თბილისის საქალაქო სასამართლომ აქტივისტ თემურ ქათამაძეს საემიგრაციო პატიმრობა 6 თვემდე გაუხანგრძლივა
თბილისის საქალაქო სასამართლომ აქტივისტ თემურ ქათამაძეს საემიგრაციო პატიმრობა 6 თვემდე გაუხანგრძლივა. ამის შესახებ ჟურნალისტებს სასამართლოში საიას იურისტმა, ვერიკო ჯგერენაიამ განუცხადა, რომელიც თემურ ქათამაძის უფლებებს იცავს.
როგორც იურისტმა განმარტა, თბილისის საქალაქო სასამართლომ ქათამაძისთვის საემიგრაციო პატიმრობის ვადის გაგრძელების თაობაზე შსს-ს მიგრაციის დეპარტამენტის შუამდგომლობა დააკმაყოფილა, მიუხედავად იმისა, რომ შუამდგომლობა აბსოლუტურად დაუსაბუთებელი იყო და მისი დაკმაყოფილების არანაირი სამართლებრივი საფუძველი არ არსებობდა.
მისივე თქმით, თემურ ქათამაძესთან მიმართებით სასამართლოს მან ალტერნატიული ზომების გამოყენებას შესთავაზა, მათ შორის სამართალდამცავ ორგანოში კვირაში ორჯერ გამოცხადება ან გარკვეული თანხის გადახდის ვალდებულება, თუმცა სასამართლომ მაინც მიგრაციის დეპარტამენტს შუამდგომლობა დააკმაყოფილა და ამით თემურ ქათამაძის დაკავება გაახანგრძლივა. იურისტის განმარტებით, თემურ ქათამაძე მის პატიმრობას აქციებში აქტიურ ჩართულობას უკავშირებს.
ინფორმაციისათვის, აქტივისტი თემურ ქათამაძე ბათუმში პოლიციამ თავდაპირველად ადმინისტრაციული წესით დააკავა, თუმცა პატიმრობიდან გათავისუფლების შემდგომ ის კვლავ დააკავეს. მეორედ დაკავებისას პოლიცია თემურ ქათამაძეს საქართველოში ცხოვრების უფლების არქონას ედავება.
თემურ ქათამაძე ბათუმის პოლიციის სამმართველოსთან საპროტესტო აქციისას 11 იანვარს ადმინისტრაციული წესით დააკავეს და 5-დღიანი პატიმრობა შეუფარდეს. ის იზოლატორიდან გამოსვლისთანავე დააკავეს და ამ დრომდე შსს-ს მიგრაციის დროებითი განთავსების იზოლატორში იმყოფება. თემურ ქათამაძე ათ წელზე მეტია საქართველოში ცხოვრობს და მოქალაქეობის მინიჭებაზე არაერთხელ მიმართა საქართველოს ხელისუფლებას, თუმცა უარი მიიღო.
18 მატს, ოლიგარქის სასამართლომ თემურ ქათამაძეს ლტოლვილის სტატუსის მინიჭებაზე უარი უთხრა.
