„ახლა ნახეთ თქვენ ბეტონის ჯუნგლები!“
„ახლა ნახეთ თქვენ ბეტონის ჯუნგლები! ახლა ნახეთ თქვენ გარიგებით სამშენებლო ნებართვები!“ – ასე ეხმაურება ტრანსპორტისა და გზების ასოციაციის ხელმძღვანელი დავით მესხიშვილი თბილისის მერის დღევანდელ განცხადებას, რომლის მიხედვით სამშენებლო-დეველოპერულ კომპანიებს კონკრეტული პროექტების განხორციელებისას ტრანსპორტის ზემოქმედების შეფასების მომზადება აღარ მოუწევთ.
„დღეს, თბილისის მერიამ ტრანსპორტის კერძო სექტორში დასაქმებული უამრავი ადამიანი ერთი ხელის მოსმით დატოვა უმუშევარი. და რის გამო? დიდი ალბათობით, საქმე გვაქვს უკვე ღია და დაუფარავ კორუფციასთან დედაქალაქის მერიაში. ანუ მერია თავად დაწერს დასკვნას ტრანსპორტის ზემოქმედებაზე და თავისივე დასკვნაზე თავად გასცემს სამშენებლო ნებართვას! და ალბათ ხვდებით რომ თავის თავს უარს არ ეტყვის! ეს არის ღიად გამოხატული ინტერესთა კონფლიქტი და მხოლოდ კორუმპირებულ სტრუქტურაში შეიძლება გაჩნდეს მსგავსი იდეა! ადრე მცირეოდენი ბერკეტი მაინც თუ არსებობდა კერძო სექტორიდან მშენებლობების ნებართვებზე გავლენის მოხდენის, ესეც აღარ იქნება! ახლა ნახეთ თქვენ ბეტონის ჯუნგლები! ახლა ნახეთ თქვენ გარიგებით სამშენებლო ნებართვები!“ – წერს დავით მესხიშვილი სოციალურ ქსელში.
შეგახსენებთ, სამშენებლო-დეველოპერულ კომპანიებს კონკრეტული პროექტების განხორციელებისას ტრანსპორტის ზემოქმედების შეფასების მომზადება აღარ მოუწევთ. ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა. როგორც დედაქალაქის მერმა აღნიშნა, ტრანსპორტის ზემოქმედების შეფასების შესაძლებლობა მერიას უკვე თავად აქვს, რასაც პროექტზე გადაწყვეტილების მიღებისას გამოიყენებს.
„დაახლოებით, ორი წლის წინ ჩვენ შემოვიღეთ ტრანსპორტის ზემოქმედების შეფასება ყველა სამშნებლო პროექტის განხორციელებისათვის, რომ მიგვეღო სრული ინფორმაცია, როდესაც კონკრეტული მშენებელი, კონკრეტული დეველოპერი, კონკრეტულ ქუჩაზე აშენებს საცხოვრებელ სახლს, არავინ არ თხოვდა წლების განმავლობაში რამდენად გამტარუნარიანია ის კონკრეტული ქუჩა, როდესაც ვთქვათ, 500 ოჯახი შესახლდება ახალაშენებულ კორპუსში. შესაბამისად, ჩვენ დავიწყეთ მოთხოვა ტრანსპორტის ზემოქმედების შეფასების, რაც გვაძლევდა იმის შესაძლებლობას, რომ სწორად განგვესაზღვრა რამდენად შეესაბამებოდა კონკრეტული პროექტი არსებულ და სამომავლო მდგომარეობას. ასევე, რამდენად შეძლებდა კონკრეტული ქუჩა იმ ავტომობილების გატარებას, რაც პროექტის განხორციელების შემდეგ მოხდებოდა.
ჩვენ ამ ორი წლის განმავლობაში მთელი ქალაქის მასშტაბით გვაქვს სრული ინფორმაცია, რომ ჩვენ თვითონვე განვსაზღვროთ რა მასშტაბის პროექტები უნდა განხორციელდეს, როგორი იქნება სატრანსპორტო შეფასება კონკრეტულ პროექტებზე. თუ აქამდე ჩვენ ინვესტორს, დეველოპერს, მშენებელს ვთხოვდით, რომ მათ თვითონ გაეკეთებინათ ტრანპორტის ზემოქმედების შეფასება, თბილისის მუნიციპალიტეტში დაგროვდა საკმარისი მონაცემები იმისთვის, რომ ამიერიდან ეს დამოკიდებულება შევცვალოთ; ჩვენს ხელთ არსებული მონაცემებით, ყველა წარმოდგენილ მოთხოვნაზე დაკვირვება თავად ვაწარმოოთ და გადაწყვეტილება მოთხოვნის საფუძველზე ჩვენ მივიღოთ.
ჩვენ არ მოვთხოვთ ინვესტორს, დეველოპერს ამ ზემოქმედების შეფასებაზე მუშაობას, რაზე მუშაობაც თვეების განმავლობაში მიმდინარეობდა და იყო შემთხვევები, რომ ხარვეზიანი მოდიოდა ეს დოკუმენტი, რაც პრობლემებს იწვევდა. უკვე გვაქვს იმის კომპეტენციაც და შესაძლებლობაც, რომ ტრანსპორტის ზემოქმედების შეფასება ჩვენ თვითონვე გავაკეთოთ და მივიღოთ გადაწყვეტილება“. – განაცხადა კალაძემ.
