ისრაელის თავდაცვის ძალებმა ღაზაში 450 სამხედრო ობიექტი გაანადგურეს
ისრაელის თავდაცვის ძალების ცნობით, გასული დღე-ღამის განმავლობაში, ღაზის სექტორში, ისრაელის სამხედრო თვითმფრინავებმა ჰამასის 450 ობიექტს დაარტყეს.
Times of Israel-ი სამხედრო ხელმძღვანელობაზე დაყრდნობით წერს, რომ სამიზნეს წარმოადგენდა ჰამასის სამეთაურო ცენტრები, სამეთვალყურეო ცენტრები და პოზიციები, საიდანაც მოწინააღმდეგე ტანკსაწინააღმდეგო მართვად რაკეტებს უშვებს.
“ისრაელის სახმელეთო ჯარებმა ჰამასის ტერორისტულ რაზმებს დაარტყეს, რომლებიც სარაკეტო თავდასხმებს ამზადებდნენ”, – ნათქვამია ისრაელის თავდაცვის ძალების განცხადებაში.
ცნობილი გახდა, რომ ისრაელმა გააფართოვა სახმელეთო ოპერაცია ღაზის სექტორში და დამატებითი ძალა შეიყვანა. ისრაელის მედიის თანახმად, სახმელეთო შენაერთების სამიზნეს ტერორისტული დაჯგუფების განადგურება წარმოადგენს და ისინი ამ ამოცანის შესასრულებლად, კოორდინირებულად მიიწევენ წინ სიღრმისკენ.
ისრაელის სამხედრო სარდლობა მოუწოდებს ღაზის სექტორის ჩრდილოეთ ნაწილისა და ქალაქ ღაზის მოსახლეობას, რომ გადაადგილდნენ სამხრეთით, შედარებით უსაფრთხო ზონაში, სადაც მათ შეუძლიათ მიიღონ ჰუმანიტარული დახმარება. ისრაელი აცხადებს, რომ ჰამასი მშვიდობიან ადამიანებს “ცოცხალ ფარად” იყენებს.
ირანის პრეზიდენტმა, ებრაჰიმ რაისიმ X-ზე (ყოფილი ტვიტერი) დაწერა, რომ ისრაელმა ისრაელმა, თავისი ქმედებებით, „წითელი ხაზი გადალახა”, რასაც შესაძლოა საპასუხო ნაბიჯები მოჰყვეს. ირანის პრეზიდენტი ასევე წერს, რომ აშშ „აგრძელებენ ისრაელის ფართოდ დახმარებას “, მაგრამ „წინააღმდეგობის ღერძი“ მათ “ბრძოლის ველზე მკაფიოდ პასუხობს”. აქ იგულისხმება იმ რადიკალური ძალების წინააღმდეგობა, რომლებსაც ახლო აღმოსავლეთში ირანი მფარველობს. მათ შორის არის ჰამასიც.
უფრო ფართო რეგიონალური კონფლიქტის თავიდან ასაშორებლად, აშშ-მა მოუწოდა ირანს, არ ჩაერიოს ომში.
პალესტინელთა რადიკალური მოძრაობა ჰამას“ ისრაელმა ომი მას შემდეგ გამოუცხადა, რაც 7 ოქტომბერს, ჰამასმა ისრაელის ქალაქებზე მასირებული სარაკეტო შეტევა მიიტანა, ხოლო შეიარაღებული ჯგუფები ისრაელის სამხრეთში მდებარე დასახლებებში შეიჭრნენ – ასეულობით ადამიანი დახოცეს და მძევლად აიყვანეს. ცნობების თანახმად, იმ დღეს ისრაელში 1400-ზე მეტი ადამიანი დაიღუპა. ჰამასმა ასეულობით ადამიანი მძევლად აიყვანა და ღაზის სექტორში გადაიყვანა. ისრაელის მხარის ინფორმაციით, მათ შორს 30 ბავშვია.
ამასთან ისრაელის ქალაქებზე თავდასხმის პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.
გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია “ალ-აკსას წარღვნა” უწოდა და პალესტინელებს შეერთებისკენ მოუწოდა.
ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს – მათ სამხედროების მობილიზება დაიწყეს და “საომარი მდგომარეობის” შესახებ გაფრთხილება გამოაცხადეს.
ისრაელის პრემიერმინისტრმა, ბენიამინ ნეთანიაჰუმ ამას ომი უწოდა – მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.
