მარცვლეულის შეთანხმება ჩიხში შევიდა-ლავროვი
რუსეთის საგარეო საქმეთა მინისტრ სერგეი ლავროვის განცხადებით, ე.წ. მარცვლეულის შეთანხმება ჩიხში შევიდა. ლავროვმა აღნიშნა, რომ კიდევ არსებობს დაბრკოლებები, რომლებიც ბლოკავს რუსული პროდუქციის ექსპორტს.
„ვერ ვიტყვი, რომ გაერო ძალისხმევას იშურებს. არა, პირიქით – გაერო-ს წარმომადგენლები ცდილობენ მოლაპარაკებებს იმ ქვეყნებთან, რომელთაც დააწესეს ცალმხრივი სანქციები რუსეთის ფედერაციის წინააღმდეგ, თუმცა შედეგი პრაქტიკულად არ არის. მთავარი ბანკი, რომელიც ემსახურება ჩვენს სასოფლო-სამეურნეო ექსპორტს, გათიშულია „სვიფტიდან“ და უკან არავინ აბრუნებს. ამის სანაცვლოდ კი გვთავაზობენ ერთჯერად ალტერნატივას. დაზღვევასთან დაკავშირებით პრობლემები კვლავ რჩება, თუმცა გენერალურმა მდივანმა მითხრა, რომ სადაზღვევო კომპანია „ლოიდსთან“ მოლაპარაკებების შემდეგ ტარიფები მნიშვნელოვნად დაეცა“, – განაცხადა ლავროვმა გაერო-ში გამართულ პრესკონფერენციაზე.
მისივე თქმით, რუსეთი არ განიხილავს ჩინეთთან „მარცვლეულის შეთანხმების“ საკითხს, რადგან რუსეთს ჩინეთთან სახმელეთო საზღვარი აქვს, რომლითაც იმპორტი და ექსპორტი ხორციელდება.
ე.წ. მარცვლეულის შეთანხმება გასულ თვეს 60 დღის ვადით განახლდა, თუმცა რუსულმა მხარემ აღნიშნა, რომ, შესაძლოა, შეთანხმების ვადის გაგრძელებას აღარ დათანხმდეს, თუ დასავლეთი არ მოხსნის სანქციებს, რომლებიც რუსული მარცვლეულისა და სასუქის ექსპორტს აბრკოლებს.
ამასთან უკრაინიდან სოფლის მეურნეობის პროდუქტების იმპორტზე ევროკომისიასა და ევროკავშირის ხუთ ქვეყანას შორის მოლაპარაკებების ახალი რაუნდი ჩაიშალა – ამის შესახებ უკრაინული მედია წერს.
იმ ქვეყნებს, რომლებმაც უკრაინის პროდუქციაზე აკრძალვა დააწესეს, ევროკომისიამ პრობლემების დასაბუთების მიზნით სტატისტიკის წარდგენა მოსთხოვა.
ევროკომისია ბულგარეთის, პოლონეთის, რუმინეთის, სლოვაკეთისა და უნგრეთის თხოვნას უკრაინიდან ხორბლის, სიმინდის და მზესუმზირის იმპორტის აკრძალვასთან დაკავშირებით უკვე დათანხმდა, თუმცა ქვეყნებმა სიაში სხვა პროდუქტების დამატებაც მოითხოვეს.
ევროკომისიამ აკრძალვის მოსახსნელად ამ ქვეყნებს 100 მილიონიანი დახმარება შესთავაზა.
