პრეზიდენტის მიმართ ნდობა განულებულია-ზურაბიშვილის ევროპული ტურნე ოცნებამ გააკრიტიკა
აღნიშნული ვიზიტები არ ხორციელდება მთავრობასთან შეთანხმებით და ვიზიტების ორგანიზებაში საელჩოები ჩართულნი არ არიან
მთავრობის უარის მიუხედავად, სალომე ზურაბიშვილი გერმანიაში გაემგზავრა. როგორც პრეზიდენტის ადმინისტრაციის მიერ გავრცელებულ ინფორმაციაში ვკითხულობთ, ზურაბიშვილი შეხვედრას ბერლინში, გერმანიის პრეზიდენტთან გამართავს. მთავრობის ცნობით, პრეზიდენტს ათ ქვეყანაში ვიზიტზე ეთქვა უარი.
აქვე, აღმასრულებელმა ხელისუფლებამ სალომე ზურაბიშვილს შეახსენა უფლებამოსილებები და ის, რომ კონსტიტუციით პრეზიდენტი მხოლოდ მთავრობის თანხმობით ახორციელებს წარმომადგენლობით უფლებამოსილებებს საგარეო ურთიერთობებში.
საგარეო საქმეთა სამინისტროში აცხადებენ, რომ ევროპაში სალომე ზურაბიშვილის ვიზიტების ორგანიზებაში საელჩოები ჩართულნი არ არიან.
“გამომდინარე იქიდან რომ აღნიშნული ვიზიტები არ ხორციელდება მთავრობასთან კოორდინაციით , საქართველოს საელჩოები საზღვარგარეთ არ არიან ჩართულნი ვიზიტების საორგანიზაციო და ლოჯისტიკურ საკითხებში”, – განუცხადეს მედიას
პრეზიდენტის მიმართ ნდობა პრაქტიკულად განულებულია. როცა იწყალებ ადამიანს, რომელიც იბრძვის, ქვეყანამ სტატუსი არ მიიღოს, ამ დროს არავინ დაიჯერებს, რომ სტატუსი გინდა და ამიტომ გსურს ვიზიტები. მთავრობა ანგარიშვალდებულია საზოგადოებასთან და მას ასეთ ვიზიტებზე ვერ დათანხმდებოდა, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.
მისივე თქმით, პრეზიდენტი პატივს არ სცემს არა მხოლოდ ქართულ საზოგადოებას, არამედ კონსტიტუციას.
„საქართველოს იმ პრეზიდენტზე ვსაუბრობთ, რომელმაც ხელისუფლების, საზოგადოებისა და მისი ამომრჩევლების წინააღმდეგ გაცხადებულად გაილაშქრა და შეურაცხყოფაც მიაყენა იმ საზოგადოებას, რომელიც მასთან ადმინისტრაციაში მივიდა. მას, როგორც პრეზიდენტს, პრობლემა არ აქვს, როცა მისი ქვეყნის წინააღმდეგ ევროპარლამენტარი თუ უცხოეთიდან ნებისმიერი სხვა თანამდებობის პირი არასამართლიან, შეურაცხმყოფელ განცხადებას გააკეთებს. მისი მხრიდან ერთი განცხადება არ გვახსოვს, სადაც დიპლომატიურად მაინც გასცემდა პასუხს ევროპარლამენტარებს, ყოფილ თუ მოქმედ ელჩებს და ასე შემდეგ. მთავრობას ვისთვის უნდა დაეჯერებინა, პრეზიდენტისთვის, რომელმაც გვარამია შეიწყალა, რომელიც იბრძვის, ქვეყანამ კანდიდატის სტატუსი არ მიიღოს თუ პრეზიდენტის თხოვნისთვის, რომელიც ამბობს, რომ ევროკავშირის არაწევრ ქვეყნებში მიდის, რათა სტატუსზე ისაუბროს? მისი მხრიდან ეს არადამაჯერებელია და პრეზიდენტის მიმართ ნდობა პრაქტიკულად განულებულია. მთავრობა ანგარიშვალდებულია საზოგადოებასთან და მას ასეთ ვიზიტებზე ვერ დათანხმდებოდა.
