ჩაერთვება თუ არა თურქეთი ყარაბახის კონფლიქტში – სომხეთი მიმართვას ავრცელებს
რუსეთის ფედერაციის საგარეო საქმეთა მინისტრი, სერგეი ლავროვი შეშფოთებულია მთიან ყარაბაღში, „კონტაქტის ხაზის გასწვრივ სროლებით“, რომელიც 27 სექტემბრის დილას დაიწყო.
ამის შესახებ მან აზერბაიჯანის საგარეო საქმეთა მინისტრთან, ჯეიჰუნ ბაირამოვთან სატელეფონო საუბრის დროს განაცხადა.
ლავროვმა ასევე აღნიშნა, რომ „აუცილებელია ცეცხლის სასწრაფო შეწყვეტა“.
რამდენიმე საათით ადრე, დაახლოებით მსგავსი საუბარი შედგა რუსეთისა და სომხეთის საგარეო საქმეთა მინისტრებს შორის.
კიდევ ერთი გავლენიანი მეზობელი ქვეყნის, თურქეთის პრეზიდენტმა, რეჯეფ თაიფ ერდოღანმა სომეხ ხალხს მოუწოდა „გამოვიდნენ ხელისუფლების წინააღმდეგ, რომელსაც ის ტრაგედიისკენ მიჰყავს და მოსახლეობას ისე იყენებს, როგორც თოჯინას“.
ერდოღანმა Twitter-ის საკუთარ გვერდზე დაწერა, რომ „მთელი მსოფლიო უნდა დადგეს აზერბაიჯანის გვერდით ოკუპაციისა და ბოროტების წინააღმდეგ ბრძოლაში“.
აზერბაიჯანის თავდაცვის სამინისტრომ საომარი მოქმედებების ადგილას გადაღებული ეს ვიდეო გაავრცელა.
სომხეთის პრემიერ-მინისტრმა საერთაშორისო სტრუქტურებს მოუწოდა, შეაჩერონ თურქეთის ყარაბაღის კონფლიქტში ჩარევა
ნიკოლ ფაშინიანის თქმით, თურქეთის ჩარევამ, შესაძლოა, საბოლოოდ შეარყიოს სიტუაცია რეგიონში.
„ფართომასშტაბიან ომს სამხრეთ კავკასიაში, რომლის ზღვარზეც ჩვენ ახლა ვდგავართ, შეიძლება ჰქონდეს ყველაზე არაპროგნოზირებადი შედეგები. ის
შეიძლება რეგიონის ფარგლებს გაცდეს და უფრო ფართო მასშტაბები შეიძინოს, საფრთხის წინაშე დააყენოს საერთაშორისო უსაფრთხოება და სტაბილურობა“, – განაცხადა პრემიერმა.
ფაშინიანმა ასევე თქვა, რომ სომხეთი სრულად უჭერს მხარს ყარაბაღის ხელისუფლებას.
უფრო მეტიც, პრემიერის თქმით, ერევანს შეუძლია აზერბაიჯანს საბრძოლო მოქმედებების შეწყვეტა აიძულოს და მშვიდობა დაამყაროს.
2020 წლის 27 სექტემბერის დილას, ყარაბაღსა და აზერბაიჯან-სომხეთის საზღვარზე, საბრძოლო მოქმედებები დაიწყო.
აზერბაიჯანის მთელ ტერიტორიაზე, მკვეთრად შეიზღუდა ინტერნეტთან წვდომა
აზერბაიჯანის ტრანსპორტის, კავშირგაბმულობისა და მაღალი ტექნოლოგიების სამინისტრომ განაცხადა, რომ მთელი ქვეყნის მასშტაბით მკვეთრად შეიზღუდა ინტერნეტი – „სომხეთის მხრიდან ფართომასშტაბიანი პროვოკაციის აღსაკვეთად“.
„იმედი გვაქვს, რომ აზერბაიჯანის მოქალაქეები გაგებით მოეკიდებიან შეზღუდვებს, რომელიც შეიძლება წარმოიშვას ინტერნეტთან დაკავშირებით კონფლიქტური ვითარების გამო“, – ნათქვამია განცხადებაში.
26 სექტემბერს, სომხეთსა და აზერბაიჯანში აშშ-ის საელჩოების ვებგვერდებზე, ამერიკის მოქალაქეებისთვის Security Alert გამოქვეყნდა საბრძოლო მოქმედებების განახლების საფრთხის გამო. სომხეთში მყოფ ამერიკის მოქალაქეებს რეკომენდაცია მიეცათ, არ წავიდნენ ტავუშსა და ყარაბაღში. აზერბაიჯანში მყოფ ამერიკის მოქალაქეებს კი ურჩიეს, არ დატოვონ აფშერონის ნახევარკუნძული.
გამოყენებულია jam-news – ის მასალები