ამნისტია შეეხება იმ მოქალაქეებს ვინც 2024 წლის 1 სექტემბრამდე დააბრუნებს მიწის ნაკვეთს ან სრულად აანაზღაურებს დანაშაულის შედეგად ქვეყნისთვის მიყენებულ ზიანს
პრემიერ-მინისტრ ირაკლი ღარიბაშვილის ინიციატივით, ამნისტია ცხადდება იმ მოქალაქეებისთვის, რომლებმაც 2023 წლის პირველ სექტემბრამდე სახელმწიფო საკუთრებაში არსებული სასოფლო-სამეურნეო მიწის ნაკვეთები უკანონოდ დაირეგისტრირეს. პირობა მარტივია – პრემიერის თქმით, სისხლის სამართლებრივი პასუხისმგებლობისგან გათავისუფლდება ყველა ის პირი, რომელიც 2024 წლის 1 სექტემბრამდე დააბრუნებს მიწის ნაკვეთს ან სრულად აანაზღაურებს დანაშაულის შედეგად ქვეყნისთვის მიყენებულ ზიანს.
წლების განმავლობაში დაგროვდა შემდეგი სახის პრობლემა: ჩვენმა მოქალაქეებმა უკანონოდ დაირეგისტრირეს სახელმწიფო საკუთრებაში არსებული სასოფლო-სამეურნეო მიწის ნაკვეთები და ეს იყო რეალურად ძალიან დიდი პრობლემა. ათეულობით საქმე დევს პროკურატურაში, მიმდინარეობს გამოძიება, ძალიან ბევრი გაუგებრობა მოხდა ამასთან დაკავშირებით. ჩვენ კონსულტაცია გვქონდა პროკურატურასთან, პარლამენტთან და გამოვდივარ ინიციატივით, რომ ასეთ საქმეებზე ამნისტია გამოვაცხადოთ,- ამის შესახებ პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.
მან განმარტა, თუ რას გულისხმობს აღნიშნული ამნისტია და ვის შეეხება ის.
„ამნისტია გავრცელდება სსკ-ის 180-ე და 662-ე მუხლებით ჩადენილ დანაშაულებზე. ამნისტიის ფარგლებში, ამ მუხლებით გათვალისწინებული დანაშაულის ჩადენისთვის სისხლის სამართლებრივი პასუხისმგებლობისგან, პირობითი მსჯავრის, სასჯელისგან, მათ შორის აღუსრულებელი ჯარიმისგან გათავისუფლდება პირი, რომელმაც 2023 წლის 1-ელ სექტემბრამდე დანაშაულებრივი გზით მოიპოვა სახელმწიფო საკუთრებაში არსებული სასოფლო-სამეურნეო დანიშნულების მიწის ნაკვეთზე საკუთრების უფლება. ამასთან, მინდა აღვნიშნო, რომ ამნისტია გავრცელდება მხოლოდ იმ პირზე, რომელიც 2024 წლის 1-ელ სექტემბრამდე სრულად აანაზღაურებს დანაშაულის ჩადენის შედეგად სახელმწიფოსთვის მიყენებულ ზიანს. აქვე უნდა განვმარტო, რომ ამნისტია არ გავრცელდება მოხელის მიერ ასევე სახელმწიფო საწარმოების, საჯარო სამართლის იურიდიული პირების და არასამეწარმეო იურიდიული პირების თანამშრომლების მიერ სამსახურებრივი მდგომარეობის გამოყენებით, აგრეთვე ორგანიზებული ჯგუფის მიერ დანაშაულის ჩადენის შემთხვევებზე.
სახელმწიფოსთვის მიყენებული ზიანის ანაზღაურება უნდა მოხდეს დანაშაულებრივი გზით მოპოვებული სასოფლო-სამეურნეო დანიშნულების მიწის ნაკვეთზე ყოველგვარი უფლებრივი ტვირთისგან თავისუფალ მდგომარეობაში საკუთრების უფლების სახელმწიფოს სასარგებლოდ მიტოვების გზით, ხოლო, თუ ეს შეუძლებელია მიწის ნაკვეთის ღირებულების ეკვივალენტური თანხის გადახდის გზით“, – განაცხადა ღარიბაშვილმა.
