საქართველოში კორონავირუსის მეორე შემთხვევა დადასტურდა
კორონავირუსის კიდევ ერთი შემთხვევა საქართველოში. ეს ინფორმაცია რამდენიმე წუთის წინ დაავადებათა კონტროლის ცენტრის ხელმძღვანელმა, ამირან გამყრელიძემ საგანგებო ბრიფინგზე გააჟღერა.
მისი თქმით შემთხვევა ლაბორატორიული კვლევების საფუძველზე გვიან ღამით დადასტურდა. როგორც გამყრელიძე განმარტავს, ინფიცირებული საქართველოში იტალიიდან ცოტა ხნის წინ დაბრუნდა.
დაავადებათა კონტროლის ცენტრის ხელმძღვანელის თქმით, ამ ეტაპზე კვვლევა უტარდება კიდევ 4 პირს და ის არ გამორიცხავს, რომ მათ შემთხვევაშიც ინფიცირება დადასტურდეს.
შეგახსენებთ, რომ საქართველოში კორონავირუსის პირველი შემთხვევა 26 თებერვალს დაფიქსირდა. ინფექცია საქართველოს მოქალაქეს, 50 წლის მამაკაცს დაუდასტურდა, რომელიც ქვეყანაში ირანიდან აზერბაიჯანის გავლით შემოვიდა. ის ამჟამად თბილისის ინფექციური საავადმყოფოს ბოქსირებულ განყოფილებაშია მოთავსებული და მისი ჯანმრთელობის მდგომარეობა დამაკმაყოფილებელია.