სამწუხაროდ, პრეზიდენტი არ დადგა ქართველი ხალხისა და სახელმწიფოს მხარეს. გარკვეული უცხოური ძალების მხარეს აღმოჩნდა, რომელთა გაცხადებული მიზანია საქართველოში მეორე ფრონტი, არეულობა და ხელისუფლების უკანონო შეცვლა. ეს არის სამწუხარო მოცემულობა და რეალობა. ტყუილს მოკლე ფეხები აქვს – როცა იწყალებ ადამიანს, რომელიც იბრძვის, ქვეყანამ სტატუსი არ მიიღოს და ამ დროს ამბობ, ვითომ სტატუსი გინდა და ამიტომ გსურს ვიზიტები, ბუნებრივია, ამას არავინ დაიჯერებს. სამწუხაროდ, პრეზიდენტის სანდოობის ხარისხი იმ დონეზეა დაწეული, რომ უარი მიიღო. მან არ ახსნა გვარამიას შეწყალება, ეს ადამიანი პოლარიზაციის სიმბოლოა და ვითომ დეპოლარაზაციის საბაბით შეიწყალა. მას შეწყალების უფლება მემკვიდრეობით კი არ აქვს მიღებული, ანგარიშვალდებულია ხალხის წინაშე და ნება იბოძოს, ქართველ ხალხს უთხრას, რატომ შეიწყალა პოლარიზაციის სიმბოლო გვარამია, რომელიც ახლა იბრძვის, ქვეყანამ სტატუსი არ მიიღოს. პრეზიდენტი პატივს არ სცემს არა მხოლოდ ქართულ საზოგადოებას, არამედ კონსტიტუციას. ვინაიდან მან გადაწყვიტა, რომ პირადი ვიზიტი მაინც განახორციელოს, უცხოელ კოლეგებს უნდა მივმართოთ, იცოდნენ, რომ ეს არის საქართველოს მოქალაქის ჩვეულებრივი ვიზიტი, რისი უფლებაც მას ექნება მას შემდეგაც, როცა პრეზიდენტი აღარ იქნება. მას არც სამართლებრივად და არც პოლიტიკურად არ აქვს უფლება, ოფიციალურად პოლიტიკური მოლაპარაკებები აწარმოოს. მას, როგორც მოქალაქეს, უფლება აქვს, უცხოეთში ჩავიდეს და ნებისმიერ დიპლომატს თუ პოლიტიკოსს შეხვდეს, მაგრამ ამის არც ლეგიტიმაცია და არც სამართლებრივი მხარდაჭერა არ ექნება“, – განაცხადა გურამ მაჭარაშვილმა.
ფრაქცია „ქართული ოცნების“ თავმჯდომარის, მამუკა მდინარაძის თქმით, ევროკავშირის კრიტერიუმების მიხედვით, ყველა მნიშვნელოვან სფეროში საქართველო წამყვან პოზიციას იკავებს, პრეზიდენტი კი ცდილობს, კანდიდატის სტატუსთან დაკავშირებით თავისი ქვეყნის საწინააღმდეგო გადაწყვეტილება გაამართლოს.
როგორც მდინარაძე სოციალურ ქსელში წერს, სალომე ზურაბიშვილი იმ პოლიტიკოსთა რიტორიკას იმეორებს, რომლებიც ყველაფერს აკეთებენ სტატუსის მიღების საწინააღმდეგოდ. მამუკა მდინარაძე ფიქრობს, რომ სალომე ზურაბიშვილი მიზანმიმართულად არღვევს ქვეყნის კონსტიტუციას.
„სწორია, სტატუსი რომ არ მოგვცესო – ამბობს საქართველოს პრეზიდენტი!
