ნინო მიქიაშვილი: საგარეჯოში ჩემზე მანქანის დაჯახება სცადეს [Audio]

ჟურნალისტი ნინო მიქიაშვილი რადიო „ჰერეთს“ ეუბნება, რომ საგარეჯოში მასზე ავტომანქანის დაჯახება სცადეს. ჟურნალისტის თქმით, შემთხვევა N 6-ე საარჩევნო უბანთან მოხდა.

მიქიაშვილის განცხადებით, საარჩევნო უბნის მიმდებარე ტერიტორიაზე რამდენიმე ადამიანთან გასაუბრება სცადა, თუმცა მათ სახეები დამალეს და ტერიტორიის დატოვება სცადეს, ხოლო მას შემდეგ რაც ჟურნალისტი მათ უკან გაჰყვა და ჰკითხა, თუ რატომ მალავდნენ სახეებს, მისი მისამართით ერთ-ერთმა მძღოლმა მანქანის დაჯახება სცადა.

მიქიაშვილი ადგილობრივ მოსახლეობაზე დაყრდნობით ამბობს, რომ აღნიშნული პირები “ქართული ოცნების” კანდიდატის მხარდამჭერები იყვნენ.
ნინო მიქიაშვილი, ამბობს, რომ “ამ ყველაფერს ხედავდა პოლიციაც, თუმცა მათგან რეაგირება არ ყოფილა”.

მომხდარს პროვოკაციას უწოდებენ კოალიცია “ქართული ოცნების” საარჩევნო შტაბში. როგორც რადიო “ჰერეთს” “ქართული ოცნების” საგარეჯოს საარჩევნო შტაბის ხელმძღვანელმა გიგლა აგულაშვილმა განუცხადა, “სოციალურ ქსელებში ინფორმაციის გავრცელების მაგივრად ნებისმიერ დაზარალბულს, თუ ასეთი არსებობს, შეუძლია მიმართოს პოლიციას”.

ჟურნალისტი ნინო მიქიაშვილი კი ამბობს, რომ “არსებობს შემთხვევის ამსახველი ვიდეომასალა”.

მსგავსი პოსტები

Back to top button