საომარი მოქმედებების გასაგრძელებლად რუსეთი განსაკუთრებულ იმედს ამყარებს ვეტერანებსა და სოფლების მოსახლეობაზე

კრემლმა უარი თქვა საგაზაფხულო შეტევის გაგრძელებაზე მას შემდეგ, რაც ვერ მიაღწია მნიშვნელოვან წინსვლას და ახლა ცდილობს მომზადებული დახვდეს უკრაინის არმიის კონტრშეტევას, რომელიც სავარაუდოდ მალე დაიწყება, – ამის შესახებ წერს სააგენტო Bloomberg-ი.

სააგენტოს მიხედვით, ხანგრძლივ დაპირისპირებაში ჩართული კრემლი მიმდინარე წელს შეეცდება 400 000-მდე საკონტრაქტო ჯარისკაცის გადაბირებას. რათა ჯარის რიგები შეავსოს – ამის შესახებ როგორც Bloomberg წერს, იტყობინებიან რუსების გეგმის მცოდნე ადამიანები, რომლებმაც ანონიმურობის დაცვის პირობით ისაუბრეს.
სააგენტოს წყაროს ცნობით, რეკრუტირების ფართომასშტაბიანი კამპანია საშუალებას მისცემს კრემლს თავიდან აიცილოს მორიგი მობილიზაცია 2024 წლისთვის დანიშნული პრეზიდენტის არჩევნების წინ.
სტატიაში ასევე ნათქვამია, რომ კრემლი წუხს, რომ ახალი მობილიზაცია პოლიტიკურად არაპოპულარული იქნება.
2022 წლის სექტემბერში გამოცხადებულმა მობილიზაციამ, Bloomberg-ის ცნობით, შეარყია ხელისუფლების ნდობა და გამოიწვია ქვეყნიდან „დაახლოებით მილიონი რუსის“ გაქცევა.

ვლადიმირ პუტინი ფსონს დებს გაჭიანურებულ ომზე. მისი ვარაუდით, თუ რუსი სამხედროები უახლოეს მომავალში შეძლებენ თავიდან აიცილონ უკრაინის შეიარაღებული ძალების კიდევ ერთი გარღვევა, ეს შეასუსტებს კიევისადმი დასავლეთის მხარდაჭერას, ნათქვამია სააგენტოს მასალაში.

Bloomberg-ი აღნიშნავს, რომ რუსეთის არმიამ თავისი შეთხელებული რიგების შესავსებად დაიწყო ფართო კამპანია, რომლის მიზანი მომავალ ჯარისკაცებთან გრძელვადიანი კონტრაქტების გაფორმებაა. რეგიონების ოფიციალურმა პირებმა ასევე მიიღეს გასაწვევთა კვოტები. რუსეთის ხელისუფლება განსაკუთრებულ იმედს ამყარებს საომარი მოქმედებების ვეტერანებსა და სოფლების მოსახლეობაზე.

ცნობისთვის, ნატოს გენერალურმა მდივანმა Guardian-თან ინტერვიუში თქვა, რომ “პუტინი არ გეგმავს მშვიდობას, დასავლეთი უნდა მოემზადოს გაჭიანურებული ომისთვის”