აშშ-მა ბინ ლადენის ვაჟის წინააღმდეგ სანქციები დააწესა [Photo/Video]
![](https://heretifm.com/wp-content/uploads/2017/01/4e33fe3b685b2a3bee9d17d8170e2e76.jpeg)
აშშ-ის ხელისუფლებამ დაჯგუფება „ალ-ქაიდას“ ყოფილი ლიდერის, უსამა ბინ ლადენის ვაჟი – ხამზა ბინ ლადენი ტერორისტთა შავ სიაში შეიყვანა. ეს იმას ნიშნავს, რომ აშშ-ის მოქალაქეებს მასთან კავშირი ეკრძალებათ, ხოლო ქვეყნის ტერიტორიაზე მის სახელზე გახსნილი საბანკო ანგარიშები უნდა გაიყინოს. ინფორმაციას აშშ-ის სახელმწიფო დეპარტამენტი ავრცელებს.
სიაში, რომელიც აშშ-ის სახელმწიფო დეპარტამენტმა შეადგინა, ხამზა ბინ ლადენი მოხსენიებულია, როგორც განსაკუთრებულად საშიში საერთაშორისო ტერორისტი.
შავ სიაში ასევე მოხვდა არაბეთის ნახევარკუნძულზე „ალ-ქაიდას“ ერთ-ერთი ლიდერი, იბრაჰიმ ალ-ბანა.
ამერიკული სპეცსამსახურები ამტკიცებენ, რომ ხამზა ბინ ლადენი მამამისის სიკვდილის შემდეგ „ალ-ქაიდას“ აქტიური პროპაგანდისტი გახდა. როგორც უკვე ცნობილია, უსამა ბინ ლადენი, აშშ-ის სპეცსამსახურების მიერ ჩატარებული ოპერაციის შედეგად, პაკისტანში, 2011 წლის მაისში დაიღუპა.
ბინ ლადენის სახლში ჩატარებული ჩხრეკის დროს ნაპოვნი იყო წერილები, სადაც ხამზა „ალ-ქაიდას“ ხელმძღვანელს მის მემკვიდრედ დანიშვნას სთხოვს.
აშშ-ის სპეცსამსახურების მონაცემებით, უსამა ბინ ლადენი შვილისთვის „ალ-ქაიდას“ მმართველობის გადაცემას აპირებდა, თუმცა წერილის დაწერამდე (2009 წ.) მათ 8 წელი ერთმანეთი თვალითაც არ უნახვათ.
აღსანიშნავია, რომ უსამა ბინ ლადენის სიკვდილის შემდეგ დაჯგუფების ლიდერი ეგვიპტელი აიმან ალ-ზავაჰირი გახდა.