კობახიძე ღია წერილში რუსული კანონის საწინააღმდეგოდ გამართულ აქციებზე მყოფ ახალგაზრდებს ილია ჭავჭავაძის მკვლელს ადარებს

პრემიერმინისტრი ირაკლი კობახიძე სოციალურ ქსელში გამოქვეყნებულ ღია წერილში რუსული კანონის საწინააღმდეგოდ გამართულ აქციებზე მყოფ ახალგაზრდებს ილია ჭავჭავაძის მკვლელს ადარებს. კობახიძე ამავე წერილში ამტკიცებს, რომ “ცოდნისა და ინტელექტის არმქონე და თავდაჯერებული ადამიანი რუსულ ტანკზე უარესია”.

მისივე მტკიცებით, კვლევა ჩაატარეს და ნახეს, რომ “ოცნებას” მაღალი IQ-ის მქონე ამომრჩევლის 73.8% უჭერს მხარს. კობახიძე ამავე წერილს გულწრფელ ახალგაზრდებს ჰპირდება, რომ სახელმწიფო მათზე იზრუნებს.

იხილეთ:

“გულწრფელობას რაც შეეხება, მას მხოლოდ მაშინ აქვს ფასი, როდესაც ის ცოდნითა და ინტელექტით არის გამყარებული. ცოდნისა და ინტელექტის არმქონე და თავდაჯერებული ადამიანი რუსულ ტანკზე უარესია.

როდესაც 29 წლის გიგლა ბერბიჭაშვილმა 70 წლის ილია ჭავჭავაძეს ესროლა, მას ღრმად სწამდა, რომ თავად იყო პროგრესული გულწრფელი ახალგაზრდა, ხოლო ილია ჭავჭავაძე – ჩამორჩენილი არაკეთილსინდისიერი მოხუცი. ბერბიჭაშვილს და მის თანამოაზრე ახალგაზრდებს ეს რწმენა ბოლშევიკურმა იდეოლოგიამ ჩაუნერგა. მსგავსი მეთოდებით მუშაობს ფსევდოლიბერალური იდეოლოგიაც, რომელმაც კოლექტიური „ნაცმოძრაობის“ პირდაპირ თუ ირიბად მიმდევარ ახალგაზრდებს დააჯერა, რომ სწორედ ისინი არიან გულწრფელობისა და პროგრესულობის მაგალითი ამ ქვეყანაში.

ამ ყველაფრის გათვალისწინებით, ღრმად ვარ დარწმუნებული, რომ ჩვენ უნდა ვიმოქმედოთ არა ჩემი ნაცნობი გულწრფელი ახალგაზრდის მოთხოვნების მიხედვით, არამედ 29 აპრილს „ქართული ოცნების“ აქციაზე მოსული 200 ათასი ახალგაზრდა, საშუალო ასაკისა და ასაკოვანი ადამიანის კარნახით. ჩვენ ვიმოქმედებთ ქართველი ამომრჩევლის 60 პროცენტზე მეტის დაკვეთით, რომელიც „ენჯეოების“ გამჭვირვალობას და შესაბამისად, საქართველოს მშვიდობიან მომავალს მყარად და გააზრებულად უჭერს მხარს.

ყველა გულწრფელ ახალგაზრდას კი, რომელიც არასწორ გზას ადგას, გულწრფელად ვთხოვ, საკუთარ წარსულ ნაბიჯებს კრიტიკულად შეხედონ, რომ სამომავლოდ მსგავსი შეცდომები აღარ დაუშვან. ასეც და ისეც, გპირდებით, რომ ქართული სახელმწიფო იზრუნებს ყველა გულწრფელ ახალგაზრდაზე, მათ შორის ისეთებზეც, რომლებიც დღეს შეცდომაში არიან შეყვანილი და ვერ აცნობიერებენ, თუ რამხელა უბედურება ააცილა მას ქართული საზოგადოების უმრავლესობამ და მის მიერ არჩეულმა ხელისუფლებამ თავიდან. ყველა გულწრფელ ახალგაზრდას ვთხოვ, კარგად გაიაზრონ, თუ რამდენად მნიშვნელოვანია, ვიაროთ ღირსებით ევროპისკენ, რადგან ევროკავშირში შესვლა მხოლოდ ღირსებით არის შესაძლებელი. 2030 წლისთვის საქართველო სწორედ ღირსებით გახდება ევროკავშირის წევრი ქვეყანა, როგორც დამოუკიდებელი და სუვერენული სახელმწიფო”.

