ხმების მოპარვის ბრალდებით “ქართულმა ოცნებამ” ოპოზიციის წინააღმდეგ პროკურატიურაში სარჩელი შეიტანა

26 ოქტომბრის არჩევნების დარღვევებთან დაკავშირებით, პროკურატურაში “ქართული ოცნების” სარჩელი შედის. მმართველი პარტია ოპოზიციას ხმების დაკარგვას ედავება. როგორც პარტიის ოფისში გამართულ ბრიფინგზე მამუკა მდინარაძემ განაცხადა, მათ ორი სქემა გაშიფრეს. პირველის შემთხვევაში, “ოცნების” მხარდამჭერები ოპოზიციას საკუთარ წარმომადგენლებად ჰყავდა დარეგისტრირებული, რის გამოც ამომრჩევლები ერთიანი სიიდან ცესკომ ამოიღო და მათ ხმა ვერ მისცეს.

“ქართული ოცნების” აღმასრულებელი მდივანი, მამუკა მდინარაძე ამბობს, რომ მსგავსი 81 ფაქტი მოხდა. მან ბრიფინგზე ისაუბრა გადასატან ყუთთან დაკავშირებულ მანიპულაციაზეც.

“კონკრეტული ამომრჩევლები, რომლებიც აცხადებენ, იდენტიფიცირებულები არიან და ვიცით, რომ “ქართული ოცნების” მომხრეები არიან, მიდიოდნენ საარჩევნო უბანზე და მათ სიიდან საკუთარი თავი ამოღებული ხვდებოდათ”, – განაცხადა მამუკა მდინარაძემ ბრიფინგზე.

მისი განმარტებით, ხშირ შემთხვევაში, “ქართული ოცნების” ამომრჩევლები “ნაცმოძრაობის” კლასტერის სხვადასხვა პარტიის მიერ დანიშნულები იყვნენ, მათი პარტიების წარმომადგენლებად სხვა საარჩევნო უბნებში”, რის გამოც ხმის მიცემას ვერ ახერხებდნენ.

“წარმოგიდგენთ მტკიცებულებებს და კონკრეტულ ფაქტებს, როგორ იპარავდნენ ის ადამიანები კონკრეტულ ხმებს – “ქართული ოცნების” ხმებს, რა სქემა იყო, რას აკეთებდნენ, რას კადრულობდნენ და რა კონკრეტული მტკიცებულებები და ფაქტები არსებობს ამასთან დაკავშირებით.

მათ რომ არ ეგონათ, რომ გაუხმაურდებოდათ ეს ამბავი, ასეთი ფაქტებია აღმოჩენილი. როდესაც აქეთ გვაბრალებენ, ახლა მე მათ ვაჩვენებ, რეალობა რა არის და რას კადრულობენ ისინი და მათი წარმომადგენლები.

სქემა N 1: გვაქვს 81 დადასტურებული ფაქტი და ეს უკვე სისტემურობაზე მიუთითებს და დარწმუნებული ვარ, ჩვენი მოწოდების შესაბამისად, კიდევ მრავალი მსგავსი ფაქტი ამოვარდება. გუშინწინ მე თქვენ შეგპირდით, ჟურნალისტებს და საზოგადოებას, რომ მე კონკრეტულ ფაქტებს მოვიტანდი, თუ როგორ იპარავდნენ “ნაცმოძრაობის” კლასტერის წარმომადგენლები “ქართული ოცნების” ხმებს და რას კადრულობდნენ ამისთვის.

გვაქვს 81 დადასტურებული, იდენტიფიცირებული ფაქტი, რომელსაც დღესვე წარვუდგენთ საქართველოს პროკურატურას. რადგან ისინი მტკიცებულებებს ვერ წარუდგენენ, არ წარუდგენენ, ამას ჩვენ გავაკეთებთ და რადგან ისინი არ თანამშრომლობენ გამოძიებასთან, ამას ჩვენ გავაკეთებთ და ვითანამშრომლებთ დეტალების შესახებ, რომ ამ ქვეყანაში, ვერავინ შეძლოს მსგავსი დანაშაულების, უფრო ზუსტად და პასუხისმგებლობით რომ ვთქვათ, სავარაუდო დანაშაულების ჩადენა.

