კიევზე დრონებით მასიური შეტევის გამო ლატვიის პრეზიდენტს თავშესაფარში ჩასვლა მოუწია
24 ნოემბერს, ბალტიისპირეთის მოკავშირე ქვეყნების, ლიეტუვისა და ლატვიის ლიდერები კიევში ჩავიდნენ და გამოხატეს ურყევი მხარდაჭერა რუსეთის წინააღმდეგ ომში, მაშინ, როცა უკრაინა ებრძვის შეფერხებებს ელექტროენერგიის მიწოდებაში.
24 ნოემბერს კიევს ესტუმრა ლიეტუვის პრემიერ-მინისტრი ინგრიდა შიმონიტე, რომელმაც უკრაინის ხელმძღვანელობასთან გამართა მოლაპარაკება.
“კიევში პატივი მივაგე კაცებსა და ქალებს, რომელთაც თავიანთი სიცოცხლე შესწირეს ერის ყველაზე ფუნდამენტური უფლებების დაცვას: არსებობას და ცხოვრებას თავისუფლების პირობებში”, – დაწერა შიმონიტემ X-ზე და იქვე გამოაქვეყნა ფოტო, რომელზეც გვირგვინით ამკობს რუსეთთან ომში მებრძოლი უკრაინელების მემორიალს. “მათ თავიანთი სიცოცხლე ყველა ჩვენგანის დასაცავადაც გაწირეს”, – დაწერა შიმონიტემ და დასძინა: – “ერთადერთი გზა გრძელვადიანი და სამართლიანი მშვიდობის მისაღწევად არის უკრაინის დახმარება, რომ მან რაც შეიძლება მალე გაიმარჯვოს, სრულად აღიდგინოს თავისი ტერიტორიული მთლიანობა, ემსახუროს საერთაშორისო მართლმსაჯულებას და აღდგენის შემდეგ იყოს უფრო ძლიერი”.
უკრაინის პრეზიდენტმა ვოლოდიმირ ზელენსკიმ განაცხადა, რომ შეხვდა ლატვიელ კოლეგას, ედგარს რინკევიჩს, რომელთა მოლაპარაკებებიც შეეხებოდა კიევის თავდაცვით საჭიროებებს და უკრაინის პოტენციალს, გახდეს ევროპის კავშირის წევრი.
ამავე დროს, არსებული ინფორმაციით, 24 ნოემბერს რუსეთმა განაგრძო უპილოტო საფრენი მოწყობილობებით დარტყმები უკრაინის სამოქალაქო და ენერგეტიკულ ინფრასტრუქტურაზე. 24 ნოემბრის მონაცემებით, უამინდობის, ტექნიკური დარღვევებისა და საომარი მოქმედებების გამო უკრაინაში 635 დასახლებულ პუნქტს არ მიეწოდება ელექტროენერგია.
გარდა ამისა უკრაინას სჭირდება “სამი მთავარი გამარჯვება”, რომლებიც “სტიმულს მისცემს მას რუსეთის ფედერაციასთან საბრძოლველად”, – განაცხადა უკრაინის პრეზიდენტმა, ვოლოდიმირ ზელენსკიმ ლატვიის პრეზიდენტ ედგარ რინკევიჩთან ერთობლივ პრესკონფერენციაზე კიევში.
ზელენსკიმ თქვა, რომ “პირველი გამარჯვება” იქნება აშშ-ის კონგრესის გადაწყვეტილება უკრაინისთვის დახმარების შესახებ. „მეორე გამარჯვება“ ევროკავშირის მხარდაჭერა იქნება. კერძოდ, უკრაინამ უნდა მიიღოს 50 მილიარდი ევროს ღირებულების დახმარების პაკეტი, განაცხადა მან. “მესამე გამარჯვება” არის დიალოგის დაწყება ევროკავშირში უკრაინის მომავალ წევრობის გარშემო, განაცხადა ზელენსკიმ.
უკრაინის პრეზიდენტმა 24 ნოემბერს ასევე განაცხადა, რომ უკრაინა ახორციელებს რეფორმებს ჯარების მობილიზების პროგრამისთვის, რადგან რუსეთთან ომი მძვინვარებს და მას დასასრული არ უჩანს. კიევი არ ამხელს ცოცხალი ძალის დანაკარგებს და არც მობილიზაციის პროგრამაზე მუშაობის მიმდინარეობას, რომელიც ხორციელდება მას მერე, რაც რუსეთი ამ ქვეყანაში შეიჭრა 2022 წლის თებერვალში.
ზელენსკიმ თქვა, რომ მაღალი თანამდებობის ოფიციალურ პირებს უბრძანა წინადადებების შემუშავება. მან არ გაამხილა რეფორმების დეტალები.
მისი თქმით, განხილული იქნება სამხედრო-სამედიცინო კომისიებისა და გაწვევის ცენტრების საკითხები. უკრაინა მზარდი წნეხის ქვეშაა გაწვევის სფეროში, რადგან ბრძოლა უწევს რუსეთის ბევრად დიდ არმიასთან. გაწვევის სისტემაში იყო სკანდალები, ერთი მხრივ, ქრთამის აღების და ასევე არმიაში გაწვევის უხეში ტაქტიკის გამოც.
ამ კვირის დასაწყისში, რამდენიმე უკრაინელმა დეპუტატმა განაცხადა, რომ ისინი ამზადებენ მრავალმხრივ იურიდიულ კანონპროექტს მობილიზაციის პროცესის გასაუმჯობესებლად. აგვისტოში ზელენსკიმ გაათავისუფლა უკრაინის რეგიონული სამხედრო გაწვევის ცენტრების ყველა ხელმძღვანელი, რადგან დაფიქსირდა კორუფციისა და ჯარისთვის თავის არიდებაში მონაწილეობის მრავალი შემთხვევა.
კიევზე დრონებით მასიური შეტევის გამო, ლატვიის პრეზიდენტს თავშესაფარში ჩასვლა მოუწია. ფოტო წარწერით -„25 ნოემბერი, დილის 05:10 საათი, კიევი“ – ედგარს რინკევიჩის ტვიტერზე ვრცელდება.
გასულ ღამეს რუსებმა უკრაინის მიმართულებით უპილოტო საფრენი აპარატების რეკორდული რაოდენობა გაუშვეს, საიდანაც ასევე რეკორდული რაოდენობა გაანადგურა უკრაინის საჰაერო თავდაცვამ. უფრო კონკრეტულად კი 75 “შაჰიდიდან” უკრაინამ 71 ჩამოაგდო.
ლატვიის პრეზიდენტი ედგარს რინკევიჩი თავდასხმის დროს, უკრაინაში ოფიციალური ვიზიტით იმყოფებოდა.
დღეს მან მონაწილეობა მიიღო ჰოლოდომორის 90 წლისთავისადმი მიძღვნილ ღონისძიებებში. გუშინ კი უკრაინის პრეზიდენტს, ვოლოდიმირ ზელენსკის შეხვდა.
24 ნოემბერს კიევს სტუმრობდნენ ბალტიისპირეთის ორი სახელმწიფოს ლიდერები, ლატვიის პრეზიდენტი, ედგარ რინკევიჩი და ლიეტუვის პრემიერ-მინისტრი, ინგრიდა შიმონიტე, რომლებმაც რუსეთთან ომში ურყევი დახმარება აღუთქვეს კიევს.
