ბელგიამ საფრანგეთს პარიზის ტერაქტების ორგანიზატორი გადასცა [Video]
2015 წლის ნოემბერში განხორციელებულ პარიზის ტერაქტებში მთავარი ეჭვმიტანილი – სალაჰ აბდესლამი საფრანგეთშია ექსტრადირებული – ბელგიის პროკურატურაზე დაყრდნობით იუწყება BBC.
ბელგიური მედიის მონაცემებით, ეჭვმიტანილის გადაცემის ოპერაცია კონფიდენციალობის მკაცრი დაცვით 27 აპრილს განხორციელდა.
ბელგიაში დაბადებული 26 წლის სალაჰ აბდესლამი, რომელმაც საფრანგეთის მოქალაქეობა მიიღო, პარიზის ტერაქტების ერთ-ერთ ცოცხალ ორგანიზატორად ითვლება.
ადესლამი თვითონ არ უარყოფს, რომ აფეთქებების დროს პარიზში იმყოფებოდა. იგი 18 მარტს ბრიუსელის გარეუბანში დააკავეს. მისი დაკავებიდან 4 დღის შემდეგ ბრიუსელში აფეთქებათა სერია მოხდა, რის შედეგადაც 35 ადამიანი დაიღუპა, 300 კი მძიმედ დაშავდა. აბდესლამის ადვოკატი – სვენ მარი ამტკიცებს, რომ მისმა დასაცავმა პირმა ბრიუსელის ტერაქტების შესახებ არაფერი იცოდა.
აბდესლამთან ერთად პარიზის ტერაქტებში კიდევ 4 ეჭვმიტანილი დააკავეს.
შეგახსენებთ, რომ 2015 წლის 13 ნოემბერს საფრანგეთის დედაქალაქში ტერაქტების სერია მოხდა. 20 ნოემბრის მონაცემებით, აფეთქებებს 130 ადამიანის სიცოცხლე შეეწირა, 350 კი მძიმედ დაიჭრა.