და რას შეეხება ეს 81 ფაქტი: კონკრეტული ამომრჩევლები, რომლებიც აცხადებენ და ვიცით, დაიდენტიფიცირებული გვყავს, როგორც “ქართული ოცნების” მომხრეები, მიდიოდნენ საარჩევნო უბანზე და მათ ხვდებოდათ სიიდან თავისი თავი ამოღებული. ირკვეოდა, რომ ისინი ნაცმოძრაობის კლასტერის სხვადასხვა პარტიების მიერ დანიშნულები იყვნენ მათი პარტიების წარმომადგენლებად სხვა საარჩევნო უბნებში, ხშირ შემთხვევაში მოშორებით, მათი ჩაწერის ადგილიდან და შესაბამისი საარჩევნო უბნიდან. ანუ, დავუშვათ, მამუკა მდინარაძე რომ მივიდოდა, “ქართული ოცნების” ერთი რიგითი ამომრჩეველი დავუშვათ, პირობითად ვამბობ ჩემს სახელ და გვარს, საბურთალოზე, თავის საარჩევნო უბანში, ხვდებოდა მოცემულობა, რომ ის დანიშნული იყო მაგალითად, სამტრედიაში ნაცმოძრაობის წარმომადგენლად სხვა ოლქის საარჩევნო უბანზე. შესაბამისად, ხშირ შემთხვევაში ჩვენი მომხრეები ვეღარ ახერხებდნენ, რომ ხმა მიეცათ. ბევრმა მათგანმა მოახერხა, ბევრმა მათგანმა ვერ მოახერხა.

მაგალითად, თბილისის შემთხვევაში: დიდუბეში მცხოვრები ნონა ნემსაძე, რომელსაც ხმა უნდა მიეცა 27-ე საარჩევნო უბანზე, როდესაც მივიდა, იქ აღმოაჩინა, რომ დანიშნული იყო “ევროპული საქართველოდან” ნინოწმინდაში წარმომადგენლად 25-ე საარჩევნო უბანზე.

ასევე, მაგალითად მაყვალა ხატიაშვილი, რომელსაც ხმა უნდა მიეცა, რეგისტრირებულია შესაბამისად დიდუბეში და ხმა უნდა მიეცა დიდუბის 30-ე საარჩევნო უბანზე, მივიდა და გაირკვა, რომ ის იყო დანიშნული 53-ე საარჩევნო უბანზე ალეკო ელისაშვილის პარტიიდან. ნინო დვალი მივიდა სამგორში თავის საცხოვრებელი ადგილის მიხედვით, სადაც ჩაწერილია და სადაც უნდა ყოფილიყო რეგისტრირებული, მე-19 საარჩევნო უბანზე, ხმა ვერ მისცა მანაც იმის გამო, რომ აღმოჩნდა ამბროლაურში მეათე საარჩევნო უბანზე დანიშნული “ერთიანი ნაციონალური მოძრაობიდან”.

ასევე, მაგალითები მომყავს, 81-ეს არ წაგიკითხავთ, მაგრამ რამდენიმე მაგალითს წაგიკითხავთ. ბორჯომში მაცხოვრებელი ელენე ელიოსიძე, რომელსაც ხმა უნდა მიეცა მე-4 საარჩევნო უბანზე აღმოჩნდა დანიშნული “ლელოდან” საბურთალოს მე-3 საარჩევნო უბანზე და ხმა ვერ მისცა.

ნუკრი დოლაბერიძე, რომელსაც ხმა უნდა მიეცა წყალტუბოში 24-ე საარჩევნო უბანზე, აღმოჩნდა ქუთაისში დანიშნული 59-ე საარჩევნო უბანზე “ევროპული საქართველოდან”.

ნუგზარ ირემაძე ადიგენში ხმა უნდა მიეცა მე-15 საარჩევნო უბანზე, იქ ცხოვრობს და აღმოჩნდა ხულოში დანიშნული ალეკო ელისაშვილის პარტიიდან 23-ე საარჩევნო უბანზე.

და ასეთი გვაქვს 81 იდენტიფიცირებული შემთხვევა, როდესაც “ქართულ ოცნებას” მოჰპარეს ხმა და ამ კონკრეტულ ადამიანებს არ მისცეს საშუალება, რომ ხმა მიეცა იქ, სადაც არის ჩაწერილი და სადაც უნდა ყოფილიყო რეგისტრირებული ისინი ამოღებულები იყვნენ საარჩევნო სიიდან იმიტომ, რომ სპეც.სიაში იყვნენ შეყვანილები იქ, სადაც იყვნენ ასე მოტყუებით მათი პირადი მონაცემების მოპოვებით. ესეც არ უნდა დაგვავიწყდეს. ჩვენ ბუნებრივია ამ სიას გადავუგზავნით საქართველოს პროკურატურას და დეტალურად ვთხოვთ მათ, რომ გამოიძიონ ეს საკითხები. ვინ, რა ნომრით, როგორ მოიპოვა მათი პირადი მონაცემები და როგორ დანიშნა სხვაგან მათი პარტიის წარმომადგენლად, “ქართული ოცნების” მომხრეები, რომლებსაც ამის შესახებ წარმოდგენა არ ჰქონდათ, ეს არის გამოძიების საქმე და საქმე გვაქვს სავარაუდო დანაშაულთან, როდესაც ხელი ეშლება მოქალაქეს თავისი არჩევანი თავისუფლად დააფიქსიროს. 162-ე მუხლია სხვათა შორის, სისხლის სამართლის კოდექსში.