მას თავგამოდებით იცავენ ომის პარტიის ქართველი წარმომადგენლები, მათი ტელემედიები და სვამენ კითხვას, მთავრობამ რატომ არ მისცა თანხმობა პრეზიდენტს, კანდიდატის სტატუსზე თავისი პოზიცია ახლა უკვე ევროპაში, საქართველოს სახელით გაეხმოვანებინა!
მაშინ, როდესაც, თავად ევროკავშირის კრიტერიუმების მიხედვით, ყველა მნიშვნელოვან სფეროში საქართველო წამყვან პოზიციას იკავებს, პრეზიდენტი ცდილობს, გაამართლოს თავისი ქვეყნის საწინააღმდეგო გადაწყვეტილება!
ის იმ პოლიტიკოსების რიტორიკას იმეორებს, რომლებიც ყველაფერს აკეთებენ სტატუსის მიღების საწინააღმდეგოდ და ქართველი ხალხის არჩევანის პრორუსულად მოსანათლად!
ამ ყველაფერთან ერთად, პრეზიდენტი უხეშად, უდავოდ და მიზანმიმართულად არღვევს საკუთარი ქვეყნის კონსტიტუციას!
ამ და სხვა წინაღობების, ანტიქართული და ფსევდოდასავლური მავნებლობების მიუხედავად, საქართველო გააგრძელებს ევროპული ოჯახის სრულფასოვანი და ღირსეული წევრობისკენ სვლას!“ – წერს მამუკა მდინარაძე.
პრეზიდენტი საკონსტიტუციო ჩარჩოებს უნდა დაუბრუნდეს, რადგან ის არის კონსტიტუციის გარანტი და მას პირველი თავად არღვევს. პრეზიდენტი საგარეო ურთიერთობებში თავის უფლებამოსილებას მხოლოდ საქართველოს მთავრობის თანხმობით ახორციელებს, – ამის შესახებ პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა განაცხადა.
მისივე თქმით, სალომე ზურაბიშვილს არ გააჩნია ინტერესი, მთავრობის პოლიტიკის თანაზიარი იყოს და დამოუკიდებელი საგარეო პოლიტიკის წარმოების ამბიცია აქვს.
„პრეზიდენტი მიიჩნევს, რომ მას კონსტიტუცია არ ეხება, უფლება აქვს, კონსტიტუცია უხეშად დაარღვიოს და ამას იმით ამართლებს, რომ რაღაც დიადი მიზნები აქვს. ამ დამოკიდებულების გამო ეჭვი ჩნდება, რომ პრეზიდენტი ამ ყველაფერს აკეთებს, რათა რაღაც პოლიტიკა აწარმოოს, რომელიც შეთანხმებული არ არის მთავრობასთან. საქართველოს კონსტიტუციით მკაფიოდ არის განსაზღვრული, რა უფლებამოსილება აქვს პრეზიდენტს. პრეზიდენტი საგარეო ურთიერთობებში მხოლოდ საქართველოს მთავრობის თანხმობით ახორციელებს თავის უფლებამოსილებას, მაგრამ პრეზიდენტს ჰგონია, რომ დამოუკიდებლად უნდა მოიფიქროს რაღაც ვიზიტები და შემდეგ მთავრობამ, როგორც სამეურნეო მექანიზმმა, მისი ვოიაჟები უზრუნველყოს. დიდი ხანია, ვუყურებთ იმას, რომ პრეზიდენტი არ ატარებს პოლიტიკას, რაც კონსტიტუციით აქვს განსაზღვრული. თუ პრეზიდენტი მიიჩნევს, რომ თავისი რესურსი სასარგებლოა, მაშინ მთავრობასთან კონსულტაციას წინასწარ რატომ არ იწყებს – ამ მიმართულებით რაღაც წვლილის შეტანა შემიძლია და მთავრობის პოლიტიკაში ჩემი რესურსი გაითვალისწინეთო. ამას არ აკეთებს და გადაწყვეტილებას დამოუკიდებლად იღებს, რისი უფლებაც კონსტიტუციით არ აქვს.
