პრეზიდენტის წლიური ანგარიში [Audio]
საქართველოს პრეზიდენტი მიიჩნევს, რომ ეკონომიკური რეფორმების შემუშავება და დანერგვა ბიზნესთან კონსულტაციების გარეშე არ უნდა ხდებოდეს. განცხადება მარგველაშვილმა პარლამენტში წლიური ანგარიშის წარდგენისას გააკეთა და პარლამენტს შრომის უსაფრთხოების მინიმალური სტანდარტების შექმნისაკენ მოუწოდა.
პრეზიდენტი მიიჩნევს, რომ საჭიროა კონკურენციის კანონის უფრო ქმედითად ფორმულირება, აღსრულება და კონკურენციის სააგენტოს უფრო გააქტიურება.
პრეზიდენტის განცხადებით, ბოლო პერიოდში არსებობს ტენდენცია, რომ მსხვილი ბიზნესი კიდევ უფრო მსხვილდება, შედარებით მცირე ბიზნესის შესყიდვა-შერწყმის ხარჯზე.
მარგველაშვილი მიიჩნევს, რომ გასაგრძელებელი და გასაღრმავებელია ის პოზიტიური პროექტები, რომელიც საქართველოს მთავრობის აქტიური ძალისხმევით განხორციელდა.
საქართველოს პრეზიდენტი, გიორგი მარგველაშვილი, სასამართლო სისტემაში არსებულ ვითარებასა და კრიზისზეც საუბრობს.
საქართველოს პრემიერმინისტრი, პრეზიდენტის გამოსვლას აფასებს. გიორგი კვირიკაშვილი არ ეთანხმება გიორგი მარგველაშვილის შეფასებებს სასამართლო სისტემაზე, ეკონომიკურ განვითარებასა და ასევე დემოკრატიული ინსტიტუტების განვითარებაზე.
საქართველოს მინისტრთა კაბინეტის წევრებმა პარლამენტში პრეზიდენტის სიტყვით გამოსვლა შეაფასეს. დავით სერგეენკო და მიხეილ ჯანელიძე პრეზიდენტის გამოსვლაში მეტ სიღრმისეულ შეფასებებებს ელოდნენ.
ფრაქცია ნაციონალური მოძრაობის წევრი, ნიკა მელია, პრეზიდენტის გამოსვლის შემდეგ პარლამენტარების წინაშე სიტყვით გამოვიდა. ის მთავრობის წევრებს დებატებზე არდასწრების გამო აკრიტიკებს და აღნიშნავს, რომ ეს ნათლად გამოხატავს მათ დამოკიდებულებას პრეზიდენტის ინსტიტუტის მიმართ.
„დიდი ხანია, მიმაჩნია, რომ ჩვენ ყველა გავურბივართ ჩვენი ქვეყნის ტერიტორიული გაერთიანების თემას და სიღრმისეულად არ ვსაუბრობთ ამ საკითხზე,“ – ასე აფასებს ადა მარშანია პრეზიდენტის სიტყვით გამოსვლას. მან აღნიშნა, რომ მარგველაშვილის გამოსვლის შემდეგ გარკვეულწილად უკმაყოფილების განცდა გაუჩნდა.
პარლამენტის ფრაქცია ევროპული საქართველოს თავმჯდომარე ოთარ კახიძე, პარლამენტში სიტყვით გამოსვლისას, გასული წლის საპრეზიდენტო მოხსენების შემდგომ ქვეყანაში მართლმსაჯულების სფეროში განვითარებულ მოვლენებზე საუბრობს.
“პრეზიდენტს ძალიან ბევრი მნიშვნელოვანი საკითხი გამორჩა,” – მმართველი გუნდის წევრი, ეკა ბესელია, საქართველოს პრეზიდენტი საკანონმდებლო ორგანოში სიტყვით გამოსვლას უარყოფითად აფასებს. საქართველოს პარლამენტის იურიდიულ საკითხთა კომიტეტის თავმჯდომარის თქმით პრეზიდენტის გამოსვლის აქცენტებიც არაადეკვატური იყო.
