ფრონტის ხაზი ძალიან ფართოა და გადის 2 500 კილომეტრზე უკრაინის ტერიტორიაზე
პუტინი დონბასში შექმნილ ვითარებაში კიევს ადანაშაულებს
ფრონტის ხაზი ძალიან ფართოა და გადის 2 500 კილომეტრზე უკრაინის ტერიტორიაზე, აქედან 1 300 კილომეტრზე აქტიური საომარი მოქმედებები გრძელდება, – ამის შესახებ უკრაინის თავდაცვის მინისტრის მოადგილემ, ანა მალიარმა განაცხადა.
უკრაინის თავდაცვის უწყების ინფორმაციით, ფრონტზე მოვლენები გეგმის მიხედვით ვითარდება და ქვეყნის სამხედროები ცალკეულ მიმართულებებზე წარმატებას აღწევენ.
უკრაინული მედია წერს, რომ ხერსონის მიმართულებაზე რუსეთის არმიის 83-ე სადესანტო-მოიერიშე ბრიგადამ საცეცხლე ძალის 40 და ცოცხალი ძალის 30 პროცენტი დაკარგა და დნეპრის მარცხენა ნაპირზე გადავიდა.
რუსეთის საოკუპაციო ძალებს უკრაინულმა ავიაციამ 12 დარტყმა მიაყენა, რომლებიც მიზნად ისახავდა ცოცხალი ძალის, სამხედრო და სპეცტექნიკის, ასევე მტრის სამხედრო ობიექტების განადურებას.
უკრაინის არმიის გენშტაბის ინფორმაციით, გასული დღის განმავლობაში რუსეთის საოკუპაციო ძალებმა 14 სარაკეტო და 15-ზე მეტი საავიაციო დარტყმა განახორციელა უკრაინის ტერიტორიაზე სამხედრო და სამოქალაქო ობიექტებზე. ვრცელდება ინფორმაცია ხარკოვისა და სუმის რეგიონების დაბომბვის შესახებ.
ამასთან უკრაინის შეიარაღებული ძალების გენერალური შტაბის მიერ დღეს დილით გამოქვეყნებული ინფორმაციით, გასულ 24 საათში, რუსულმა ძალებმა უკრაინის ტერიტორიაზე, სამხედრო და სამოქალაქო ობიექტებზე განახორციელეს 25 სარაკეტო და 22-ზე მეტი საავიაციო დარტყმა. გენერალური შტაბის თანახმად, მოწინააღმდეგე განაგრძობს ძალისხმევის კონცენტრირებას, რათა სრული კონტროლი დაამყაროს დონეცკის ოლქზე და შეინარჩუნოს ხერსონის, ხარკოვის, ზაპოროჟიეს და ნიკოლაევის ოლქებში დაპყრობილი რაიონები.
სარდლობის ცნობითვე, უკრაინელი სამხედროების მიერ ხერსონის ოლქში, მოწინააღმდეგის თავმოყრის რაიონებზე ინტენსიური შეტევის შემდეგ, რუსებმა სრულად აკრძალეს ადგილობრივ მცხოვრებთა გადაადგილება – კერძოდ, მდინარე დნეპრზე გადასვლა როგორც ხიდებით, ისე მცურავი საშუალებებით და დამრღვევებს დამიზნებით სროლით ემუქრებიან.უკრაინის არმია ივლისის ბოლოდან აწარმოებს კონტრშეტევას ხერსონის ოლქში, რომელიც რუსმა სამხედროებმა 2022 წლის მარტში დაიკავეს.
გარდა ამისა ვლადიმერ პუტინი დონბასში შექმნილ ვითარებაში კიევს ადანაშაულებს. რუსული მედიის ცნობით, აღნიშნულის შესახებ რუსეთის პრეზიდენტმა ეკოლოგიურ ფორუმზე საუბრისას განაცხადა.
„ტრაგედია, რომელიც ახლა დონბასში ხდება, ნაციონალისტური, ნეო-ნაცისტური რეჟიმის საქმიანობის შედეგია, რომელმაც 2014 წელს ძალაუფლება ძალის გამოყენებით ჩაიგდო და შემდეგ დაიწყო საომარი მოქმედებები დონბასში. ორჯერ ჩატარდა მსხვილი სამხედრო ოპერაცია არტილერიის, ავიაციის, მძიმე ტექნიკის გამოყენებით და ა.შ. და ეს ყველაფერი ამ დრომდე მიმდინარეობს“, – განაცხადა პუტინმა.
მან აღნიშნა, რომ „რუსეთის მოვალეობა დონბასის მაცხოვრებლებისთვის დახმარების გაწევაა“.
„ჩვენი მოვალეობაა, დავეხმაროთ ამ ხალხს და რუსეთი ამას აკეთებს. ჩვენი ყველა მცდელობა ამ პრობლემის მშვიდობიანი გზით გადასაჭრელად ჩაიშალა კიევის რეჟიმის პოზიციების გამო“, – განაცხადა რუსეთის პრეზიდენტმა.
