დიტო ხელხელაურის ოჯახი პოლონეთის მთავრობისგან ცხედრის გადაცემას ითხოვს
პოლონეთში გარდაცვლილი ახალგაზრდის ცხედარი ოჯახისთვის ჯერ კიდევ არ გადაუციათ – ახლობლები ეჭვობენ, რომ სამართალდამცავებს მკვლელობის დამალვა სურთ. პოლონეთში გარდაცვლილი 26 წლის დიტო ხალხელაურის ცხედარი, კვლავ პროზექტურაშია და ოჯახს მის გადაცემაზე, უარს ეუბნებიან.
ახალგაზრდა მამაკაცის მეგობრის, მარიამ ოქროცვარიძის განმარტებით, ოჯახი იმაშიც არ არის დარწმუნებული, რომ ნაპოვნი მამაკაცის ცხედარი, ნამდვილად დიტო ხალხელაურს ეკუთვნის.
” თვეზე მეტია, ცხედარი მორგში ასვენია და ისიც კი არ ვიცით, ნამდვილად დიტოა გარდაცვლილი, თუ – არა. ამოცნობაზე არავინ ყოფილა. სათვალთვალო კამერაში ჩანს, რომ მდინარეში ვიღაც გადახტა, მაგრამ ზუსტად არავინ იცის, ვინ არის. იმ დღისით, ხუთი გადახტომაა დაფიქსირებული. დიტოს სახლიდან ნივთებია დაკარგული, მათ შორის ჩანთა. არც ექსპერტიზის დასკვნაა ცნობილი. ახლა აგვისტოსთვის გადადეს. ადვოკატიც კი არ გვაძლევს სრულ ინფორმაციას. არც საგარეო საქმეთა სამინისტრო და არც საელჩო, არაფერს გვეუბნება. ეჭვი გვაქვს, ის მოკლეს და ახლა პოლონეთში კვალის წაშლას ცდილობენ. ცხედარი მაინც რომ გადმოეცათ, ამდენი ეჭვი არ გვექნებოდა”- განაცხადა ოქროცვარიძემ.
თელავის მუნიციპალიტეტის სოფელ კონდოლის მკვიდრი, დიტო ხალხელაური, ქალაქ ვარშავაში, 11 ივნისს გაუჩინარდა.
მდინარეში მისი ცხედრის პოვნის შესახებ ინფორმაცია,19 ივნისს გავრცელდა.
ოჯახმა ადვოკატის დაქირავება, საზოგადოების მხარდაჭერით მოახერხა.