ირაკლი კობახიძის ღია წერილის მიზანი არის ის, მიმართონ ახალგაზრდებს, რომ საკითხებს არ უნდა შეხედონ მხოლოდ ემოციებით, მნიშვნელოვანია შინაარსი, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

პაპუაშვილის თქმით, ბოლო კვირების განმავლობაში დაბლოკილია მსჯელობა, არის ტრაფარეტებით საკითხის გადაფარვა, რაშიც, პარლამენტის თავმჯდომარის განცხადებით, სამწუხაროდ, უცხოელი აქტორებიც არიან ჩართული.

„ჩვენ რასაც ვაკვირდებით ბოლო კვირების განმავლობაში, არის ის, რომ დაბლოკილია მსჯელობა და დისკუსია, არის ტრაფარეტებით გადაფარვა საკითხისა, რომელშიც, სამწუხაროდ, უცხოელი აქტორებიც არიან ჩართული იმ მხრივ, რომ ნაცვლად იმისა, იყოს საღი დისკუსია საკითხთან დაკავშირებით, რამდენიმე კვირაა, ჯიუტი მცდელობაა, არ შევიდეს ვინმე დისკუსიაში და მიეკეროს კლიშეები ამა თუ იმ ინიციატივას. საბედნიეროდ, საზოგადოება ამას ძალიან კარგად ხედავს და ძალიან კარგად ერკვევა საკითხებში.

მეორე განზომილებაა, რომ ხდება ასე წარმოჩენა, თითქოს არის ახალგაზრდების ჯგუფი, რომელიც შინაარსობრივად თუ ემოციურად ეხება ამ საკითხს. სინამდვილეში, ჩვენ თუ დავაკვირდებით გარკვეულ სტრუქტურას იმ პროტესტისა, რომელიც არის, ვნახავთ რამდენიმე აქტივისტის ჯგუფს. ესეც ცალკე გამოგონილი ტერმინია აქტივისტებისა, იმისთვის, რომ დააბნიონ საზოგადოება, თითქოს ამ აქტივისტების ჯგუფს არ აქვს პარტიული კუთვნილება. ამიტომ, მედიებს მოგიწოდებთ, რომლებიც არიან ლიდერები და ორგანიზატორები, მათ შორის იმ ძალადობრივი აქტივობებისა, „დაფიონი“, ჯიუტი“ და სხვა ჯგუფები, ვკითხოთ, რა არის მათი პოლიტიკური არჩევანი.

