რუსეთის პრეზიდენტი ოკუპირებული აფხაზეთის ე.წ. პრეზიდენტს 9 მაისს მოსკოვში იწვევს
აფხაზეთის დე ფაქტო ლიდერის პრესსამსახურმა გამოაქვეყნა დოკუმენტი, რომელიც ასლან ბჟანიას გადასცა სოხუმში “რუსეთის ელჩმა” მიხეილ შურგალინმა.
„ძვირფასო ასლან გიორგის ძევ, რუსეთის ფედერაციის პრეზიდენტმა ვლადიმირ ვლადიმირის ძე პუტინმა დამავალა, გადმოგცეთ მოწვევის ტექსტი დიდ სამამულო ომში გამარჯვების 80 წლისთავის აღსანიშნავ იმ ღონისძიებებზე დასასწრებად, რომლებიც გაიმართება 2025 წლის 9 მაისს. ორიგინალურ მოწვევას მოგვიანებით გადმოგცემთ, მას შემდეგ, რაც მას მოსკოვიდან მივიღებთ“, – ნათქვამია ასლან ბჟანიას ე.წ. პრესცენტრის მიერ გავრცელებულ წერილში.
დოკუმენტში მითითებულია თარიღი: 2024 წლის 18 ნოემბერი. შესაბამისად, წერილი შესაძლოა მიუთითებდეს ასლან ბჟანიას მხარდაჭერაზე როგორც ადგილობრივ ოპოზიციასთან დაპირისპირებაში, ასევე მოახლოებულ საპრეზიდენტო არჩევნებში.
ე.წ. საპრეზიდენტო არჩევნები აფხაზეთის დე ფაქტო რესპუბლიკაში 2025 წლის გაზაფხულზე უნდა გაიმართოს, თუმცა ასლან ბჟანიას გადადგომის შემთხვევაში, იგი შესაძლოა უფრო ადრეც ჩატარდეს. 15 ნოემბერს „რუსეთ-აფხაზეთის საინვესტიციო შეთანხმების“ რატიფიკაციის მოწინააღმდეგე დემონსტრანტების ნაწილმა სოხუმში ე.წ. სამთავრობო კვარტლის გარშემო არსებული ღობე მოარღვია, ტერიტორიაზე შეაღწია და დაიკავა ე.წ. პარლამენტისა და პრეზიდენტის ადმინისტრაციის შენობები.
17 ნოემბერს ადგილობრივი ოპოზიციის მომხრეებმა დაიწყეს დე ფაქტო მთავრობის მიერ რამდენიმე თვის წინ აღმართული ღობის დემონტაჟი.
აფხაზური ოპოზიცია დე ფაქტო ხელისუფლებას ორ ვარიანტს სთავაზობს:
ან „პრეზიდენტი, ვიცე-პრეზიდენტი და პრემიერი“ დატოვებენ თანამდებობებს და „პრეზიდენტის“ მოვალეობას შეასრულებს „პარლამენტის სპიკერი“ ლაშა აშუბა.
ან „პრეზიდენტი, ვიცე-პრეზიდენტი და პრემიერი“ გადადგებიან და მანამდე „პრეზიდენტი“ „პრემიერად“ დანიშნავს კომპრომისულ ფიგურას, რომელიც „პრეზიდენტის“ მოვალეობასაც შეასრულებს.
რუსეთსა და აფხაზეთს შორის ურთიერთობები რუსეთის ფედერაციის საგარეო პოლიტიკის პრიორიტეტია, – ამის შესახებ რუსეთის ფედერაციის პრეზიდენტის პრესმდივანმა დიმიტრი პესკოვმა ჟურნალისტებს განუცხადა, როდესაც მან უპასუხა შეკითხვას, როგორ აღიქვამს კრემლი აფხაზეთში არსებულ დაძაბულ ვითარებას.
„რუსეთ-აფხაზეთის ორმხრივი ურთიერთობები ჩვენი საგარეო პოლიტიკის ძალიან მნიშვნელოვანი პრიორიტეტია“, – აღნიშნა პესკოვმა.
შეგახსენებთ, ოკუპირებული აფხაზეთის ე.წ. ხელისუფლებასა და ოპოზიციას შორის დაპირისპირება რუსეთთან საინვესტიციო შეთანხმების გამო დაიწყო, რომელიც ოკუპირებულ აფხაზეთში ბინების მშენებლობას ითვალისწინებს. ე.წ. პარლამენტს „დოკუმენტის“ რატიფიცირება 15 ნოემბერს უნდა მოეხდინა, თუმცა პროტესტის დაწყების გამო საკითხის განხილვა გადადო. ოპოზიციის მხარდამჭერებმა სოხუმში ე.წ. სამთავრობო შენობები დაიკავეს, მათ შორის ე.წ. პრეზიდენტის ადმინისტრაცია და ასლან ბჟანიას გადადგომა მოითხოვეს.
ცნობისთვის, ოკუპირებულ აფხაზეთში განვითარებული ბოლოდროინდელი მოვლენების ფონზე, რუსეთის ფედერაციის პრეზიდენტის პრესმდივანმა დიმიტრი პესკოვმა განაცხადა, რომ „რუსეთსა და აფხაზეთს შორის ურთიერთობები რუსეთის ფედერაციის საგარეო პოლიტიკის პრიორიტეტია“
