ქართული ოცნება დეოლიგარქიზაციის შესახებ კანონს დეკემბრამდე აღარ მიიღებს
ქართული ოცნება დეოლიგარქიზაციის შესახებ კანონს დეკემბრამდე აღარ მიიღებს.
ამის შესახებ პარტიის თავმჯდომარემ, ირაკლი კობახიძემ განაცხადა.
მისი განმარტებით, ევროპელმა პარტნიორებმა, მათ შორის, ევროკომისარმა, ასევე შარლ მიშელმა, საქართველოს პრემიერ-მინისტრ ირაკლი ღარიბაშვილთან შეხვედრაზე ითხოვეს, რომ მმართველმა გუნდმა, დეოლიგარქიზაციის შესახებ კანონი, მესამე მოსმენით არ მიიღოს.
„ჩვენ მომავალ კვირაში ვგეგმავდით დეოლიგარქიზაციის შესახებ კანონის საბოლოო – მესამე მომსმენით მიღებას, თუმცა იცით, რომ პრემიერს ბრიუსელში ვიზიტი ჰქონდა, უმაღლეს დონეზე შეხვედრები შედგა, მათ შორის შარლ მიშელთან, ევროკომისართან და იქ ასეთი თხოვნა იქნა დაყენებული, რომ ამ ეტაპზე ეს კანონი არ იყოს მესამე მოსმენით მიღებული. შესაბამისად, ჩვენ, რა თქმა უნდა, ანგარიშს ვუწევთ ამ თხოვნას. მომავალ კვირაში არ იქნება მიღებული ეს კანონი, არც დეკემბრამდე მივუბრუნდებით. ჩვენ დაველოდებით ყველა შემთხვევაში დეკემბერში ევროკომისიის და ევროსაბჭოს მიერ გამოხატულ პოზიციას. ამ თემასთან დაკავშირებით ჩვენ გვაინტერესებს მოიხსნება თუ არა დეოლიგარქიზაციის საკითხი, რაც თავისთავში გულისხმობს პერსონალიზებულ მიდგომას. მანამდე არ ვაპირებთ, რომ მივუბრუნდეთ ამ კანონპროექტის განხილვას,“ – განაცხადა კობახიძემ.
დეოლიგარქიზაციის შესახებ კანონი, პარლამენტმა უკვე ორი მოსმენით მიიღო.