სინამდვილეში, ეს არიან პოლიტიკური ჯგუფები, რომლებიც თითქოს დისტანცირებული არიან პარტიებისგან, მაგრამ აქვთ პირდაპირი პარტიული დავალებები. ამიტომ, ამ წერილის მიზანი მე როგორც გავიგე, არის ის, მიმართონ ახალგაზრდებს, რომ საკითხებს არ უნდა შეხედონ მხოლოდ ემოციებით, მნიშვნელოვანია შინაარსი. მე მგონი, კარგად იყო გაშლილი, მათ შორის ეს საკითხი – ჩვენ ემოციებს რომ ვყოფილიყავით აყოლილი, ასეთივე მიტინგები ტარდებოდა 2020 წლის არჩევნების შემდეგ, როდესაც თითქოს არჩევნები გაყალბდაო, ამბობდნენ. მაშინ, გახსოვთ, ხელისუფლება, ფაქტობრივად, მარტო დარჩა. „ენჯეოებმა“ არჩიეს სიჩუმე. ისინი, ვინც არ იყვნენ ჩართული პარალელური დათვლის შედეგების გაყალბებაში, არჩიეს სიჩუმე. მათ შორის მეც პირადად მქონდა მაშინ შეხვედრები „ენჯეოებთან“. არ ჩაერივნენ ამ საკითხში. შემდეგ აღმოჩნდა, რომ ყველამ ყველაფერი კარგად იცოდა. მათ შორის დონორიც იყო ამ საკითხში ჩართული, პარალელური დათვლის ყალბი შედეგების გავრცელებაში. მაგრამ, სამწუხაროდ, ვნახეთ ეტაპი ერთთვიანი მღელვარებისა, რომელიც ზუსტად იმით, რომ ჩვენ ჯიუტად შინაარსზე ვიყავით კონცენტრირებული, გადავტეხეთ. ასე იყო 2022 წლის თებერვლის ბოლოს, როდესაც რუსეთმა დაიწყო აგრესიული ომი. მაშინაც ზუსტად ასე ემოციებზე გამოიყვანეს გარკვეული ჯგუფი საზოგადოებისა. როდესაც არ მოგვენიჭა კანდიდატის სტატუსი, მაშინაც. ყოველ ჯერზე დადასტურდა, რომ ხელისუფლება და საქართველოს მოსახლეობის უმრავლესობა იყო სწორ, შინაარსობრივ გზაზე. დადასტურდა, რომ ხელისუფლება და მოსახლეობის უმრავლესობა იყო მართალი. უმცირესობა კი, რომელიც მაშინ ემოციურ აქციებს ატარებდა – გაუშვით ქართველი მებრძოლები უკრაინაში სახელმწიფო თვითმფრინავით, გადადგეს მთავრობა და „ენჯეოებმა“ დააკომპლექტონ მთავრობა, გაყალბდა არჩევნები – ყველა ეს ლოზუნგი კვლავ ჩაგვესმის ყურში, რაც მაშინ ზუსტად ასეთი ტიპის აქციებიდან ისმოდა.

აღმოჩნდა, რომ ყველა ამ შემთხვევაში იყო მცდარი ის ემოციური მოსაზრებები, რაც მაშინ იყო, არადა, საჭირო იყო ხუთი წუთი დაფიქრება მხოლოდ შინაარსში, რას ნიშნავდა სამხედროების გაგზავნა სახელმწიფოს თვითმფრინავით, რომ ეს ნიშნავდა პირდაპირ ომში შესვლას რუსეთთან. საჭირო იყო ხუთი წუთი დაფიქრება იმაზე, რას ნიშნავს, როდესაც უცხოური დაფინანსებით მოქმედი „ენჯეო“ ითხოვს, მთავრობა მან დააკომპლექტოს. საერთოდ რა მოვლენასთან გვაქვს საქმე და რა ჩარევასთან გვაქვს საქმე შიდა საქმეებში, ხუთი წუთი დაფიქრება ხანდახან საჭიროა.

მთავარი გზავნილი ამ წერილის არის, რომ დავფიქრდეთ, შევიდეთ შინაარსში. ეს არის მთავარი, რადგან ადვილია, ვიღაცები ემოციებს ააყოლონ და ეს არაერთხელ გამოსვლიათ სხვადასხვა ქვეყანაში, სხვადასხვა საზოგადოებაში. სწორედ ასე, ახალგაზრდულ ენერგიას და ემოციას იყენებენ ისინი, ვინც უკანა რიგებში არიან. დააკვირდით თუნდაც ამ აქციებს. ის პოლიტიკოსები არ ჩანან ხოლმე ტელეეკრანებზე, მაგრამ იქ არიან ყოველთვის, უკანა რიგებში. ისინი არიან, ვინც იძლევიან ბრძანებებს, რათა წინ წაწიონ ახალგაზრდა, ენერგიით სავსე ადამიანები, თავად შემდეგ აამღვრევინონ წყალი და ამღვრეულ წყალში ისარგებლონ“, – განაცხადა შალვა პაპუაშვილმა.