სქემა N2: აღმოჩნდა შემთხვევები, როდესაც გადასატან ყუთთან “ნაცმოძრაობის” კლასტერის წარმომადგენლები იყვნენ. ანუ მათ წილისყრით მოუწიათ მოქალაქეებთან მისვლა, იმ მოქალაქეებთან, რომელსაც გადასატანი ყუთის მეშვეობით უნდა მიეცა ხმა და როდესაც მათ აიღეს ეჭვი, განწყობაზე შეატყვეს, რომ ისინი მათ პარტიებს არ უჭერდნენ მხარს და ისინი იყვნენ „ქართული ოცნების“ მხარდამჭერები, უბრალოდ გამოატოვებინეს, ხელი არ მოაწერინეს, ისარგებლეს იმით, რომ იმის შესახებ, რომ ხელმოწერაც უნდა ყოფილიყო შესაბამის ფურცელზე ინფორმაცია არ ჰქონდათ მოქალაქეებს და ასეთი გადასატანი ყუთის მონაცემები ანგარიშში ვერ შევიდა, გაუქმდა.

მაგალითად, ზესტაფონის საარჩევნო ოლქის ქვედა საქარის N38 საარჩევნო უბნის გადასატანი ყუთის წაღება ამომრჩეველთან წილისყრის საფუძველზე წილად ხვდა “ნაცმოძრაობას” და “ლელოს” – ხელმოწერები არ იყო გადასატანი ყუთი როდესაც დაბრუნდა უბანზე, იმიტომ, რომ მათ იეჭვეს, რომ ძირითადად გადასატან ყუთში ვინც ათავსებდა თავის არჩევანს გაფერადებულს, ისინი იყვნენ “ქართული ოცნების” მომხრეები. ასე მოჰპარეს სოფელ ქვედა საქარის ამომრჩევლებს ხმები. აქაც ხელი შეუშალეს შეგნებულად იმით, რომ არ მოაწერინეს ხელი, იცოდნენ, რომ ამ შემთხვევაში გაბათილდებოდა მონაცემები. ეს არის მეორე სქემა, რომელსაც კადრულობდნენ “ნაცმოძრაობის” კლასტერის წარმომადგენლები, იმ შემთხვევაში თუ წილისყრის საფუძველზე ისინი მოხვდებოდნენ გადასატან ყუთთან.

ჩვენ გვაქვს სხვა ინფორმაციებიც, მათ შორის იმასთან დაკავშირებით, განსაკუთრებით ზუგდიდში, თელავში და რამდენიმე საარჩევნო ოლქში, როგორ ცდილობდნენ, რომ გარკვეული თანხის სანაცვლოდ დაეტოვებინათ ამომრჩევლები სახლში, რასაც ჩვენ გვაბრალებდნენ ანუ. მაგრამ სანამ არ გვექნება კონკრეტული მტკიცებულება და იდენტიფიცირებული მონაცემები ამაზე არ ვისაუბრებ ამის იქით რასაც მე ვამბობ. ისინი ხომ ყველაფერზე საუბრობენ და გამოძიებასთან არ თანამშრომლობენ, ამის იქით მე არაფერს ვიტყვი, სანამ კონკრეტული ფაქტები არ გვექნება. ახლა ჩვენ ვსაუბრობთ იმ ორ სქემაზე, როგორ დასდევდნენ თითოეულ ხმას, როგორ მოჰპარეს კონკრეტულ ადამიანებს, “ქართული ოცნების” მომხრეებს თავისი არჩევანი და როგორ დაგვაკლეს ხმები. 81 იდენტიფიცირებული შემთხვევაა.

ზოგ შემთხვევაში მათ ვერ მოახერხეს, “ქართული ოცნების” ამომრჩეველმა შეძლო, რომ წასულიყო საარჩევნო უბანზე და მიეცა ხმა, აქ უკვე მცდელობაა ხმის მოპარვის. ზოგ შემთხვევებში, იმ შემთხვევებში, რომელიც მე დღეს წარმოგიდგინეთ ვერ შეძლო.

