ხვალ, პირველად დამოუკიდებელი საქართველოს ისტორიაში, საქართველოს პარლამენტი პრეზიდენტს აირჩევს
საკანონმდებლო ორგანოს სხდომათა დარბაზის კარი, ხვალ დილის 9 საათზე საქართველოს ახალი პრეზიდენტის ასარჩევად გაიღება. ზვიად გამსახურდიას სახელობის დარბაზში, ქვეყნის მთავარსარდალს, 5 წლის ვადით 300 დელეგატისგან შემდგარი საარჩევნო კომისია აირჩევს. ამ სისტემით საქართველოში არჩევნები პირველად ტარდება და ეს მოდელი გერმანული და ამერიკული საარჩევნო მოდელის მსგავსია. 300 კაციან კომისიაში კვოტები პროპორციულად არის გადანაწილებული – 211 წევრი “ქართულ ოცნებას” ჰყავს, 69 ოპოზიციას და 20 აფხაზეთის უმაღლეს საბჭოს.
პრეზიდენტის ასარჩევად საჭიროა 200 ხმა, კანდიდატი მხოლოდ მიხეილ ყაველაშვილია – საქართველოს ნაკრების ყოფილი წევრი, ვეტერანი ფეხბურთელი და ორი მოწვევის საკანონმდებლო ორგანოს დეპუტატი. “ქართული ოცნებაში” ამბობენ, რომ მიხეილ ყაველაშვილის მთავარი ამოცანა საკუთარი ხალხისა და სამშობლოს ინტერესების დაცვაა და დარწმუნებულები არიან, რომ მომავალი პრეზიდენტი ზეპარტიული ლიდერი იქნება.
300 კაცისგან შემდგარ საარჩევნო კომისიაში, საკუთარი კვოტა აქვს ოპოზიციასაც, თუმცა, ხელისუფლების ოპონენტები არჩევნებში მონაწილეობის მიღებას არ აპირებენ. ისინი მიხეილ ყაველაშვილის არჩევას საკანონმდებლო ორგანოს გარეთ, ქუჩაში გააპროტესტებენ. ოპოზიციაში წინასწარ ამბობენ იმასაც, რომ ახალ პრეზიდენტს ლეგიტიმაცია მათი მხრიდან არ ექნება.
ოპოზიციის განცხადებები სახელისუფლებო გუნდისთვის არასერიოზულია, სადაც დღეს კიდევ ერთხელ თქვეს ის არგუმენტები, რის გამოც პრეზიდენტის პოსტზე მიხეილ ყაველაშვილის კანდიდატურა დაასახელეს. მთავარი ”ქართულ ოცნების” თქმით პატრიოტიზმია. ყაველაშვილისგან პრეზიდენტის ინსტიტუციის მიმართ საზოგადოებაში ნდობის დაბრუნების მოლოდინი აქვს ხალხის ძალას, ყოფილი დეპუტატი სწორედ მათ ჯგუფში ირიცხებოდა.
საქართველოს პარლამენტის თავმჯდომარემ, შალვა პაპუაშვილმა საქართველოს პრეზიდენტის არჩევის პროცედურები განმარტა.
პაპუაშვილის თქმით, საქართველოს ისტორიაში პირველად, პრეზიდენტის არჩევნები ჩატარდება არაპირდაპირი გზით, რაც, მისივე განცხადებით, დაახლოებით ჰგავს პრეზიდენტის არჩევის ამერიკულ-გერმანულ წესს, როდესაც პრეზიდენტს ირჩევს საარჩევნო კოლეგია.
„კოლეგია შედგება 300 წევრისგან, რომლისგანაც 150 გახლავთ საქართველოს პარლამენტის წევრი, ხოლო დანარჩენი 150 კომპლექტდება შემდეგი პრინციპით – აჭარის უმაღლესი საბჭოს 21-ვე წევრი, აფხაზეთის უმაღლესი საბჭოს 20-ვე წევრი და 109 წევრი საკრებულოების წარმომადგენლები, რომლებიც წინა არჩევნების შედეგების პროპორციულად არის გადანაწილებული. კოლეგიის 300 წევრისგან, დღეის მოცემულობით, 211 წევრი ჰყავს „ქართულ ოცნებას“, 20 წევრი ჰყავს პარტია „ახალს“, 20 წევრი ჰყავს „ნაციონალურ მოძრაობას“, 15 წევრი ჰყავს „ლელოს“, 14 წევრი – გახარიას პარტიას. 20 წევრი არის აფხაზეთის უმაღლესი საბჭო. როგორც იცით, ვინაიდან არჩევნები აქ ტარდება, იქ პარტიული კუთვნილება არ არსებობს, ჩვენი დღევანდელი პოლიტიკური რეალობით რომ შევხედოთ. შესაბამისად, „ქართულ ოცნებას“ საარჩევნო კოლეგიაში 300 წევრიდან – 211 წევრი, ხოლო ოპოზიციას, ჯამურად, ჰყავს 69 წევრი და 20 წევრი არის აფხაზეთის უმაღლესი საბჭოდან.
