ბადრი ჯაფარიძეს სასამართლომ 50 000-ლარიანი გირაო შეუფარდა

თბილისის საქალაქო სასამართლომ პარტია „ლელოს“ ერრთ-ერთ ლიდერს, ბადრი ჯაფარიძეს აღკვეთის ღონისძიების სახით 50 000-ლარიანი გირაო შეუფარდა.ჯაფარიძეს წულუკიანის საგამოძიებო კომისიაზე არგამოცხადებას ედავებიან.
აღნიშნული გადაწყვეტილება თბილისის საქალაქო სასამართლოს მოსამართლემ, ეკა ბარბაქაძემ მიიღო. მისივე გადაწყვეტილებით, გირაოს შეტანის ვადად 50 დღე განისაზღვრა.

50 000-ლარიანი გირაოს შეფარდებას ბრალდების მხარე ითხოვდა. როგორც პროცესის დაწყებამდე პროკურორმა განაცხადა, საქმეში არსებობს მტკიცებულებათა ერთობლიობა, რომლითაც სისხლის სამართლის კანონის დარღვევა დგინდება.
სხდომას ესწრებოდა თავად ბრალდებულიც.

თავად ბადრი ჯაფარიძემ განაცხადა, რომ აღნიშნული სისხლის სამართლის საქმეები რეპრესიების ახალი ტალღაა, რითიც მმართველი გუნდი ოპონენტების დევნას და გაშავებას ცდილობს.

„არაერთხელ გვითქვამს, ეს არის რეპრესიების ახალი ტალღა „ქართული ოცნების“ მხრიდან. რა თქმა უნდა, არანაირ კანონის დარღვევას ადგილი არ ჰქონია, ეს არის კონსტიტუციის დარღვევით შექმნილი ე.წ. საგამოძიებო კომისია, რომლის ერთადერთი ამოცანაა ოპონენტების დევნა, შევიწროება, გაშავება. ეს სასამართლო პროცესი ელვისებურად ჩაინიშნა, მზად ვართ, ნებისმიერი გამოწვევისთვის“, – განაცხადა ბადრი ჯაფარიძემ.
მიმაჩნია, რომ კანონი არ დამირღვევია, ასევე, მიმაჩნია, რომ არაადეკვატურია აღკვეთის ღონისძიების გამოყენება ჩემს მიმართ, რადგან ჩემი ცხოვრება, ჩემი ბიოგრაფია ამ ქვეყანაზეა მიბმული,- ამის შესახებ “ლელო-ძლიერი საქართველოს” ერთ-ერთმა ლიდერმა ბადრი ჯაფარიძემ სასამართლო პროცესზე განაცხადა.

როგორც მან აღნიშნა, ის მიიჩნევს, რომ პარლამენტი არალეგიტიმურია და მის მიერ შექმნილ კომისიასაც არ აღიარებს.

„ქალბატონო მოსამართლე, მინდა გითხრათ, რომ თავს არ მივიჩნევ კანონდამრღვევად, კანონის დარღვევად რომ ჩაითვალოს, მოთხოვნა უნდა იყოს კანონიერი. ეს არ იყო კანონიერი მოთხოვნა, უფრო მეტიც, ეს პირდაპირი პოლიტიკური ანგარიშსწორებისთვის შექმნილი დე-ფაქტო, ერთპარტიული დაჯგუფებაა. მთელი ეს პერიოდი დაკავებული იყვნენ ჩემი ლანძღვა-გინებით, უდანაშაულობის პრეზუმფციის დარღვევით. საგამოძიებო კომისია, როცა ლეგიტიმურ პარლამენტში იქმნება, მისი ნახევარი ოპოზიციის წარმომადგენელი უნდა იყოს, ეს ადამიანები ყველაზე ერთგული მხარდამჭერები არიან “ქართული ოცნების”, მისი წევრები ყველაზე ლოიალურები არიან “ქართული ოცნების” მიმართ, “ქართულმა ოცნებამ” ისინი როგორც ოპოზიციური წარმომადგენლები, ისე ჩაწერა, ეს პოლიტიკური თაღლითობაა.

იმ დაჯგუფების გამოძახებაზე, რომელიც ჩემს „გაშავებას“, დისკრედიტაციას ისახავდა მიზანს, არ ვაპირებდი ასეთი კომისიის გამოძახებაზე მისვლას. საშუალებას არ მივცემ “ქართული ოცნების” დაჯგუფებას ე.წ. საგამოძიებო კომისია პოლიტიკური ანგარიშსწორების ინსტრუმენტად გამოიყენოს.

ცხადია, მიმაჩნია, რომ ბრალი უსაფუძვლოა, მითუმეტეს, გირაო. აქ ისე იყო წარმოჩენილი, რომ მე კრიმინალი ვარ, რომელიც შეიძლება მივიმალო. ჩემი ავტობიოგრაფია ცნობილია პროკურორისთვის, მე სამჯერ არჩეული პარლამენტის წევრი ვიყავი. ახლა მე ვთქვი უარი ჩემს მანდატზე იმის გამო, რომ მთელი ცივილიზებული სამყაროს მიერაა აღიარებული, რომ არჩევნები მიტაცებულია. შესაბამისად, არალეგიტიმური პარლამენტის მიერ არალეგიტიმურად შექმნილი კომისიის გამოძახების შედეგად არ მივიდოდი. მიმაჩნია, რომ კანონი არ დამირღვევია, ასევე, მიმაჩნია, რომ არაადეკვატურია აღკვეთის ღონისძიების გამოყენება ჩემს მიმართ, რადგან ჩემი ცხოვრება, ჩემი ბიოგრაფია ამ ქვეყანაზეა მიბმული. არსად წასვლას არ ვაპირებ, არც არასდროს წავსულვარ, მათ შორის, გადატრიალების შემდეგაც, საქართველოში დავრჩი როცა გადატრიალება იყო და სიცოცხლის მოსპობა მემუქრებოდა, არც ამ შემთხვევაში წავალ“,- განაცხადა ჯაფარიძემ.

სასამართლო პროცესზე პროკურატურამ გააჟღერა ინფორმაცია, რომ ბადრი ჯაფარიძეს შეტყობინებაც გაუგზავნეს გამოცხადებასთან დაკავშირებით, რაზეც მას კითხვა მოსამართლე ეკა ბარბაქაძემ დაუსვა.

ჯაფარიძემ მოსამართლის კითხვის საპასუხოდ განაცხადა, რომ ის “უცხო ნომრებიდან მიღებულ შეტყობინებებს, უსაფრთხოებიდან გამომდინარე, თავს არიდებს, შესაბამისად, მას ის შეტყობინება არ წაუკითხავს”.

ცნობისთვის, ბადრი ჯაფარიძე საქართველოს პარლამენტის დროებითი საგამოძიებო კომისიის სხდომაზე 25 მარტს ახსნა-განმარტებისთვის იყო დაბარებული, სადაც ის არ გამოცხადდა. აღნიშნულის შემდეგ, ჯაფარიძემ ჩვენება მაგისტრატი მოსამართლის წინაშე მისცა.

გამოკითხვის შემდეგ ბადრი ჯაფარიძეს ბრალდება სისხლის სამართლის კოდექსის 349-ე მუხლით წარედგინა, რაც “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” გულისხმობს. აღნიშნული ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.
ცნობისთვის, ამავე ბრალდებით, “ძლიერი საქართველოს” კიდევ ერთ ლიდერს, მამუკა ხაზარაძეს სასამართლომ 50 000-ლარიანი გირაო გასულ კვირას შეუფარდა.