პავლოგრადის რაიონზე სარაკეტო თავდასხმის შედეგად დაჭრილთა რიცხვი 34-მდე გაიზარდა
უკრაინის შეიარაღებული ძალების მთავარსარდლის, ვალერი ზალუჟნის ინფორმაციით, რუსეთის საოკუპაციო ძალებმა უკრაინაზე დღევანდელი შეტევა განახორციელეს კასპიის ზღვის და მურმანსკის ოლქის რაიონებიდან, სტრატეგიული ავიაციის 11 თვითმფრინავის, ტუ-95-ის გამოყენებით.
გენერალ ზალუჟნის ცნობით, უკრაინის საჰაერო თავდაცვის ძალებმა მოწინააღმდეგის 18 ფრთოსანი რაკეტიდან 15 გაანადგურეს. დნეპროპეტროვსკის საოლქო-სამხედრო ადმინისტრაციის ცნობით, სარაკეტო დარტყმების შედეგად პავლოგრადის რაიონში დაზიანებულია 40-ზე მეტი სახლი და 6 სასწავლო დაწესებულება. დაიწვა 1 საწარმო. წინასწარი მონაცემებით, დაშავდა 25 ადამიანი, მათ შორის 3 ბავშვი.
“მტერი რეგიონს რაკეტებით თავს დაესხა. მათგან 7 საჰაერო სარდლობამ ჩამოაგდო, თუმცა არის დარტყმებიც. თავდასხმის შედეგად 25 ადამიანი დაშავდა, მათგან სამი ბავშვია”, – დაწერა ლისაკიმ.
ამასთან უკრაინის ქალაქ პავლოგრადის რაიონზე სარაკეტო თავდასხმის შედეგად დაჭრილთა რიცხვი 34-მდე გაიზარდა. ამის შესახებ BBC იტყობინება ადგილობრივი ადმინისტრაციის ხელმძღვანელზე, სერგეი ლისაკზე დაყრდნობით.
ლისაკის თქმით, დაშავებულებს შორის არის რვა წლის გოგონა. ორი ქალი – 45 და 55 წლის – რეანიმაციაში იმყოფება, დაწერა მან ტელეგრამის არხში.
მანამდე ლისაკმა განაცხადა, რომ კვირას ღამით რუსეთის არმიამ სარაკეტო შეტევა განახორციელა დნეპროპეტროვსკის ოლქის ქალაქ პავლოგრადზე, რომელიც ქალაქ დნეპრის აღმოსავლეთით მდებარეობს.
როგორც ცნობილია, ოკუპანტებმა სარაკეტო თავდასხმა დნეპროპეტროვსკის, კიროვოგრადის, დონეცკის, კიევის, სუმის, პოლტავას, ზაპოროჟიესა და ჩერკასის ოლქებში განახორციელეს.
რუსეთს ჯერ არ გაუკეთებია კომენტარი სარაკეტო თავდასხმის შესახებ ცნობებზე.
რუსეთის თავდასხმის გამო, ადგილობრივი დროით 03:00 საათის შემდეგ საჰაერო განგაში გამოცხადდა უკრაინის დედაქალაქ კიევსა და სხვადასხვა ოლქში. განგაში დაახლოებით 07:00 საათისთვის შეწყდა.