მივმართავ საქართველოს პროკურატურას, ყურადღებით გამოიძიოს ყველა ეს საქმე. ჩვენ მივაწვდით დეტალურ ინფორმაციას იმასთან დაკავშირებით, რაზეც ახლა მე ვისაუბრე და სალომე ზურაბიშვილის ერთი ცნობილიო გამონათქვამისა არ იყოს, “სადაც არ უნდა გათხაროო” თუ რაღაცას, რომ ამბობდა. მართლა მათ გამოთხარეს ისეთ რაღაცები რასაც არ ელოდნენ, ამ დაბრალებებით, ისინი ჰაერში ისვრიან სიტყვებს და აბრალებენ სხვას იმას, რის მცდელობებიც და ზოგ შემთხვევაში სამწუხაროდ, განხორციელებული, დამთავრებული დანაშაულიც სახეზე გვაქვს.

ამიტომ საქართველოს პროკურატურას ვთხოვთ, ყურადღებით გამოიძიოს ყველა ეს შემთხვევა და დააკვალიფიციროს ზუსტად ისე, როგორც უნდა დაკვალიფიცირდეს კონკრეტული მოქმედება თუ ის სავარაუდო დანაშაულის ნიშნებს და შემდეგ საბოლოო ჯამში დანაშაულის ნიშნებს შეიცავს ჩვენი წარმოდგენით. მე არ დავარღვევ უდანაშაულობის პრეზუმფციას, საქმე გვაქვს სისხლის სამართლის კოდექსის 162-ე მუხლით გათვალისწინებულ დანაშაულთან, რადგან კონკრეტულ შემთხვევებში საქმე გვქონდა, ერთი მხრივ, უკვე დამთავრებულ დანაშაულთან, როდესაც ხმები მოჰპარეს, ხელი შეუშალეს ადამიანებს საარჩევნო ნების გამოვლენაში, მეორე შემთხვევაში, ასეთი მცდელობაც, ასევე, დამთავრებულ დანაშაულთან, როდესაც მცდელობა ჩაიდინეს ასეთი ხელშეშლის.

დანარჩენ მტკიცებულებებს როდესაც მოვიძიებთ, დამატებით წარმოგიდგენთ და არ ვილაპარაკებთ ჰაერზე არცერთ საკითხთან დაკავშირებით”, – განაცხადა მამუკა მდინარაძემ.

“ის, რაც ბუნებაში არ არსებობს, იქ ვერაფერს ვერ გამოიძიებ. ამიტომ ვამბობთ, რომ არის სიტყვების ბრახა-ბრუხი, ამ ბრახა-ბრუხზე ხომ არ შეიძლება სერიოზული პასუხები გავცეთ. შენ თუ რამე გაგაჩნდა, მიგეტანა, როგორც საჩივარი საარჩევნო კომისიაში. ვერ მიიტანე, იმიტომ, რომ არ გაგაჩნია,” – ამის შესახებ “ქართული ოცნების” წევრმა, ირაკლი ქადაგიშვილმა განაცხადა, რითაც ოპოზიციის წევრების განცხადებებს გამოეხმაურა, სადაც ისინი საუბრობენ, რომ არჩევნები საერთაშორისო ორგანოებმა უნდა გამოიძიონ.

ქადაგიშვილის თქმით, საქართველოში გამოძიება უკვე მიმდინარეობს და თუ რამე სამხილი გააჩნია ოპოზიციას, შეუძლია, მიიტანოს.

