“დამნაშავეებმა მიმალვა სცადეს და უკრაინისკენ დაიძრნენ” -პუტინმა 24 მარტი რუსეთში გლოვის დღედ გამოაცხადა

პუტინის პირველი განცხადება მოსკოვში მომხდარ ტერაქტზე – რუსეთის პრეზიდენტმა მოქალაქეებს მომხდარიდან თითქმის 20 საათის შემდეგ, პირდაპირ ეთერში მიმართა და განაცხადა, რომ თავდამსხმელები მომხდარის შემდეგ, “უკრაინისკენ დაიძრნენ” – “ყველა, ვინც დგას კროკუსზე ტერაქტის უკან, დაისჯება” – ამბობს პუტინი.
„მოსკოვსა და მის შემოგარენში, ქვეყნის ყველა რეგიონში დაწესებულია დამატებითი ზომები ანტიტერორისტული და ანტიდივერსიული ღონისძიებებისთვის. ახლა მთავარია, არ მივცეთ საშუალება ამ სისხლიანი ხოცვა-ჟლეტის უკან მდგომთ, ჩაიდინონ ახალი დანაშაულები. რაც შეეხება ამ დანაშაულის გამოძიებასა და ოპერატიულ-სამძებრო მოქმედებების შედეგებს, ამჟამად შეგვიძლია, ვთქვათ შემდეგი, ტერაქტის უშუალო შემსრულებელი ოთხივე პირი, ისინი, ვინც ისროდა და ხოცავდა ხალხს, იპოვეს და დააკავეს, ისინი მიმალვას ცდილობდნენ და გადაადგილდებოდნენ უკრაინის მიმართულებით, სადაც წინასწარი მონაცემებით, მათთვის უკრაინულ მხარესთან ერთად მომზადებული იყო „ფანჯარა“ სახელმწიფო საზღვრის გადაკვეთისთვის. სულ დაკავებულია 11 ადამიანი“, – აღნიშნა რუსეთის პრეზიდენტმა.

მისივე თქმით, რუსეთის უშიშროების ფედერალური სამსახური, სხვა სამართალდამცავი უწყებები მუშაობენ ტერორისტული ბაზისთვის ხელშემწყობთა იდენტიფიცირებისა და გამოვლენისთვის, ვინც უზრუნველყოფდა მათ ტრანსპორტით, ინიშნავდა უკან დახევის გზებს, ამზადებდა იარაღისა და საბრძოლო მასალების სამალავებს.

„საგამოძიებო და სამართალდამცავი ორგანოები ყველაფერს გააკეთებენ დანაშაულის ყველა დეტალის დასადგენად, მაგრამ უკვე აშკარაა, რომ ჩვენ არა მხოლოდ დეტალურად და ცინიკურად დაგეგმილი ტერაქტის, არამედ უდანაშაულო ადამიანების წინააღმდეგ მომზადებული და ორგანიზებული მასობრივი მკვლელობის წინაშე ვდგავართ. დამნაშავეები ცივსისხლიანად და მიზანმიმართულად მიდიოდნენ ზუსტად იმისთვის, რომ დაეხოცათ ჩვენი მოქალაქეები, ჩვენი შვილები, როგორც ეს ოდესღაც ნაცისტებმა ოკუპირებულ ტერიტორიებზე გადაწყვიტეს საჩვენებელი დასჯის მოწყობით.

ამ დანაშაულის ყველა მონაწილეს, ორგანიზატორს, დამკვეთს სამართლიანი და გარდაუვალი სასჯელი ელოდება. ჩვენ დავადგენთ და დავსჯით ყველას, ვინც დგას ტერორისტების უკან, ვინც მოამზადა ეს სისასტიკე, თავდასხმა რუსეთზე, ჩვენს ხალხზე. ვიცით, რა არის ტერორიზმის საფრთხე, ჩვენ თანამშრომლობის იმედი გვაქვს ყველა იმ სახელმწიფოსთან, რომლებიც გულწრფელად იზიარებენ ჩვენს ტკივილს. მზად ვართ, რეალურად საქმეში გავაერთიანოთ ძალისხმევა საერთო მტრებთან ბრძოლაში, საერთაშორისო ტერორიზმთან, მისი ყველა გამოვლინებით. ტერორისტები, მკვლელები, ადამიანები არ არიან, მათ ეროვნება არ აქვთ და ერთი ბედი ემუქრებათ – შურისძიება და დავიწყება. მათ მომავალი არ აქვთ. ახლა ჩვენი საერთო ვალია, ვიყოთ ერთად, მჯერა ასეც იქნება, რადგან არავის შეუძლია, შეარყიოს ჩვენი ერთიანობა და ნება, მონდომება და გამბედაობა, ერთიანი რუსეთის ხალხის ძალა. რუსეთს არაერთხელ გამოუვლია ურთულესი და გაუსაძლისი განსაცდელი, თუმცა უფრო ძლიერდებოდა, ახლაც ასე იქნება“, – განაცხადა პუტინმა.

მან 24 მარტი ეროვნული გლოვის დღედ გამოაცხადა, მიუსამძიმრა თავდასხმის შედეგად დაღუპულთა ახლობლებს თავდასხმას “ბარბაროსული ტერორისტული აქტი” უწოდა. მადლობა გადაუხადა სასწრაფო დახმარების ეკიპაჟებს, მეხანძრეებსა და მაშველებს.

პუტინის გადაწყვეტილებით, ქვეყნის ყველა რეგიონში, შემოღებულ იქნა დამატებითი ანტიტერორისტული და ანტიდივერსიული ღონისძიებები.

ამ დროისათვის არსებული მონაცემებით, გასულ ღამეს, Crocus City Hall-ზე თავდასხმის შედეგად დაღუპულია 115 ადამიანი, დაჭრილია140-ზე მეტი.

რუსეთის საგამოძიებო კომიტეტმა თავდასხმას ტერაქტის კვალიფიკაცია მიანიჭა.

მოგვიანებით, მომხდარზე პასუხისმგებლობა ISIS-მა აიღო.