მნიშვნელოვანირეგიონისაქართველოსიახლეები

„ლელომ“ მაჟორიტარი დეპუტატობის კანდიდატები წარადგინა

„ლელო“ არის ძალა, რომელიც შექმნის ეკონომიკის მძლავრ ხერხემალს, ასი ათასობით ახალ სამუშაო ადგილს, წელში გამართავს ყველა ოჯახს და შექმნის ძლიერ საშუალო ფენას.

„ლელო“ ქვეყანაში შექმნის ძლიერ საშუალო ფენას, შემოიტანს მილიარდობით ინვესტიციას, ფეხზე დააყენებს მცირე და საშუალო ბიზნესს. გზას გაუხსნის ინოვაციებსა და ახალ ტექნოლოგიებს.” – ამის შესახებ “ლელო საქართველოსთვის“ თავმჯდომარემ, მამუკა ხაზარაძემ მცხეთაში მაჟორიტარი დეპუტატობის კანდიდატების დასახელების ღონისძიებაზე, სიტყვით გამოსვლის დროს განაცხადა.

მამუკა ხაზარაძე, “ლელოს” დამფუძნებელი

„მივესალმები ყველას, ვისაც ქვეყნის ბედი აღელვებს და უკეთეს ქვეყანაში ცხოვრება სურს. დღეს ჩვენ შევიკრიბეთ აქ, – საქართველოს ისტორიულ, ეროვნულ, რელიგიურ და პოლიტიკურ ცენტრში. შევიკრიბეთ აქ, სადაც ქართული სახელმწიფოებრიობა იბადებოდა და სადაც დღეს ჩვენი ცხელი გულით, – სამშობლოსადმი სიყვარულით და ცივი გონებით, – კონკრეტული პროგრამით ვიწყებთ გამარჯვებისკენ და განვითარებისკენ სვლას. აქ და ახლა, როდესაც საქართველოს უძველეს სატახტო ქალაქში, მტკვრისა და არაგვის შესართავთან, სვეტიცხოვლის ტაძრის წინ ვდგავართ, მინდა თითოეულ თქვენგანს გკითხოთ: აი, ეს ქვეყანა, ეს ხალხი, ვინც ამ მიწაზე დაიბადა და ვინც ეს ყველაფერი შექმნა, იმსახურებს იმას, რა მდგომარეობაშიც დღეს აღმოჩნდა?

“მინდა გკითხოთ ჩემს დებს და ძმებს – მოგწონთ დღევანდელი რეალობა?

“მინდა გკითხოთ ჩვენს მშობლებს, გყოფნით თქვენი პენსია ღირსეული ცხოვრებისთვის? მინდა გკითხოთ დედებს: რატომ არ არიან ჩვენი შვილები დაცული ქუჩაში კრიმინალისა და ძალადობისგან?

“მინდა გკითხოთ ჩვენს ახალგაზრდებს: ხდება ამ ქვეყანაში თქვენი ნიჭის რეალიზება? მინდა გკითხოთ ჩვენს ემიგრანტებს: რა გააკეთა ხელისუფლებამ იმისთვის, რომ სამშობლოში დაბრუნებულიყავით? და მინდა გკითხოთ ჩვენს ინტელექტუალებს, მეცნიერებს, მწერლებს, ხელოვანებს, მეწარმეებს და ფერმერებს: მოგწონთ გამეფებული კორუფცია და ნეპოტიზმი?

“კმაყოფილები ხართ ქვეყნის მართვის ამ სტილით? მოგწონთ გაჩერებულ ქვეყანაში ცხოვრება?! ყველა ამ კითხვაზე პასუხი, რაღა თქმა უნდა, არის – არა!

“ვიმსახურებთ ყოველივე ამას? პასუხი არის – არა!!!

“დღევანდელმა პოლიტიკამ, პოლიტიკურმა ელიტამ, ბოლო წლებში ქვეყნის მართვის მეთოდმა სრული კრახი განიცადა. არაფერი შექმნა ჩვენი ქვეყნის მომავლისთვის, ჩვენი შვილებისთვის. სისტემა გაიხრწნა და დალპა. არსებულმა ხელისუფლებამ, უძრაობასთან ერთად, დანერგა ტოტალური სიღატაკე, უიმედობა, ჩააქრო გულები და მოგუდა სულები. დღეს ქართველ ხალხს ისევ სიღარიბით ყიდულობენ, ისევ დამარცხებასა და წაგებას აჩვევენ, ისევ ფუჭი ოცნებისთვის წირავენ!

