შვედეთის მთავრობა საქართველოსთან წყვეტს ყველა სახის თანამშრომლობას

შვედეთის მთავრობა აცხადებს, რომ საქართველოსთან წყვეტს ყველა სახის პირდაპირ ოფიციალურ თანამშრომლობას. პარალელურად, შვედეთი 25 მილიონ კრონს (დაახლოებით 2 170 000 ევრო) გამოყოფს საქართველოს სამოქალაქო საზოგადოებისთვის.

“საქართველოში განვითარებული [მოვლენები] უკვე გარკვეული პერიოდია ძალიან საგანგაშოა. ამას აძლიერებს ცნობები დარღვევებზე, რომლებიც გაავრცელეს არჩევნების საერთაშორისო დამკვირვებლებმა შაბათის საპარლამენტო კენჭისყრიდან”, – წერს შვედეთის განვითარების, თანამშრომლობისა და საგარეო ვაჭრობის მინისტრი ბენიამინ დუსა საინფორმაციო სააგენტო TT-სთვის გაგზავნილ განცხადებაში.

“მცდელობები, ქვეყნის სამოქალაქო საზოგადოებას საშუალება არ მიეცეს, შეასრულოს თავისი დემოკრატიული როლი, მათ შორის შემზღუდავი კანონმდებლობით, კონფლიქტში მოდის ევროკავშირის ნორმებთან და ღირებულებებთან”, – წერს დუსა და დასძენს: “ამდენად, ხელისუფლება აჩერებს შვედეთ-საქართველოს პირდაპირ ოფიციალურ თანამშრომლობას, რომელიც კვლავაც გრძელდება, საქართველოს საგადასახადო უწყების თანახმად”.

დუსას თქმით, თანამშრომლობა მომავალში შეიძლება აღდგეს, თუ საქართველო კვლავაც მიმართავს ევროკავშირს.

შვედეთის მიერ საქართველოსთვის გამოყოფილი დახმარება წელიწადში 200 მილიონამდე კრონს (დაახლოებით 17 368 00 ევროს) შეადგენს. წელს 25 მილიონი კრონი საქართველოს სამოქალაქო საზოგადოებისთვის დაიხარჯება.

კანადის საგარეო საქმეთა სამინისტრომ საქართველოს საპარლამენტო არჩევნების შესახებ 28 ოქტომბერს გაავრცელა განცხადება, რომლის ტექსტის თარგმანსაც ქვემოთ გთავაზობთ:

“როგორც საქართველოს მეგობარი, პარტნიორი და მხარდამჭერი ხანგრძლივი დროის განმავლობაში, კანადა აღრიცხავს 2024 წლის 26 ოქტომბრის საპარლამენტო არჩევნების ოფიციალურ შედეგებს, რომლებიც ქვეყნის ცენტრალურმა საარჩევნო კომისიამ გამოაცხადა.

მაგრამ კანადა შეშფოთებულია ამომრჩეველზე ზეწოლის, ამომრჩეველთა მოსყიდვის და საარჩევნო დღის სხვა დარღვევების ფართოდ გავრცელებული ფაქტებით, რომლებზეც იუწყებიან ეუთოს დემოკრატიული ინსტიტუტებისა და ადამიანის უფლებების ოფისი (ODIHR) და სხვა მიუკერძოებელი დამკვირვებლები. ამ [ცნობებს] ყურადღება უნდა მიექცეს და გამოძიებულ უნდა იქნეს. კანადას მყარად სწამს, რომ თავისუფალი, სამართლიანი და დამოუკიდებელი არჩევნები დემოკრატიული საზოგადოების ქვაკუთხედია.

დიდ შვიდეულთან და ევროპელ პარტნიორებთან კოორდინირებით და არჩევნების ჩატარების და შედეგების გათვალისწინებით, კანადა გადასინჯავს თავის ურთიერთობას საქართველოს ხელისუფლებასთან. კანადა ღია რჩება საქართველოსთან თანამშრომლობისთვის, თუკი საქართველოს ხელისუფლება პატივს სცემს დემოკრატიას, ადამიანის უფლებებს, კანონის უზენაესობას და ყურადღებას მიაქცევს ბოლო პერიოდში დემოკრატიის უკუსვლას.

ჩვენ ყველა მხარეს სიმშვიდისკენ მოვუწოდებთ, საქართველოს ხელისუფლებას მოვუწოდებთ, პატივი სცეს ინდივიდთა უფლებებს და უსაფრთხოებას მშვიდობიანი პროტესტის კონტექსტში.

ქართველებს ვაქებთ აქტიური მონაწილეობისთვის საარჩევნო პროცესში, მათ შორის ამომრჩევლების, საარჩევნო თანამშრომლებისა და მოქალაქე დამკვირვებლების რანგში”.