ღაზას სექტორში ჰუმანიტარული ტვირთის შეტანა შეწყდა-ომის 56 დღე ახლო აღმოსავლეთში
დღეს, 1 დეკემბერს ადგილობრივი დროით 07:00 საათზე ამოიწურა ისრაელსა და პალესტინელთა რადიკალურ მოძრაობა „ჰამასს“ შორის დროებითი ჰუმანიტარული ზავის მოქმედების ვადა.
ჰუმანიტარული ზავის მოქმედების ვადის ამოწურვამდე დაახლოებით ერთი საათით ადრე ისრაელის იმ რაიონებში, რომლებიც ღაზის სექტორს ესაზღვრება, საჰაერო განგაში გამოცხადდა. ისრაელის მედიამ გაავრცელა ცნობა, რომ საჰაერო თავდაცვის სისტემამ ღაზის სექტორიდან ნასროლი რაკეტა მოიგერია. ისრაელის თავდაცვის არმიამ წარმატებით მოგერიება დაადასტურა, თუმცა, მის ოფიციალურ შეტყობინებაში კონკრეტულად რაკეტა ნახსენები არ არის.
საინფორმაციო სააგენტოს ცნობით, გამშვები პუნქტ რაფაჰის გავლით ჰუმანიტარული ტვირთის გადატანა საბრძოლო მოქმედებების განახლების შემდეგ შეწყდა.
როგორც Reuters იუწყება, ჰუმანიტარული ტვირთის რაოდენობა ცეცხლის შეწყვეტის შეთანხმების მოქმედების დროს გაიზარდა, თუმცა ჰუმანიტარული ორგანიზაციების წარმომადგენელთა თქმით, ჰუმანიტარული დახმარება ჯერ კიდევ ბევრად ჩამორჩება მის რეალურ საჭიროებას.
ამასთან, აღსანიშნავია, რომ რაფაჰის გამშვები პუნქტი ერთადერთი იყო, საიდანაც ღაზას სექტორს ჰუმანიტარული დახმარება მიეწოდებოდა.
გარდა ამისა „ბიბისის“ ინფორმაციით, შუამავლები განაგრძობენ მუშაობას ისრაელსა და „ჰამასს“ შორის ზავის გასახანგრძლივებლად, მიუხედავად იმისა, რომ თავდასხმები განახლდა.
აღნიშნულის შესახებ „ბიბისის“ პალესტინის ოფიციალურმა პირმა განუცხადა.
პარალელურად, „ჰამასის“ მიერ მართული ჯანდაცვის სამინისტროს წარმომადგენლის ცნობით, ქალაქ რაფაჰში ისრაელის საჰაერო თავდასხმების დროს ექვსი პალესტინელი დაიღუპა.
ისრაელსა და „ჰამასს“ შორის 22 ნოემბერს მიღწეული შეთანხმება ითვალისწინებს საბრძოლო მოქმედებების შეჩერებას და ღაზის სექტორში მყოფი, ისრაელიდან გატაცებული მძევლების, ძირითადად ქალების და ბავშვების გათავისუფლებას, ისრაელის ციხეებიდან პალესტინელი ქალების და მოზარდების გაშვებას და ღაზის სექტორისთვის ჰუმანიტარული დახმარების გაზრდას.
ისრაელსა და „ჰამასს“ შორის 4-დღიანი ზავი 24 ნოემბერს, ადგილობრივი დროით 07:00 საათიდან ამოქმედდა და ვადის ამოწურვის შემდეგ გაგრძელდა კიდევ ორი დღით, 30 ნოემბრის 07:00 საათამდე. 30 ნოემბერს დროებითი ზავი კიდევ ერთი დღით, 1 დეკემბრის 07:00 საათამდე გაგრძელდა. 30 ნოემბერს „ჰამასმა“ 8 მძევალი გაათავისუფლა, ხოლო ისრაელმა – 30 პალესტინელი პატიმარი.
ცნობისთვის, ისრაელის თქმით, მან საბრძოლო ქმედებები განაახლა, ვინაიდან „ჰამასმა“ ოპერატიული პაუზა დაარღვია.
7-დღიანი ჰუმანიტარული პაუზის პერიოდში „ჰამასმა“ გაათავისუფლა 100-ზე მეტი მძევალი და ისრაელის საპატიმროები დატოვა 240-მდე პალესტინელმა. დროებითი ზავის ამოქმედებამდე ისრაელი აცხადებდა, რომ ღაზის სექტორში 240-მდე მძევალია.
ისრაელმა „ჰამასს“ ომი გამოუცხადა მას შემდეგ, რაც 7 ოქტომბერს რადიკალურმა მოძრაობამ ისრაელის ქალაქებზე მასირებული სარაკეტო შეტევა მიიტანა, მისი შეიარაღებული ჯგუფები კი ისრაელის სამხრეთში მდებარე დასახლებებში შეიჭრნენ და ასეულობით ადამიანი დახოცეს და ათეულობით გაიტაცეს.
კონფლიქტის მხარეთა მონაცემებით, 7 ოქტომბრიდან ისრაელში დაღუპულია 1 200-ზე მეტი, ხოლო ღაზის სექტორში 14 000-ზე მეტი ადამიანი.