მთავრობას ეუბნება, ან დამეთანხმე, ან თავად ვიმოქმედებო. დიდი ხანია, ვხედავთ, რომ პრეზიდენტის განცხადებები ერთი ერთში ემთხვევა ოპოზიციის გარკვეულ განცხადებებს, მათ შორისაა განცხადება – სტატუსს მთავრობა არ იმსახურებს, ხალხი იმსახურებსო. მას არ აქვს ინტერესი, რომ მთავრობის პოლიტიკის თანაზიარი იყოს, დამოუკიდებელი საგარეო პოლიტიკის წარმოების ამბიცია აქვს, რისი უფლებაც კონსტიტუციით არ გააჩნია. პრეზიდენტი გერმანიაშია ვიზიტით და წარმოგიდგენიათ, რომ გერმანიის პრეზიდენტი საზღვარგარეთ თავისი ინიციატივით გაემგზავროს? თუ მთავრობა არ დაავალებს, საგარეო ვიზიტს არ განახორციელებს. დიდი ხანია, ნარატივს ამკვიდრებენ, რომ საქართველო სტატუსს თუ მიიღებს, არაფერ შუაში იქნება მთავრობა, ეს ხალხისა და ოპოზიციის დამსახურება იქნება. სამწუხაროდ, ამ ნარატივის განვითარებას ხელს უწყობს პრეზიდენტიც. ისეთი ქვეყანაც კი, როგორიცაა ინგლისი, სადაც სახელმწიფოს მეთაური მეფეა და ასწლოვანი ტრადიცია აქვს, მეფე-დედოფალიც კი არ აძლევდნენ თავს უფლებას, მთავრობის გარეშე აქტიური საგარეო აქტივობა გაეტარებინათ. პრეზიდენტის ტექსტები აცდენილია მთავრობის პოლიტიკას. როცა ვიზიტი იგეგმება, საგარეო უწყება უგეგმავს თუ ვინ? მთელი კონსტიტუციური მოწყობის აღრევასთან გვაქვს საქმე. მთავრობა წყვეტს, მას სჭირდება თუ არა პრეზიდენტის დახმარება ამა თუ იმ პოლიტიკურ საკითხებში. სალომე ზურაბიშვილი ნებართვას მიიღებს, თუ ეს მთავრობასთან იქნება შეთანხმებული.
პრეზიდენტი საკონსტიტუციო ჩარჩოებს უნდა დაუბრუნდეს, რადგან ის არის კონსტიტუციის გარანტი და თავად არღვევს პირველი. შეთანხმება ის კი არ არის, მივდივარ, თვითმფრინავში ბენზინი ჩამისხით და მანქანები დამახვედრეთო, შეთანხმებაა ის, რაც ევროპულ საპარლამენტო რესპუბლიკებში ხდება – როცა მთავრობა განსაზღვრავს მთლიანად საგარეო პოლიტიკას, მასში პრეზიდენტის ჩართულობა განპირობებულია მთავრობის სურვილიდან გამომდინარე და თუ პრეზიდენტს გარკვეული შემოთავაზება აქვს, წინასწარ ხდება ამ საკითხის გავლა მთავრობასთან“, – განაცხადა ირაკლი ქადაგიშვილმა.
ცხადზე ცხადია, რომ კონსტიტუცია ძალიან უხეშად ირღვევა საქართველოს პრეზიდენტის მიერ, მას ფიცი აქვს დადებული ამ კონსტიტუციაზე, თუმცა ძალიან არღვევს, რაც არის ძალიან მძიმე მოვლენა და ამაზე ჩვენ გვჭირდება შესაბამისი რეაგირება, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.
როგორც ირაკლი კობახიძემ აღნიშნა, საქართველო არის საპარლამენტო რესპუბლიკა, სადაც აღმასრულებელ ხელისუფლებას, საქართველოს საშინაო და საგარეო პოლიტიკას ახორციელებს მხოლოდ საქართველოს მთავრობა და პრეზიდენტი არ არის აღმასრულებელი ხელისუფლების ნაწილი, შესაბამისად, ის არ მონაწილეობს საგარეო პოლიტიკის განხორცილებაში.
