ალექსეი ნავალნის 19- წლიანი სპეციალური რეჟიმი მიუსაჯეს
მოსკოვის საქალაქო სასამართლომ ოპოზიციონერ ალექსეი ნავალნის ექსტრემისტული საზოგადოების შექმნის საქმეზე 19 წლიანი განსაკუთრებული რეჟიმი მიუსაჯა. რუსეთის ხელისუფლება “ექსტრემისტულად” მიიჩნევს ნავალნის მიერ დაარსებულ ორგანიზაციას – კორუფციასთან ბრძოლის ფონდს, რომელმაც რუსი პოლიტიკოსების კორუფციასა და მათ ქონებაზე არაერთი საგამოძიებო მასალა მოამზადა.
პროცესი ვლადიმირის რეგიონის მაღალი უსაფრთხოების კოლონიაში გაიმართა, სადაც პოლიტიკოსი თაღლითობის საქმეზე ცხრაწლიან სასჯელს იხდის.
ნავალნი ასევე დამნაშავედ ცნეს სისხლის სამართლის კოდექსის სხვა, კერძოდ, ექსტრემიზმისკენ საზოგადოებრივი მოწოდებების; ნაციზმის რეაბილიტაციის; სიცოცხლისათვის საშიშ ქმედებებში არასრულწლოვანთა ჩართვისა და ექსტრემიზმის დაფინანსების მუხლებით.
სპეციალური რეჟიმი ნიშნავს, რომ პოლიტიკოსს მოუწევს სასჯელის მოხდა უმკაცრეს პირობებში, რომელიც სამუდამო პატიმრობაში მყოფი პატიმრების პირობებს უტოლდება.
ნავალნი კოლონიაში 2021 წლის თებერვლის შემდეგ იმყოფება. მაშინ სასამართლომ, ფედერალური სასჯელაღსრულების სამსახურის მოთხოვნით, “ივ როშეს” საქმეზე მისი პირობითი სასჯელი რეალურით შეცვალა. ეს მოხდა ნავალნის გერმანიიდან დაბრუნების შემდეგ, სადაც ის მკურნალობდა რუსეთში “ნოვიჩოკით” მოწამვლის შემდეგ.
2022 წლის ივნისში, ნავალნი პოკროვის ზოგადი რეჟიმის კოლონიიდან მელეხოვოს მკაცრი რეჟიმის კოლონიაში გადაიყვანეს. მის სისხლისსამართლებრივ დევნას თავად ნავალნი, რუსი უფლებადამცველები და საერთაშორისო თანამეგობრობა პოლიტიკურ დევნად მიიჩნევენ. სადამსჯელო საკანი პატიმრობის განსაკუთრებით მკაცრი პირობებით გამოირჩევა. ნავალნი მას აღწერდა, როგორც ორი – სამ მეტრზე ზომის საკანს, სადაც მას რკინის უზურგო სკამზე უხდებოდა ჯდომა. ის ასევე ჰყვებოდა, რომ სადამსჯელო საკანში არის მხოლოდ ადუღებული წყალი და ერთი წიგნი, განსხვავებით ჩვეულებრივი საკნისგან, სადაც არის “ყავა და ორი წიგნი”.
“მედიაზონამ” მსგავსი სადამსჯელო საკნის ვირტუალური სიმულატორი შექმნა.
