ხორავას ქუჩაზე მომხდარი მკვლელობის საქმეზე დაკავებული გიორგი მენაბდე სასამართლომ პატიმრობაში დატოვა

ხორავას ქუჩაზე მომხდარი მკვლელობის საქმეზე დაკავებული გიორგი მენაბდე პატიმრობაში რჩება. მოსამართლემ მოტივად ბრალდებულის მიმალვის საფრთხე დაასახელა.

ასევე, სხდომაზე გამოიკითხა ზაზა სარალიძე, რომელმაც მკვლელობის შემდეგ განვითარებული მოვლენები გაიხსენა. მან აღნიშნა, რომ გიორგი მენაბდის ბრალდებით საქმე არ სრულდება.

საქმე არ დასრულდება, ვიდრე სამოხელეო ნაწილი პასუხგაცემული არ იქნება და არ გამოიკვეთება, თუ ვინ მიიღო ამ საქმეში მონაწილეობა.

„მენაბდის მიმართ წარდგენილ ბრალს, რა თქმა უნდა, სჭირდებოდა მტკიცებულებების შეგროვება, რადგან, ყველამ კარგად ვიცით, რომ, ამ საქმეში, არასრულწლოვნები არ საუბრობდნენ და ყველანაირად აფარებდნენ ხელს დამნაშავე პირებს“, – აცხადებს ზაზა სარალიძის ადვოკატი ნესტან ლონდარიძე.

შეგახსენებთ, რომ გიორგი მენაბდეს, აღკვეთის ღონისძიების სახით, პატიმრობა 16 აპრილს შეეფარდა. სამართალდამცველებმა ის 2021 წლის 14 აპრილს დააკავეს. მას ბრალდება საქართველოს სისხლის სამართლის კოდექსის 109-ე მუხლის მე-2 ნაწილის „ბ“ და „ე“ ქვეპუნქტებით (განზრახ მკვლელობა, ჩადენილი ჯგუფურად, წინასწარი შეცნობით არასრულწლოვანის მიმართ) წარედგინა, რაც სასჯელის სახედ და ზომად 13-დან 17 წლამდე თავისუფლების აღკვეთას ითვალისწინებს.