მნიშვნელოვანისიახლეები

როგორ აფასებენ პრეზიდენტის ბრიფინგს მმართველ გუნდში და ოპოზიციაში

ოპოზიციის ნაწილი, მიხეილ სააკაშვილთან დაკავშირებით პრეზიდენტის განცხადებას, არასაკმარისად მიიჩნევს. მათი შეფასებით, პრეზიდენტის რიტორიკა შერბილებულია, თუმცა განცხადება მესამე პრეზიდენტის კერძო კლინიკაში გადაყვანისას საფრთხეების არსებობაზე არალოგიკურად მიაჩნიათ.

“ნაციონალური მოძრაობის” ლიდერებმა და ოფიციალურად, პარტიამ განვაცხადეთ, რომ თუ პრეზიდენტი სააკაშვილი გადაყვანილი იქნება კლინიკაში, ჩვენ ჩავერთვებით ყველანაირ საკითხში უსაფრთხოებასთან დაკავშირებით და არანაირი აქცია არ გაიმართება ამ კლინიკასთან.
რაც შეეხება სალომე ზურაბიშვილის განცხადებას, მე ვისურვებდი, რომ უფრო მეტი კონკრეტიკა ყოფილიყო და უფრო მეტი სერიოზულობა ამ განცხადებაში,” – აღნიშნა ენმ-ის წევრმა, სულხან სიბაშვილმა.

განსხვავებულია “გირჩის” შეფასება, ისინი სალომე ზურაბიშვილის განცხადებებს ადეკვატურად მიიჩნევენ. მმართველი გუნდის ოპონენტები ასევე აცხადებენ, რომ სამოქალაქო კლინიკაში გადაყვანის შემთხვევაში მზად არიან, უსაფრთხოების ნორმების დაცვაში თავადაც მიიღონ მონაწილება.

არ ვიცი, რას გულისხმობდა საქართველოს პრეზიდენტი, შემიძლია, მხოლოდ ვივარაუდო, რომ ის გულისხმობდა მიხეილ სააკაშვილის ექსპრეზიდენტის სტატუსს. სხვა მხრივ, ეს პატიმარი, რა თქმა უნდა, ზუსტად ისეთივე პატიმარია, როგორიც ნებისმიერი სხვა, – ამის შესახებ საქართველოს კულტურის მინისტრმა თეა წულუკიანმა სალომე ზურაბიშვილის გუშინდელ განცხადებაზე კითხვის საპასუხოდ აღნიშნა.

თეა წულუკიანმა ყველა პატიმარს, რომელიც დღეს ციხეში შიმშილობს, შიმშილობის შეწყვეტისაკენ მოუწოდა.

ძალიან მალე მკაფიო პოზიციის დაფიქსირება არამხოლოდ პრეზიდენტს, არამედ ყველას მოუწევს, ვინც კი პოლიტიკაშია – აქ ნეიტრალიტეტი არ იქნება, ან ხარ რუსეთისკენ, ან ხარ დასავლეთისკენ – დადგა „წითელი ხაზების“ გავლების დრო, – ამის შესახებ ანალიტიკოსმა ზურაბ ბატიაშვილმა განაცხადა, რითაც საქართველოს პრეზიდენტის სალომე ზურაბიშვილის განცხადებები შეაფასა.

მისი თქმით, სალომე ზურაბიშვილის გამოსვლაში იგრძნობოდა, რომ ის შეეცადა ერთგვარად დისტანცირება მოეხდინა მმართველი პარტიისგან, თუმცა განცხადებებს მკაფიოობა აკლდა.

პრეზიდენტის განცხადებას ეხმაურებიან მმართველ გუნდში “ქართულ ოცნებაში” განმარტავენ, რომ გლდანის ციხის საავადმყოფო მულტიფუნქციურია და ექსპრეზიდენტის მკურნალობა სრულყოფილადაა შესაძლებელი.

უმრავლესობაში, ასევე განმარტავენ, რომ პრაქტიკიდან გამომდინარე, სწორედ ციხის კლინიკას აქვს შესაბამისი ცოდნა, როგორ უმკურნალოს როგორც შიმშილობის, ასევე პოსტშიმშილობის პერიოდში პატიმარს.

რაც შეეხება პატიმრის პრივილეგიებს, თბილისის მერი კახა კალაძე მიიჩნევს, რომ ყველა პატიმარი თანასწორუფლებიანია და ყველანაირ პრივილეგიაზე საუბარი ზედმეტია. -კახა კალაძე

პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილი პრეზიდენტის ბრიფინგს აფასებს და ამბობს, რომ ნებისმიერი პატიმრისთვის რთული შესაგუებელია საპატიმროში მოხვედრა და ბევრიც პროტესტის მიზნით შიმშილობის ფორმას მიმართავს. მისივე თქმით, თუ რომელიმე სისტემას გააჩნია რისკების ქვეშ მყოფი პაციენტების ჯანმრთელობის მართვა, ერთ-ერთი სწორედ პენიტენციური სისტემაა.- ირაკლი ქადაგიშვილი

ასევე შეაფასა პრეზიდენტის ბრიფინგი გურამ მაჭარაშვილმაც .როგორც პარლამენტის საპროცედურო საკითხთა და წესების კომიტეტის თავმჯდომარის პირველი მოადგილე გურამ მაჭარაშვილი აცხადებს, გლდანის მე-18 დაწესებულებაში, სადაც მსჯავრდებული ექსპრეზიდენტი იმყოფება, არის ყველა ის შესაბამისი აღჭურვილობა, რაც შესაძლოა პაციენტს დასჭირდეს. -გურამ მაჭარაშვილი

შალვა ნათელაშვილი სალომე ზურაბიშვილის გუშინდელ განცხადებას მიხეილ სააკაშვილის შესახებ, უპასუხისმგებლო ქმედებად აფასებს. ნათელაშვილის თქმით, პრეზიდენტმა დაგმო არა მესამე პრეზიდენტის მიერ ციხეში განხორციელებული ძალაოდბა, არამედ ამ ფაქტის გახმოვანება. “ლეიბორისტული პარტიის” ლიდერი ამბობს, რომ ზურაბიშვილი მოსაზრებებს ივანიშვილის განკარგულებით ახმოვანებს.

გუშინ, საქართველოს პრეზიდენტმა სალომე ზურაბიშვილმა სპეციალურ ბრიფინგზე მიხეილ სააკაშვილზე საუბრისას განაცხადა, რომ ყოფილი პრეზიდენტი ვერ იქნება რიგითი პატიმარი იგი განსაკუთრებული პატიმარია. ასევე პრეზიდენტმა ხელისუფლებას მოუწოდა, რომ, დაცული იყოს ყოფილი პრეზიდენტის ღირსება, მისივე ქცევის მიუხედავად, რადგან ყოფილი პრეზიდენტი მაინც დაკავშირებულია სახელმწიფოსთან და ამ სტატუსს უნდა ეცეს პატივი.
მისივე თქმით, ნებისმიერი სახელმწიფოსთვის, ყოფილი პრეზიდენტის დაპატიმრება არის ძალიან დიდი გამოწვევა.

მსგავსი პოსტები

Back to top button