კრიმინალიმნიშვნელოვანირეგიონისაქართველოსიახლეები

ბილანიშვილი გვარამიას ქარტიაში უჩივის

ავთანდილ ბილანიშვილი, რომელიც ტელეკომპანია „მთავარი არხის“ მიერ გავრცელებული ინფორმაციით, 19 წლის ფეხბურთელის, გიორგი შაქარაშვილის გარდაცვალების საქმის ერთ-ერთი მონაწილეა, „მთავარი არხის“ გენერალურ დირექტორს, ნიკა გვარამიას ჟურნალისტური ეთიკის ქარტიაში უჩივის.

ბილანიშვილი, მეტსახელად “კაწრო” ნიკა გვარამიას ჟურნალისტური ეთიკის ქარტიის სამი მუხლის დარღვევას ედავება. მათ შორის, – ზუსტი და წყაროზე დაფუძნებული ინფორმაციის გავრცელების დარღვევას.

ჟურნალისტური ეთიკის ქარტიამ, “მთავარი არხის” დირექტორის, ნიკა გვარამიას წინააღმდეგ სარჩელი დასაშვებად სცნო. თუმცა, ქარტიის ინფორმაციით, თავდაპირველად მოსარჩელე 19 წლის ფეხბურთელის, გიორგი შაქარაშვილის საქმის ფიგურანტი, ავთანდილ ბილანიშვილი, იგივე “კაწრო” იყო, რომელიც მოგვიანებით მისმა ცოლმა, ნათია რუხაიამ ჩაანაცვლა.

„მხარე სადავოდ ხდის 2020 წლის 07 ივლისს ნიკა გვარამიას მიერ გავრცელებულ ინფორმაციას, რომ გიორგი შაქარაშვილის საქმეზე გავრცელებულ კადრებში თეთრპერანგიანი ახალგაზრდა მამაკაცი ავთანდილ ბილანიშვილი იყო. აღნიშნულ საქმეზე ქარტიას თავდაპირველად ავთანდილ ბილანიშვილმა მომართა, თუმცა, მოგვიანებით, ქარტიის სამდივნოსთან კომუნიკაციის შედეგად, საქმეზე განმცხადებელი დაზუსტდა და ბილანიშვილი ნათია რუხაიამ შეცვალა.” – ნათქვამია ჟურნალისტური ეთიკის ქარტიის განცხადებაში.

ქარტიის საბჭო განცხადებას ღია სხდომაზე განიხილავს და გადაწყვეტს, დაირღვა თუ არა ქარტიის პრინციპები.

19 ივნისს, მცხეთაში მომხდარი ინციდენტის შემდეგ, “მთავარმა არხმა” ავთანდილ ბილანიშვილი შაქარაშვილის საქმესთან შემხებლობაში არაერთხელ ახსენა. არხი მას ქუჩის ავტორიტეტად მოიხსენიებდა და აღნიშნავდა, რომ ბილანიშვილს ხელს აფარებდნენ, რადგან ბიძინა ივანიშვილის შვილის, ბერა ივანიშვილის მეგობარია.

7 ივლისს, “მთავარმა არხმა” გაავრცელა საქმეში არსებული ვიდეოჩანაწერის ფრაგმენტი, სადაც გიორგი შაქარაშვილის მცხეთიდან ჩამოსული მეგობრის, გურამ ამირხანაშვილის დიდუბის მეტროს მიმდებარე ტერიტორიაზე ყოფნაა ასახული. “მთავარი არხის” ვერსიით, ვიდოკადრებში გამოჩენილი კაცი, სავარაუდოდ, ავთანდილ ბილანიშვილია და ის 4 წუთის განმავლობაში ამირხანაშვილს ესაუბრება.

კადრებში, რომელიც 19 ივნისის სათვალთვალო კამერებით არის გადაღებული, ჩანს, რომ მას შემდეგ, რაც ლუკოილის ბენზინგასამართ სადგურთან გურამ ამირხანაშვილი “ტოიოტა კამრიდან” გადმოდის, თითქოს ქუჩაზე გადასვლას ცდილობს, შემდეგ კი, უკან ბრუნდება. რამდენიმე წუთში ადგილზე მიდის თეთრი მიკროავტობუსი, საიდანაც გადმოდის თეთრპერანგიანი ახალგაზრდა კაცი და მიდის იმ მიმართულებით, სადაც დგას ამირხანაშვილი. მთავარი არხი ვარაუდობს, რომ ის ავთანდილ ბილანიშვილი, იგივე “კაწროა”, რომელიც ამირხანაშვილს ოთხი წუთის განმავლობაში ელაპარაკება და, სავარაუდოდ, ამირხანაშვილს ჩვენების მიცემის თაობაზე “ამუშავებს”.

ავთანდილ ბილანიშვილი გამოძიებამ 8 ივლისს გამოკითხა.

შინაგან საქმეთა სამინისტროს ინფორმაციით, “მთავარი არხის” მიერ შაქარაშვილის საქმეზე გავრელებულ კადრებში ავთანდილ ბილანიშვილი არ ჩანს.

მოგვიანებით, შსს-მ განცხადება გაავრცელა, რომლის მიხედვითაც, 19 ივნისის ღამეს, დიდუბის ტერიტორიაზე გადაღებულ ვიდეოკადრებში ხაშურში მცხოვრები ლაშა ლურსმანაშვილი ჩანს და არა ავთანდილ ბილანიშვილი. შსს “მაღალი საზოგადოებივი ინტერესიდან გამომდინარე” აცხადებს, რომ ქუთაისი-თბილისის მიმართულებით მოძრავი თეთრი მიკროავტობუსიდან სწორედ ლურსმანაშვილი გადმოვიდა.

თავად ლაშა ლურსმანაშვილმა ოთხსაათიანი გამოკითხვის შემდეგ თქვა, რომ დიდუბეში “პირად საქმეზე” გაჩერდა და გიორგი შაქარაშვილის საქმის მოწმემ, გუკა ამირხანაშვილმა მას დარეკვა სთხოვა.

მსგავსი პოსტები

Back to top button