რომის ახალი პაპი ამერიკელი კარდინალი პრევოსტი ლეონ XIV გახდა
კათოლიკურ ეკლესიის ახალი წინამძღოლი კარდინალი რობერტ პრევოსტი გახდა. პაპობაში ის ლეო მეთოთხმეტე იქნება – პირველი ამერიკელი პაპი რომის კათოლიკური ეკლესიის ისტორიაში.
69 წლის რობერტ პრევოსტი ჩიკაგოში დაიბადა, ის პერუში მსახურობდა ეპისკოპოსად 2023 წლამდე, როდესაც ის პაპმა ფრანცისკემ კარდინალად აკუთხა. 2025 წლის თებერვალში რომის პაპმა ის კარდინალ ეპისკოპოსად დააწინაურა და რომის პროვინციაში, ალბანოს ეპარქიაში განაწესა.
8 მაისს სიქსტეს კაპელის საკვამურიდან ამოსულმა თეთრმა კვამლმა აჩვენა, რომ 133 კარდინალისაგან შემდგარმა კოლეგიის ორმა მესამედმა მაინც მხარი ერთ კანდიდატს დაუჭირა და რომის 267-ე პაპის ვინაობა განსაზღვრა.
რა ვიცით მის შესახებ:
მსოფლიო გამოცდილების მქონე ლიდერმა კარიერის დიდი ნაწილი სამხრეთ ამერიკაში მისიონერად გაატარა და ბოლოს ვატიკანის ეპისკოპოსთა დიკასტერიის (საეკლესიო მმართველობის ორგანო, რომელიც სასამართლოს ფუნქციებს ახორციელებდა) პრეფექტად დაინიშნა. მოსალოდნელია, რომ ის პაპ ფრანცისკეს რეფორმებს გააგრძელებს.
ის ათწლეულის განმავლობაში მუშაობდა პერუს ტრუხილიოში, ხოლო მოგვიანებით დაინიშნა ჩიკლაიოს ეპისკოპოსად, რომელიც პერუს კიდევ ერთი ქალაქია, სადაც 2014 წლიდან 2023 წლამდე მსახურობდა. პრევოსტს ასევე აქვს პერუს პასპორტი და 2015 წლიდან პერუს მოქალაქეა.
ეპისკოპოსთა დიკასტერიის ლიდერად დანიშვნის შემდეგ, Vatican News-თან ინტერვიუში პრევოსტმა განაცხადა: “მე კვლავ მისიონერად მივიჩნევ თავს. ჩემი მოწოდებაა, ისევე როგორც ყველა ქრისტიანის, მისიონერი ვიყო, სახარება ვაქადაგო ყველგან, სადაც კი ადამიანი იმყოფება”.
კონკლავი 7 მაისს შეიკრიბა. პირველი კენჭისყრა იმავე დღეს ჩატარდა – კვამლი შავი იყო.
კონკლავმა პაპი მეოთხე სესიაზე აირჩია.
რომის პაპი ფრანცისკე 21 აპრილს 88 წლის ასაკში გარდაიცვალა. ვატიკანის ჯანდაცვის სამსახურის ხელმძღვანელის დასკვნით, პაპი ფრანცისკე გარდაიცვალა ინსულტით, რომელსაც გულ-სისხლძარღვთა სისტემის კოლაფსი მოჰყვა. რომის პაპის ჯანმრთელობის მდგომარეობა გაუარესებული იყო ორმხრივი პნევმონიის, ჰიპერტონიისა და მეორე ტიპის დიაბეტის გამო.
რომის პაპი ფრანცისკე სანტა მარია მაჯორეს ბაზილიკაში დაკრძალეს. დაკრძალვის ცერემონიას მსოფლიოს არაერთი ლიდერი და, იტალიის ხელისუფლების თანახმად, 400 000-მდე ადამიანი დაესწრო.
