პარტია „გახარია საქართველოსთვის“ რამდენიმე წევრმა დატოვა

პარტია „გახარია საქართველოსთვის“ რამდენიმე წევრმა დატოვა. მათ მიზეზად პარტიის ლიდერების მხრიდან კომუნიკაციის არარსებობა და კუთვნილი თანხის მიუღებლობა დაასახელეს.

„ვინც მიგვიყვანა გახარიას პარტიაში, ვთხოვდი, რომ დაერიცხა ჩემი კუთვნილი თანხა. მოხდა ისე, რომ არ ჩაგვერიცხა თანხა. ვურეკავდი ნომრებზე, მაგრამ არავინ გვპასუხობდა. ორი წლის განმავლობაში რეგულარულად ვრეკავდით, მაგრამ არავისგან არანაირი პასუხი არ გვქონდა. იძულებული გავხდით, წამოვსულიყავით პარტიიდან“, – განაცხადა ნათია კუპრავამ.

ამასთან, პარტიის უკვე ყოფილი წევრის, ერეკლე დოლიძის განცხადებით, გახარიას პარტიამ მოლოდინები ვერ გაამართლა.

ვტოვებ პარტიას „გახარია – საქართველოსთვის“, გამომდინარე იქიდან, რომ აღნიშნულმა პარტიამ ვერ გაამართლა ჩემი მოლოდინები,- ამის შესახებ გახარიას პარტიის რუსთავის ორგანიზაციის წევრმა, ერეკლე დოლიძემ განაცხადა.

მან ისაუბრა იმ გარემოებებსა და პარტიის მიერ გაცემულ დაპირებებზე, რის გამოც გადაწყვიტა, „გახარია – საქართველოსთვის“ დაეტოვებინა.

„საპარლამენტო სიაში აღმოჩნდა ზვიად ძიძიგური, ადამიანი, რომელიც ერთხელ უკვე იყო მივლინებული დეპუტატად და ვერ განახორციელა ქალაქისთვის ვერცერთი სასარგებლო პროექტი. ასევე, რამდენიმე დღის წინ ჩამოსული იყო გიორგი გახარია, რომელმაც განაცხადა, რომ განახორციელებდა რუსთავი-თბილისის დამაკავშირებელი მეტროს პროექტს, ეს არის სრული სიცრუე, გამომდინარე იქიდან, რომ მისი პრემიერ-მინისტრობის დროს შეჩერდა რუსთავი-თბილისის დამაკავშირებელი ავტობანი. სწორედ ამ და სხვა დაპირებების გამო, რომლებიც არის სრული სიცრუე, არ მინდა ავიღო პასუხისმგებლობა ჩემი მეგობრებისა და მოქალაქეების წინაშე, მივიღე გადაწყვეტილება, დავტოვო პარტია „გახარია – საქართველოსთვის“, – განაცხადა ერეკლე დოლიძემ.

ამასთან, „გახარია – საქართველოსთვის“ პარტიის პრესსამსახურში აცხადებენ, რომ ერეკლე დოლიძე მათი წევრი იყო, თუმცა პარტიული საქმიანობიდან დიდი ხნის განმავლობაში იყო დისტანცირებული.
ამავდროულად, დღეს რუსთავში „ერთიანობა – ნაციონალური მოძრაობის“ შტაბი დატოვა პაპუნა პაპავამ.

„რუსთავში მე ვტოვებ გაერთიანებული ოპოზიციის შტაბს, რადგან მათი ლიდერის, დავით კირკიტაძის დაპირებები ამ ეტაპზე მიმაჩნია არარეალურად. კერძოდ, დაპირებები პენსიასთან დაკავშირებით, რომ გაზრდა მოხდება 1 000 ლარამდე, აგრეთვე, ბინათმესაკუთრეთა ამხანაგობის თავმჯდომარეთა ხელფასის 1000-ლარიანი დაპირება. ვფიქრობ, ეს დაპირება არ არის გულწრფელი. რაც შეეხება მგზავრობასთან დაკავშირებით, სტუდენტების მიმართ, მიმაჩნია, რომ უფასო მგზავრობა და საერთოდ ადამიანებისთვის რაიმე უფასოს დაპირება არის სოციალისტური გადმონაშთი“, – აცხადებს რუსთავის ორგანიზაციის ყოფილი წარმომადგენელი, პაპუნა პაპავა, რომელიც ახალი პლატფორმის შექმნას გეგმავს.