“ცოტა კლინიკურ შემთხვევასთან საქმე და არა რამე სამართლებრივ პროცესთან. აქედან გამომდინარე, არც საერთაშორისო რაიმე ორგანო არსებობს, არც რაიმე საერთაშორისო კონკრეტული რეზოლუცია ამასთან დაკავშირებით, არც რაიმე საერთაშორისო კანონმდებლობა და არც საქართველოს კანონმდებლობა არსებობს, ეს არის ახირების მორიგი ეტაპი. ის განცხადება, რომელიც ერთხელ გააკეთა ერთ-ერთმა უცხოელმა ჩინოვნიკმა, შეცვალა შემდეგ იმ ქვეყნის პრეზიდენტმა და ევროკავშირის საგარეო ურთიერთობათა მთავარმა კომისარმა. თქვეს, რომ სახელმწიფომ ჩაატაროს გამოძიება. რატომ?! – იმიტომ, რომ ერთია ემოციური განცხადება და მეორე, როდესაც შენ რაღაც საკითხის კონკრეტული სამართლებრივი განხილვა და შედეგის დადება გჭირდება. ამიტომ, მეორე დღესვე გააკეთა აშშ-ის პრეზიდენტის პირით გაკეთდა ეს განცხადება. ის, რაც ბუნებაში არ არსებობს, იქ ვერაფერს ვერ გამოიძიებ. ამიტომ ვამბობთ, რომ არის სიტყვების ბრახა-ბრუხი, ამ ბრახა-ბრუხზე ხომ არ შეიძლება სერიოზული პასუხები გავცეთ. შენ თუ რამე გაგაჩნდა, მიგეტანა, როგორც საჩივარი საარჩევნო კომისიაში, ვერ მიიტანე, იმიტომ, რომ არ გაგაჩნია. გამოძიებაც მიმდინარეობს პროკურატურაში, კარგი ენდობი, არ ენდობი მეორე თემაა, მიიტანე სამხილი. ხომ გამოჩნდება, ხალხი ხომ დაინახავს, სამხილი მიიტანა და გამოძიებამ არ გამოიძია, ან ვერ გამოიძია, მაგრამ მისატანი არ აქვთ არაფერი,” – განაცხადა ირაკლი ქადაგიშვილმა.

კოალიცია “ერთიანობა – ნაციონალურ მოძრაობაში” “ქართული ოცნების” ბრალდებებს უპასუხეს. როგორც კოალიციის წევრი აკაკი ბობოხიძე ამბობს, ნამდვილად იყო შემთხვევები, როდესაც მათ ეგონათ, რომ გარკვეული პირების მხრიდან დამკვირვებლად დარეგისტრირების შესახებ თანხმობა არსებობდა, თუმცა გვიან გაირკვა, რომ ეს ასე არ იყო.

“სამწუხაროდ, რამდენიმე შემთხვევა ისეთი აღმოჩნდა, რომ ჩვენ გვეგონა, თანხმობა არსებობდა, როცა მოგვაწოდეს მონაცემები და ბოლოს გაირკვა, ძალიან გვიან, რომ რამდენიმე ადამიანი, როგორც თვითონ ამბობს, არ იყო თანახმა, მონაწილეობა მიეღო როგორც დამკვირვებელს. ამ ადამიანების მონაცემები გადმოგვეცა სხვადასხვა წყაროდან, მათ შორის, პირველადი ორგანიზაციებიდან, არასამთავრობო ორგანიზაციებიდან. შეუძლებელია, 3000 ადამიანს პირადად გაესაუბრო. ყველაზე პრობლემური მაინც ის არის, რომ როცა კომისიის თავმჯდომარემ დაინახა, რომ კომისიის წევრი არ ესწრებოდა სხდომებს, მას წესით, ადმინისტრაციული გადაწყვეტილება უნდა მიეღო”, – აცხადებს აკაკი ბობოხიძე.

ოპოზიციაში “ქართული ოცნების” ბრალდებებს უპასუხეს. საპარლამენტო უმრავლესობის ლიდერის, მამუკა მდინარაძის მიერ ბრიფინგზე წარმოდგენილ მტკიცებულებებს კოალიცია “ერთიანობა – ნაციონალური მოძრაობის” წევრმა, პაატა მანჯგალაძემ “ფარსი” უწოდა.

“ფარსია ეს ყველაფერი, რადგან ტოტალური კონტროლი ჰქონდა დაწესებული “ქართულ ოცნებას”, არათუ ადამიანი სად იყო, სად ეძინა, ისიც კი იცოდნენ,” – აცხადებს მანჯგალაძე.

“აბსურდული” უწოდა ბრალდებებს კოალიცია “ერთიანობა – ნაციონალური მოძრაობის” წევრმა იაგო ნარმანიამაც.

“აბსურდულია ეს ბრალდებები ოპოზიციის მიმართ. ოპოზიციას აბრალებს არჩევნების გაყალბებას, ეს არის თავიდან ბოლომდე ტყუილი,” – აცხადებს ნარმანია.

შეგახსენებთ, რომ “ქართული ოცნება” 26 ოქტომბრის არჩევნების მიმდინარეობისას მათი მომხრეების მიმართ არსებულ დარღვევებზე საუბრობს. ამის შესახებ ბრიფინგზე საპარლამენტო უმრავლესობის ლიდერმა, მამუკა მდინარაძემ ისაუბრა და პროკურატურას საკითხით დაინტერესებისთვის მოუწოდა. პროკურატურაში უკვე შევიდა სარჩელი “ქართული ოცნების” სახელით.