მან მიმართა მთავრობის ადმინისტრაციის ხელმძღვანელს, რეზო ჯაველიძეს, რომ მთავრობის სხდომის დასრულების შემდეგ მოქალაქეებს დეტალურად მიაწოდოს ინფორმაცია, რას გულისხმობს აღნიშნული ამნისტია.
„ეს პროექტი გაკეთებული გვაქვს, გადავუგზავნით პარლამენტს და ამნისტია გაათავისუფლებს ჩვენ ძალიან ბევრ თანამოქალაქეს. ეს ტვირთი მოეხსნებათ, ძალიან ბევრი გაუგებრობა წარმოიქმნა ამის შედეგად“, – განაცხადა ღარიბაშვილმა.
პრემიერ-მინისტრის ინიციატივით, პირი, ვისზეც ამნისტია გავრცელდება, ნასამართლეობის არმქონედ ჩაითვლება. მთავრობის სხდომის დასრულების შემდეგ ადმინისტრაციის უფროსმა განმარტა, რომ ამნისტია 2025 წლის პირველ იანვრამდე უნდა აღსრულდეს.
ამნისტია გავრცელდება სისხლის სამართლის კოდექსის 180-ე მუხლზე, რომელიც თაღლითობას ეხება და 362-ე მუხლზე, რაც ყალბი დოკუმენტების მომზადებას გულისხმობს. ამნისტია შეეხებათ კანონის დამრღვევი პირების თანამონაწილეებსაც. გადაწყვეტილება არ გავრცელდება საჯარო მოხელეებზე, სახელმწიფო საწარმოების, საჯარო სამართლის იურიდიულ პირებზე. მთავრობის მეთაურმა კონსულტაცია პროკურატურასთანაც გაიარა.
საპარლამენტო ოპოზიციის ნაწილი პრემიერ-მინისტრის ინიციატივას ეთანხმება. მათი შეფასებით, ამნისტიის გამოცხადება აუცილებელია და ამ პროექტს მხარს დაუჭერენ.
ამნისტია არ გავრცელდება მოხელის მიერ, ასევე სახელმწიფო საწარმოების, საჯარო სამართლის იურიდიული პირების და არასამეწარმეო იურიდიული პირების თანამშრომლების მიერ სამსახურებრივ მდგომარეობის გამოყენებით, აგრეთვე ორგანიზებული ჯგუფის მიერ დანაშაულის ჩადენის შემთხვევებზე.
სახელმწიფოსთვის მიყენებული ზიანის ანაზღაურება უნდა მოხდეს დანაშაულებრივი გზით მოპოვებული სასოფლო-სამეურნეო დანიშნულების მიწის ნაკვეთზე ყოველგვარი უფლებრივი ტვირთისგან თავისუფალ მდგომარეობაში, საკუთრების უფლების სახელმწიფოს სასარგებლოდ მიტოვების გზით, ხოლო თუ ეს შეუძლებელია, მიწის ნაკვეთის ექვივალენტური თანხის გადახდის გზით.
პრემიერის ინიციატივას პარლამენტში მხარდაჭერა ექნება მმართველი გუნდისგან. “ქართულ ოცნებაში” ამბობენ, რომ მოქალაქეების მიერ უკანონოდ დაირეგისტრირებული სახელმწიფო საკუთრებაში არსებული სასოფლო-სამეურნეო მიწის ნაკვეთები წლების განმავლობაში გადაუჭრელი პრობლემა იყო.
პრემიერის საკანონმდებლო ინიციატივა უკვე მზადაა. ის უახლოეს მომავალში პარლამენტს გადაეგზავნება.
