უწყვეტი პროტესტის 67-ე დღე-„თბილისი მოლთან“ საპროტესტო აქციის მონაწილეები იკრიბებიან-ადგილზე პოილიციის მობილიზებაა
„Tbilisi Mall-თან“ საპროტესტო აქციის მონაწილეები იკრიბებიან.აქციის მონაწილეები მაგისტრალის გადაკეტვას გეგმავენ.
აქციის მონაწილეები ქვეყანაში ხელახალი არჩევნების ჩატარებას და საპროტესტო აქციებზე დაკავებულების გათავისუფლებას მოითხოვენ. აქციაზე იმყოფებიან ოპოზიციონერი პოლიტიკოსებიც. მიმდებარე ტერიტორიაზე მობილიზებული არიან პოლიციელები. სამართალდამცველები საავტომობილო გზის პერიმეტრზე არიან განლაგებული.
მათი მოთხოვნა უცვლელია: დაინიშნოს ხელახალი არჩევნები და გათავისუფლდნენ აქციების მიმდინარეობის დროს უკანონოდ დაკავებული ადამიანები.
აქციის მონაწილეები სკანდირებენ: „ცეცხლი ოლიგარქიას; არ იქნება სამართალი, არ იქნება მშვიდობა”.
აქციის მონაწილეები გეგმავენ, რომ მოგვიანებით, საქართველოს პარლამენტის შენობასთან გადაინაცვლონ, სადაც აქციებს 2 თვეზე მეტია მართავენ.
თბილისის გასავლელთან დაგეგმილ საპროტესტო აქციასთან დაკავშირებით შინაგან საქმეთა სამინისტრომ განცხადება გაავრცელა. უწყება აღნიშნავს, რომ საზოგადოებრივი უსაფრთხოებისა და მართლწესრიგის დაცვის მიზნით, თითოეულ ლოკაციაზე შინაგან საქმეთა სამინისტროს შესაბამისი დანაყოფების წარმომადგენლები არიან მობილიზებულნი. მათივე ცნობით, საერთაშორისო მნიშვნელობის საავტომობილო გზები წარმოადგენს სტრატეგიული ან/და განსაკუთრებული მნიშვნელობის ობიექტს. შესაბამისად, სისხლის სამართლის კოდექსის 222-ე მუხლის თანახმად, სტრატეგიული ან განსაკუთრებული მნიშვნელობის ობიექტის ბლოკირება დასჯადი ქმედებაა, რომელიც ითვალისწინებს პატიმრობას 2 წლამდე ვადით, ხოლო აღნიშნული ქმედების ჯგუფურად ჩადენა ითვალისწინებს თავისუფლების აღკვეთას 2-დან 4 წლამდე ვადით.
ადგილზე პოლიციის განსაკუთრებული მობილიზებაა.
შსს მოუწოდებს აქციის ორგანიზატორებს და მონაწილეებს, პროტესტი გამოხატონ კანონით დადგენილ ფარგლებში. წინააღმდეგ შემთხვევაში პოლიცია იმოქმედებს კანონის შესაბამისად.
თავისუფალი უნივერსიტეტის კამპუსის მიმდებარედ იკრიბებიან სტუდენტებიც. ისინი მარშით Tbilisi Mall-თან გადაინაცვლებენ და აქციის სხვა მონაწილეებს შეუერთდებიან.
