ბახმუტთან საბრძოლო მოქმედებებისას ორი რუსი პოლკოვნიკი მოკვდა

რუსეთის თავდაცვის სამინისტროს ცნობით, 13-14 მაისს ბახმუტის ტერიტორიაზე საბრძოლო მოქმედებებისას 2 რუსი პოლკოვნიკი დაიღუპა.
ინფორმაციას სახელისუფლებო, პროპაგანდისტული მედია RIA Novosti თავდაცვის სამინისტროზე დაყრდნობით ავრცელებს.
რუსეთის სამხედრო უწყება ხშირად არ ადასტურებს მაღალი რანგის მეთაურების სიკვდილს და არ ამჟღავნებს მათ ვინაობას. სამინისტროს ცნობით, ორი მაღალი რანგის რუსი ოფიცერი უკრაინელი სამხედროების თავდასხმების მოგერიებისას ბახმუტის სამხრეთ-დასავლეთით, დასახლებული პუნქტ კრასნოეს ტერიტორიაზე დაიღუპნენ. უწყება ამტკიცებს, რომ პოლკოვნიკები უშუალოდ ხელმძღვანელობდნენ პირადი შემადგენლობის ქმედებებს და ბროლის ველზე “გმირულად” დაიღუპნენ.
როგორც მედია შოიგუს უწყებაზე დაყრდნობით წერს, დაიღუპნენ რუსეთის არმიის მეოთხე მოტორიზებული იარაღის ბრიგადის მეთაური, პოლკოვნიკი ვიაჩესლავ მაკაროვი და სამხედრო-პოლიტიკური სამუშაოების სამხედრო კორპუსის მეთაურის მოადგილე, პოლკოვნიკი ევგენი ბროვკო, სავარაუდოდ, “შეტევების მოგერიებისას” დაიღუპნენ.

პროპაგანდისტები წერენ, რომ, სავარაუდოდ, მაკაროვი პირადად ხელმძღვანელობდა ბრძოლას და “შეტევის მოგერიებისას” მძიმედ დაიჭრა, ხოლო ევაკუაციისას გარდაიცვალა.

რაც შეეხება ბროვკოს, RIA-ს ცნობით, ის რუსების მოქმედებებს სხვა რაიონში ხელმძღვანელობდა და მრავლობითი ჭრილობების შედეგად დაიღუპა.

ბახმუტის მახლობლად ბოლო დღეებში უკრაინელი სამხედროები აქტიურად უტევენ ქალაქის ჩრდილოეთით და სამხრეთით განლაგებულ რუსეთის დანაყოფებს და დაფიქსირდა უკრაინული ჯარების ტაქტიკური წარმატებები. ამ ქალაქში მყოფი რუსეთის კერძო სამხედრო კომპანია „ვაგნერის“ ხელმძღვანელმა ევგენი პრიგოჟინმა გაავრცელა ინფორმაცია ფლანგებიდან რუსი სამხედროების უწესრიგო უკუქცევის შესახებ. პრიგოჟინს რუსი პოლკოვნიკების დაღუპვაზე კომენტარი ჯერ არ გაუკეთებია. 12 მარტს რუსეთის თავდაცვის სამინისტრომ უკვე ოფიციალურად აღიარა უკრაინის დონეცკის რეგიონის ქალაქ ბახმუტის ჩრდილოეთით მდებარე პოზიციებიდან უკან დახევა და რუსეთის არმიის მიერ ბერეხოვკის წყალსაცავთან „უფრო ხელსაყრელ“ პირობებში „ახალი მიჯნის“ დაკავება.