 

“ამასთან შეგუება შეუძლებელია, რადგან ამის უკან კიდევ უფრო დიდი ჭაობია, უფრო ღრმა უფსკრული, კიდევ უფრო მეტი სიღატაკე და მონობა. როგორც ნიკო ნიკოლაძემ თქვა, „მტერმა კი არ დაგვცა, საკუთარ თავში რწმენის დაკარგვამ წაგვახდინა.“

“მეგობრებო, დღეს დიდგორობაა! როდესაც საქართველოს ისტორიაში გადამწყვეტი ბრძოლა შედგა და ქართულმა ჯარმა მტრის უზარმაზარი ლაშქარი დაამარცხა!

“ეს დღე – 12 აგვისტო გვახსენებს და გვარწმუნებს, რომ
ჩვენ არ ვმარცხდებით!
ჩვენ არ ვიჩოქებთ!
ჩვენ ვაგრძელებთ ბრძოლას!
ჩვენი მისია – გამარჯვებაა!

“გვარწმუნებს, რომ ეს ისტორიული ხიდი არ ჩატეხილა, ეს ძლიერი ძარღვი არ გაწყვეტილა, ეს მფეთქავი, ცხელი გული არ გაჩერებულა და სწორედ ჩვენ ვართ ის ძალა, რომელიც შეძლებს ყველას გაერთიანებას და ძლიერი სახელმწიფოს აშენებას.

“ჩვენ ავაშენებთ ქვეყანას, სადაც აღარ იქნება არც ერთი მშიერი ბავშვი და მოხუცი, არც ერთი ქვეყნიდან გაქცეული ახალგაზრდა. არც ერთი ადამიანი, ვინც უსამართლობის მსხვერპლი გახდა, გული გაუტყდა და იმედი დაკარგა.

“ლელო იწყებს ბრძოლას საქართველოსთვის! თითოეული თქვენგანისთვის! ლელო არის ახალი ფერი, ახალი ძალა! ლელო არის თქვენი ძალა!

„ლელო“ არის ძალა, რომელიც შექმნის ეკონომიკის მძლავრ ხერხემალს, ასი ათასობით ახალ სამუშაო ადგილს, ერთხელ და სამუდამოდ წელში გამართავს ყველა ოჯახს საქართველოში, შექმნის ძლიერ საშუალო ფენას, შემოიტანს ქვეყანაში მილიარდობით ინვესტიციას, ფეხზე დააყენებს მცირე და საშუალო ბიზნესს. გზას გაუხსნის ინოვაციებსა და ახალ ტექნოლოგიებს.

„ლელო“ არის ძალა, რომელიც ჩაატარებს განათლებისა და ჯანდაცვის ფუნდამენტურ რეფორმას.
„ლელო“ არის ძალა, რომელიც დააბრუნებს ემიგრანტებს საქართველოში და გაამთლიანებს ოჯახებს.
„ლელო“ არის ძალა, რომელიც საჯარო მოხელეებს შეუქმნის სტაბილურ და მაღალანაზღაურებად სამუშაო გარემოს.

„ლელო“ არის ძალა, რომელიც დაამკვიდრებს კანონის უზენაესობას საქართველოში. შეცვლის მართლმსაჯულების მახინჯ სისტემას!

„ლელო“ არის ძალა, რომელიც თითოეულ რეგიონს მისცემს ინდივიდუალური და სწორი განვითარების საშუალებას, გააძლიერებს თვითმმართველობას, გლეხს აქცევს მდიდარ ფერმერად, გააცოცხლებს ქართულ სოფელს მთასა და ბარში!

„ლელო“ არის ძალა, რომელიც ააშენებს ანაკლიის პორტსა და ქალაქს, ქვეყანას აქცევს ლოჯისტიკურ და სატრანზიტო ჰაბად, ეკონომიკურ, ფინანსურ კულტურულ და სამეცნიერო ცენტრად!

„ლელო“ არის ახალი ეროვნული ძალა, რომელიც თქვენთან ერთად, საქართველოს აქცევს რეგიონის ლიდერ ქვეყნად, აღადგენს ტერიტორიულ მთლიანობას და გააერთიანებს ჩვენს ქვეყანას!

“ჩვენ – პოლიტიკური გაერთიანება „ლელო საქართველოსთვის“ ვართ ერთადერთი ალტერნატივა, რომელიც დაამარცხებს ორპოლუსიანობას, დაანგრევს ძველ სისტემას და შექმნის სრულიად ახალ პოლიტიკურ რეალობას.

“ოქტომბრის არჩევნები არის გადამწყვეტი ბრძოლა საქართველოს მომავლისთვის! მხარი დაგვიჭირეთ! მხარი დაუჭირეთ ჩვენს კანდიდატებს. ისინი იქნებიან თქვენი ნამდვილი წარმომადგენლები საქართველოს პარლამენტში, თქვენი ყველა პრობლემის, ტკივილის თუ სიხარულის გამზიარებლები. მხარი დაუჭირეთ ლელოს. რადგან ასე თქვენ მხარს უჭერთ თქვენს შვილებს, თქვენს მომავალს, თქვენს ქვეყანას!