„გარდა ამისა, უფრო კონკრეტულად, საქართველოს კონსტიტუციაში მითითებულია, რომ საქართველოს მთავრობის თანხმობით არის მხოლოდ პრეზიდენტი უფლებამოსილი, განახორციელოს წარმომადგენლობითი ურთიერთობები საგარეო პოლიტიკაში და ასევე ჩაერთოს საერთაშორისო მოლაპარაკებებში. აქედან გამომდინარე, ცხადზე ცხადია, რომ კონსტიტუცია ძალიან უხეშად ირღვევა საქართველოს პრეზიდენტის მიერ. მას აქვს ფიცი დადებული ამ კონსტიტუციაზე, თუმცა ძალიან უხეშად არღვევს მას, რაც არის ძალიან მძიმე მოვლენა და ამაზე ჩვენ გვჭირდება შესაბამისი რეაგირება. ამას რეაგირების გარეშე ვერ დავტოვებთ. ზედმეტად დიდ მნიშვნელობას არ მივანიჭებდი ამ თემას, ისედაც ვიცით, რომ სალომე ზურაბიშვილი უპირისპირდება ქვეყნის ევროინტეგრაციის ინტერესს. მნიშვნელობა არ აქვს ის ევროინტეგრაციის საპირისპირო განცხადებებს გააკეთებს საქართველოს პარლამენტის შენობაში თუ საგარეო ვიზიტის განხორციელების დროს. ეს ინფორმაცია ისედაც მიდის ჩვენს საერთაშორისო პარტნიორებთან. თქვენ გახსოვთ, საქართველოს პარლამენტის შენობიდან დაუპირისპირდა ჩვენს ევროპულ პერსპექტივას. კერძოდ, მან განაცხადა, რომ საქართველო შარშან არ იმსახურებდა კანდიდატის სტატუსს და, უფრო მეტიც, თქვა, რომ წელსაც მხოლოდ ფორმალურად ხორციელდება ის რეფორმები, რომელიც გათვალისწინებულია ევროკავშირის დოკუმენტებში. შესაბამისად, გამოდის, რომ, მისი აზრით, წელსაც არ იმსახურებს საქართველო კანდიდატის სტატუსს. როდესაც ასეთი გზავნილების შესახებ ძალიან კარგად იციან ჩვენმა პარტნიორებმა, გამოდის, რომ სალომე ზურაბიშვილი დაპირისპირებაშია ჩვენს ევროპულ პერსპექტივასთან“, – განაცხადა კობახიძემ.
რეალურად, პრეზიდენტის მიერ იგეგმებოდა ვიზიტები, რომლებსაც, როგორც ჩანს, დასაბუთება აკლდა და გამგზავრება რომ გამართლებულიყო, მოგვიანებით წარმოდგენილი იყო სტატუსის საკითხი, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.
მიხეილ სარჯველაძის თქმით, კონსტიტუციის თანახმად, მსგავს სამუშაო ვიზიტებს მთავრობასთან შეთანხმება სჭირდება.
