-ოფში ითამაშებს.

ტურნირზე, ჩვენი ნაკრების და მასპინძელი ქვეყნის გუნდების გარდა თამაშობენ: აზერბაიჯანის, გერმანიის, ინდოეთის, ყაზახეთის, პოლონეთის, აშშ-ის, უკრაინის, სომხეთის, რუსეთის და საფრანგეთის ეროვნული საჭადრაკო ნაკრებები.
ჩემპიონატზე საქართველოს ნაკრების ღირსებას იცავენ: ნანა ძაგნიძე, ნინო ბაციაშვილი, ლელა ჯავახიშვილი, მერი არაბიძე და სალომე მელია. ნაკრებს დავით ჯოჯუა კაპიტნობს, გუნდის თავკაცი კი ელიზბარ უბილავაა.

ქართველებმა 4 ტური დაუმარცხებლად გაიარეს და 6 ქულით B ჯგუფის სათავეში იმყოფებიან. მათ 5-5 ქულით ყაზახეთი და უკრაინა მოჰყვებიან.

A ჯგუფის ლიდერი 8 ქულით რუსეთის ნაკრებია, მეორე და მესამე პოზიციას ამ დროისთვის 5-5 ქულით სომხეთი და ინდოეთი ინაწილებენ.

მსოფლიოს გუნდური ჩემპიონატის მეოთხედფინალური შეხვედრები 30 სექტემბერს გაიმართება. 1 ოქტომბერს ნახევარფინალებია, უძლიერესი ნაკრების გამოსავლენი ფინალური მატჩიკი 2 ოქტომბერს ჩატარდება.

ფეისბუქ კომენტარები
რადიო ჰერეთი