“მე დღეს თქვენს წინაშე ვდგავარ, როგორც ერთ-ერთი თქვენგანი, ჩვენი ქვეყნის ერთი რიგითი მეომარი, ერთი თავისუფალი ადამიანი. დიახ, “ლელო” შეიქმნა ადამიანისთვის. თითოეული თქვენგანისთვის, თქვენი ახალი, თავისუფალი და ბედნიერი ცხოვრებისთვის.

“ლელო ხარ შენ!
“ლელო ვარ მე!

“ლელო არის საქართველო!“- თქვა მამუკა ხაზარაძემ.

„ლელოს“ მაჟორიტარი დეპუტატობის კანდიდატები არიან:
1. ბადრი ჯაფარიძე – საბურთალოს რაიონის მაჟორიტარი დეპუტატობის კანდიდატი.
2. ანა ნაცვლიშვილი – ქუთაისის მაჟორიტარი დეპუტატობის კანდიდატი.
3. გრიგოლ გეგელია – რუსთავისა და გარდაბნის რაიონის მაჟორიტარი დეპუტატობის კანდიდატი.
4. გიგლა მიქაუტაძე – გლდანის რაიონის მაჟორიტარი დეპუტატობის კანდიდატი.
5. ირაკლი კუპრაძე – ბათუმის მაჟორიტარი დეპუტატობის კანდიდატი.
6. ფიქრია ჩიხრაძე – სამგორის რაიონის მაჟორიტარი დეპუტატობის კანდიდატი.
7. კახა კოჟორიძე – ხაშურისა და ქარელის მაჟორიტარი დეპუტატობის კანდიდატი.
8. მურად მურადოვი -მარნეულისა და გარდაბნის რაიონების მაჟორიტარი დეპუტატობის კანდიდატი.
9. ლევან კობერიძე – ვაკის რაიონის მაჟორიტარი დეპუტატობის კანდიდატი.
10. ეკა ქვლივიძე – გურჯაანის, საგარეჯოს, სიღნაღისა და დედოფლისწყაროს მაჟორიტარი დეპუტატობის კანდიდატი.
11. საბა ბუაძე – მთაწმინდა – კრწანისის რაიონის მაჟორიტარი დეპუტატობის კანდიდატი.
12. სოსო (მალხაზ) ვახტანგაშვილი – მცხეთის, დუშეთის, თიანეთისა და ყაზბეგის რაიონების მაჟორიტარი დეპუტატობის კანდიდატი.
13. გიორგი სიორიძე – ოზურგეთის, ლანჩხუთისა და ჩოხატაურის რაიონების მაჟორიტარი დეპუტატობის კანდიდატი.
14. ლევან სამუშია -დიდუბე-ჩუღურეთის რაიონის მაჟორიტარი დეპუტატობის კანდიდატი.
15. ალექსანდრე ახვლედიანი – ზუგდიდის რაიონის მაჟორიტარი დეპუტატობის კანდიდატი.
16. ლანა გალდავა -ისნის რაიონის მაჟორიტარი დეპუტატობის კანდიდატი.
17. ჯამბულ ხოზრევანიძე – ხელვაჩაურის, ქედის, შუახევისა და ხულოს რაიონების მაჟორიტარი დეპუტატობის კანდიდატი.
18. ნიკოლოზ ჩერქეზიშვილი – ნაძალადევის რაიონის მაჟორიტარი დეპუტატობის კანდიდატი.
19. პაპუნა კობერიძე – გორისა და კასპის რაიონების მაჟორიტარი დეპუტატობის კანდიდატი.
20. ანა ბიბილაშვილი – ზესტაფონის, თერჯოლის, ტყიბულისა და ბაღდათის რაიონების მაჟორიტარი დეპუტატობის კანდიდატი.
21. გიორგი ბარამია – ფოთის, სენაკისა და ხობის რაიონების მაჟორიტარი დეპუტატობის კანდიდატი..
22. თორნიკე ართქმელაძე – წყალტუბოს, ხონისა და ვანის რაიონების მაჟორიტარი დეპუტატობის კანდიდატი.
23. სოსო ლიპარტელიანი – ამბროლაურის, ონის, ცაგერის, ლენტეხისა და მესტიის რაიონების მაჟორიტარი დეპუტატობის კანდიდატი.
24. ანი მიროტაძე – ჭიათურის, საჩხერისა და ხარაგაულის რაიონების მაჟორიტარი დეპუტატობის კანდიდატი.
25. პაატა ცივაძე – ქობულეთის რაიონის მაჟორიტარი დეპუტატობის კანდიდატი.

მსგავსი პოსტები

Back to top button