სოფელ ლამბალოში მომხდარი არასრულწლოვნის მკვლელობის ფაქტზე ბრალდებულს ბრალი გაუპატიურების მუხლით დაუმძიმდა

14 წლის გოგონას მკვლელობაში ბრალდებულს, პროკურატურამ ბრალი დაუმძიმა

საგარეჯოს მუნიციპალიტეტის სოფელ ლამბალოში მომხდარი არასრულწლოვნის მკვლელობის ფაქტზე ბრალდებულ პირს, ბრალი გაუპატიურების მუხლით დაუმძიმდა.

საქართველოს პროკურატურის ინფორმაციით, 2023 წლის ზაფხულში, 28 წლის ბრალდებულმა, 14 წლის არასრულწლოვანს ქორწინების იძულების მიზნით, უკანონოდ აღუკვეთა თავისუფლება და საგარეჯოს რაიონის სოფელ ლამბალოში მიიყვანა, სადაც დაზარალებულს შეზღუდული ჰქონდა თავისუფალი გადაადგილების უფლება.

არასრულწლოვანმა გაპარვა მოახერხა, თუმცა მისივე ოჯახის წევრებმა ის უკან დააბრუნეს.

ქორწინებაში ყოფნის პერიოდში, დაზარალებულის უმწეობის გამოყენებით, გენდერის ნიშნით შეუწყნარებლობის მოტივით, ბრალდებული მასთან არარეგისტრირებულ ქორწინებაში მყოფ არასრულწლოვანს აუპატიურებდა.

ბრალდებული თვლიდა, რომ დაზარალებულმა გაქცევით შეურაცხყოფა მიაყენა და როგორც ქალს არ ჰქონდა პირადი ცხოვრების განკარგვისა და მასთან ქორწინებაზე უარის თქმის უფლება.

მან 14 წლის არასრულწლოვანს ცეცხლსასროლი იარაღიდან რამდენიმე ჭრილობა მიაყენა.

მიღებული დაზიანებების შედეგად დაზარალებული ადგილზე გარდაიცვალა.

გამოძიება მომხდარ ფაქტზე, სისხლის სამართლის კოდექსის 109-ე, 143-ე და 236-ე მუხლებთ დაიწყო, რაც განზრახ მკვლელობას გულისხმობს.

საქმეზე დაკავებულები არიან ასევე, გარდაცვლილის დედა და ბიძა ასევე ბრალდებულის ბიძა და ბიძაშვილი.