რაც შეეხება „ქართული ოცნების“ შემადგენლობას, მე ვახსენე, რომ ამ 300 წევრიდან 109 წევრი არის საკრებულოებიდან, რომელიც კვოტების შესაბამისად გადანაწილდა ცესკო-ს მხრიდან. 109 წევრიდან 54 იყო „ქართული ოცნების“, 55 იყო სხვადასხვა ოპოზიციური პარტიის, რომლებმაც არ აითვისეს ეს კვოტები და არ წარმოადგინეს საკუთარი წარმომადგენლები საკრებულოებიდან და შემდეგ, კანონმდებლობის შესაბამისად, გადანაწილდა სხვა პარტიაზე. შესაბამისად, ამ შემთხვევაში „ქართულმა ოცნებამ“ აითვისა ეს კვოტები. თუმცა კიდევ ერთხელ, ხვალინდელ არჩევნებში საარჩევნო კოლეგიის 69 წევრი არის ოპოზიციიდან, მათ შორის საქართველოს პარლამენტის არჩეული ოპოზიციური წევრები.
ხვალ არჩევნები პარლამენტის სხდომათა დარბაზში იქნება 09:00-დან 14:00 საათამდე და არჩევნებს ჩაატარებს ცესკო, ცესკო წარმართავს პროცესს. დელეგატები მისცემენ ხმას. კენჭისყრა გახლავთ ღია, არ არის ფარული. 14:00 საათზე დასრულდება არჩევნები და შემდეგ უკვე ცესკო ჩაატარებს სხდომას. მთლიანად ეს პროცესი იქნება ტრანსლირებული ჩვენი არხის მეშვეობით და ასევე სოციალურ მედიაში ჩვენი ლაივსტრიმის მეშვეობით. ცესკო-ს სხდომაზე დაითვლება შედეგები და გამოცხადდება უკვე საბოლოო შედეგი კოლეგიის წინაშე“, – განაცხადა პაპუაშვილმა.
ამასთან, შალვა პაპუაშვილის თქმით, ხვალინდელ დღესთან დაკავშირებით მედიისთვის იქნება სპეციალური აკრედიტაცია.
„ასევე, მინდა გითხრათ, გამომდინარე იქედან, რომ ხვალ არ არის საპარლამენტო ღონისძიება, ხვალ უბრალოდ პარლამენტის შენობაში იმართება ეს პროცესი, იქნება მედიისთვისაც სპეციალური რეჟიმი იმ მხრივ, რომ არის ინტერესი, მათ შორის, უცხოური მედიის მხრიდან, რომ დაესწროს ამ ღონისძიებას. ამიტომ ხვალ იქნება სპეციალური აკრედიტაციით მედიის დაშვება. ყველა მედიას, ვისაც აქვს ინტერესი, დააკვირდეს პროცესს, ვთხოვ, საქართველოს პარლამენტის აპარატთან ჰქონდეთ კომუნიკაცია. ხვალისთვის სპეციალური საშვები დამზადდება, რათა გააშუქონ პრეზიდენტის არჩევის პროცესი. ანუ, არ იმოქმედებს ამ შემთხვევაში წლიური აკრედიტაცია. შესაბამისად, ყველას ვისაც ინტერესი აქვს, ქართულ თუ უცხოურ მედიას, შეუძლიათ, მომართონ პარლამენტს და პარლამენტი მიიღებს გადაწყვეტილებებს აკრედიტაციის გაცემასთან დაკავშირებით“, – განაცხადა შალვა პაპუაშვილმა.
საპრეზიდენტო არჩევნების პროცესს, ხვალ ცესკო წარმართავს. მას შემდეგ რაც დელეგატები კანდიდატს ხმას მისცემენ და არჩევნები დასრულდება, ცენტრალური საარჩევნო კომისია სხდომას ჩაატარებს, ბიულეტენებს დაითვლის და კომისიის წევრებს მათ მიერ არჩეულ ახალ პრეზიდენტს დაუსახელებს. მთლიანად პროცესი ღია იქნება, საზოგადოებას შესაძლებლობა აქვს პრეზიდენტის არჩევნების მიმდინარეობას ლაივ სტრიმის რეჟიმში დააკვირდეს.
“ქართულმა ოცნებამ” მიხეილ ყაველაშვილის კანდიდატურა პრეზიდენტის პოსტზე, 27 ნოემბერს დაასახელა. მისი ინაუგურაცია 29 დეკემბერს შედგება.
