სამწუხაროდ ოპოზიციას ცივილური ფორმით საუბრის სურვილი არ აქვს-ბრეგაძე

დიდი იმედი მქონდა, რომ თუნდაც დღევანდელ დღეს ვიხილავდით ოპოზიციის გარკვეულ წარმომადგენლებს და ვიფიქრე, რომ ალბათ, დაგვებედებოდა კიდეც კონსტრუქციულ რეჟიმში საუბარი, – ამის შესახებ იუსტიციის მინისტრმა რატი ბრეგაძემ პარლამენტში განაცხადა, სადაც „მინისტრის საათის“ ფორმატში იმყოფება.

მისი თქმით, სამწუხაროდ ოპოზიციას ცივილური ფორმით საუბრის სურვილი არ აქვს.

„ჩვენ, სამწუხაროდ, ვაკვირდებით, რომ დარბაზის გარკვეული ნაწილი ცარიელია. არადა, ძალიან დიდი იმედი მქონდა, რომ თუნდაც დღევანდელ დღეს ვიხილავდით ოპოზიციის გარკვეულ წარმომადგენლებს და ვიფიქრე, რომ ალბათ, დაგვებედებოდა კიდეც კონსტრუქციულ რეჟიმში საუბარი, მაგრამ რა ვქნათ, სამწუხაროდ, მათი სურვილი არ არის, რომ ჩვენ ერთმანეთთან გვქონდეს ცივილური ფორმებით, კითხვა-პასუხის რეჟიმში საუბრის შესაძლებლობა. ეს, ბუნებრივია, მათი გადაწყვეტილებაა“, – განაცხადა ბრეგაძემ.

“მინისტრის საათის” ფორმატში იუსტიციის მინისტრის, რატი ბრეგაძის გამოსვლას ოპოზიციის ნაწილი ესწრება. როგორც ცნობილია, “ნაციონალური მოძრაობა” ბოიკოტის რეჟიმშია.

ბრეგაძემ “მინისტრის საათის” ფორმატში რამდენიმე მნიშვნელოვანი განცხადებაც გაააკეთა

საკუთრების აღიარებული და უზრუნველყოფილი უფლება დამოუკიდებელი საქართველოს საბჭოთა საქართველოსაგან განმასხვავებელი ერთ-ერთი მთავარი ნიშანი და მრავალი ადამიანის შეუდრეკელი ბრძოლის შედეგია, – ამის შესახებ საქართველოს იუსტიციის მინისტრმა, რატი ბრეგაძემ პარლამენტში განაცხადა.

მინისტრის თქმით, ქვეყანაში მიწის ნაკვეთების 1/3 საჭიროებს რეგისტრაციას, რაც ერთ-ერთი დიდი გამოწვევაა.

როგორც მინისტრმა აღნიშნა, იუსტიციის სამინისტრომ უკვე მოამზადა საკანონმდებლო ინიციატივა და მომავალი წლის იანვრიდან მთელი ქვეყნის მასშტაბით მიწის სისტემური რეგისტრაცია დაიწყება.

„ვიწყებთ მიწის სისტემურ რეგისტრაციას და ეს საკითხი 2024 წლის ბოლომდე ერთხელ და სამუდამოდ სრულად მოწესრიგდება იმგვარად, რომ სანიმუშოდ იქნება უზრუნველყოფილი ამ ქვეყანაში მცხოვრები თითოეული ადამიანის საკუთრების უფლება“, – განაცხადა რატი ბრეგაძემ.

იუსტიციის მინისტრმა, რატი ბრეგაძემ სანოტარო მომსახურების არეალისა და ნოტარიუსთა რაოდენობის მუდმივი ზრდის შესახებ საქართველოს პარლამენტში, ისაუბრა.

რატი ბრეგაძის განცხადებით, „სახელმწიფოს სამართლებრივი უსაფრთხოებისთვის განსაკუთრებით მნიშვნელოვანია, რომ პირებს შორის არსებული სამართლებრივი ურთიერთობებისა და ფაქტების დადასტურების შესაძლებლობა იყოს ფართოდ ხელმისაწვდომი.

„სწორედ ამიტომ, ჩვენი მოქალაქეებისათვის მაქსიმალურად გავზარდეთ სანოტარო მომსახურების გეოგრაფიული არეალი და დავამატეთ ახალი ლოკაციები“, – განაცხადა ბრეგაძემ.

მინისტრის ინფორმაციით, სანოტარო მომსახურება ხელმისაწვდომი გახდა კიდევ რვა ადმინისტრაციულ ერთეულში; თანამდებობაზე დაინიშნა 14 ახალი ნოტარიუსი; ასევე, გაიხსნა ახალი ოფისი ნოტარიუსთა პალატის აჭარის წარმომადგენლობისთვის.

მისივე განცხადებით, სამინისტროს ერთ-ერთი უმთავრესი ამოცანაა შრომის თავისუფლების უზრუნველყოფა სასჯელაღსრულების დაწესებულებებში და, შესაბამისად, დასაქმებულ პატიმართა რაოდენობის მკვეთრი ზრდა.

როგორც მან პარლამენტში მოსმენისას აღნიშნა, სამინისტროს მიზანია მსჯავრდებულთა რესოციალიზაცია, მათთვის საკუთარი შრომით შემოსავლის მიღების შესაძლებლობის გაზრდა, დამსაქმებლისთვის კვალიფიციური კადრების მომზადება, რაც დიდ ძალისხმევას მოითხოვს, თუმცა, დახარჯული ენერგია პირდაპირ აისახება საზოგადოების უსაფრთხოებაზე.

„მიზნობრივი პროგრამების განხორციელებით, კვალიფიკაციის ასამაღლებელი კურსების სისტემის გამართვისა და კერძო სექტორთან აქტიური თანამშრომლობით, დასაქმებულ მსჯავრდებულთა რაოდენობა გაიზრდება. უახლოეს პერიოდში გაიხსნება ობიექტი, სადაც მსჯავრდებულების მიერ დამზადებული პროდუქციის შეძენა იქნება შესაძლებელი“, – განაცხადა იუსტიციის მინისტრმა საქართველოს პარლამენტში.

რატი ბრეგაძემ პრობაციის მიმართულებით მასშტაბური რეფორმები მიმდინარეობს პრობაციონერებისთვის შექმნილი ახალი, ელექტრონული კონტროლის თანამედროვე სისტემის ამოქმედების შესახებაც ისაუბრა.

მინისტრის განცხადებით, პრობაციის მიმართულებით მასშტაბური რეფორმები ტარდება, რომელთა შორის ერთ-ერთია მსჯავრდებულთა ელექტრონული კონტროლის ახლებური მექანიზმი „probbox“, რაც თანამედროვე ტექნოლოგიების გამოყენებით მსჯავრდებულს გაუადვილებს მასზე დაკისრებული ვალდებულების შესრულებას, დაზოგავს ადამიანურ რესურსს და გაზრდის ანონიმურობის ხარისხს.

მინისტრის ინფორმაციით, ასევე, შეიქმნა ახალი ინფრასტრუქტურა სხვადასხვა მუნიციპალურ ერთეულში, რეგიონებში გაიხსნა რეფერირების ცენტრები, საზოგადოებრივად სასარგებლო შრომის შესახებ მუნიციპალიტეტებთან გაფორმდა მემორანდუმები.

შეგახსენებთ რომ იუსტიციის მინისტრს რატი ბრეგაძეს პარლამენტში „მინისტრის საათის“ ფორმატში უსმენდნენ.