„ოპოზიცია კითხვას მანიპულაციურად სვამს, რას გააფუჭებს ვიზიტებში პრეზიდენტი? პირველ რიგში, მათ უნდა თქვან, რატომ მიაჩნიათ არასწორად კონსტიტუციის შესაბამისი დებულება. კონსტიტუციაში მკაფიოდაა ნათქვამი, რომ საგარეო პოლიტიკის დამგეგმავი და განმახორციელებელი, პარლამენტთან ერთად, არის მთავრობა, პრეზიდენტის საგარეო წარმომადგენლობითი უფლებები კი შეზღუდულია და სავალდებულოა მთავრობის თანხმობა. როცა სალომე ზურაბიშვილი პრეზიდენტი გახდა, მან გადასარევად იცოდა, რა იყო პრეზიდენტის ფუნქცია, კომპეტენცია და უფლებამოსილება. მსგავსი ვიზიტები როცა იგეგმება, ეს მთავრობასთან შეთანხმებას მოითხოვს. მოგვიანებით გაკეთებული ახსნა, თითქოს ვიზიტები, მოგზაურობები ევროკავშირის სახელმწიფოებთან მოლაპარაკებებისთვის იყო წამოწყებული, რათა რაღაც ფორმით წახალისებული იყოს კანდიდატის სტატუსის მოპოვება და ამ მიმართულებით წარიმართოს მუშაობა, ზოგიერთ შემთხვევაში კი, როცა ევროკავშირის არაწევრ სახელმწიფოებში ვიზიტებზეა საუბარი, ეს ყველაფერი ანტურაჟისთვის გამოყენებულ არგუმენტებს ჰგავს და არა – რეალურ შინაარსს. რეალურად, იგეგმებოდა ვიზიტები, რომლებსაც, როგორც ჩანს, დასაბუთება აკლდა და იმისათვის, რომ გამგზავრება, მოგზაურობა გამართლებულიყო, მოგვიანებით წარმოდგენილი იყო სტატუსის საკითხი. ყველამ უნდა შევეცადოთ, ჩვენი საქმიანობა კონსტიტუციის შესაბამისად დავგეგმოთ და არა – პირიქით, ჯერ დავგეგმოთ და კონსტიტუციის ნორმები ჩვენ მიერ დაგეგმილ ღონისძიებებთან მოვიყვანოთ.
პრეზიდენტს თუ სურვილი აქვს, საკუთარი წვლილი შეიტანოს კანდიდატის სტატუსის მოპოვებაში, ვალდებულია, მთავრობასთან, პარლამენტთან შეთანხმდეს და ამის შემდეგ გადაწყვიტოს კონკრეტული ვიზიტის საკითხი და არა პირიქით, ჯერ დაგეგმოს, შემდეგ მიზეზები მოიგონოს, როგორ შეიძლება, შეუთანხმებლად გაემგზავროს გერმანიაში თუ ისრაელში. ჯერ დაგეგმა და შემდეგ დაიწყო, რით ახსნილიყო ეს ყველაფერი“, – განაცხადა მიხეილ სარჯველაძემ.
ამასთან, კითხვაზე, რა რისკები შეიძლება, ახლდეს პრეზიდენტის ვიზიტს, სარჯველაძემ აღნიშნა, რომ შეუთანხმებელი პოზიციების გავრცელებამ, შესაძლოა, გარკვეული დისონანსი და პრობლემა შექმნას უცხოელ პარტნიორებთან.
„სალომე ზურაბიშვილის ვიზიტებთან მიმართებით რისკი შეიძლება იყოს მანიპულაციური ინტერპრეტაციების შეთავაზება, მათ შორის უცხოელი კოლეგებისთვის. საჭიროა ზედმიწევნით სიფრთხილე. შესაძლოა, არებობდეს საშიშროება, რომ გარკვეული უხერხულობა შექმნას პოზიციების შეუთანხმებლობამ და კითხვები გააჩინოს იმ მდგომარეობაზე, რაც საქართველოში არსებობს და მნიშვნელოვანია სტატუსის მიღებისთვის. შეთანხმებას თავისი მნიშვნელობა აქვს და ამის დაკნინება არ შეიძლება. სწორია, რომ უნდა შეთანხმდეს, რადგან შეუთანხმებლობის შემთხვევაში, შესაძლოა, რისკები არსებობდეს და ეს რისკები არც თუ ისე ჰიპოთეტურია. შეუთანხმებელი პოზიციების გავრცელებამ, შესაძლოა, გარკვეული დისონანსი და პრობლება შექმნას უცხოელ პარტნიორებთან“, – აღნიშნა მიხეილ სარჯველაძემ.
