“დაგროვებითი პენსიის შესახებ” კანონში შეტანილ სადავო ცვლილებებს პრეზიდენტმა ხელი არ მოაწერა

პრეზიდენტმა დაგროვებითი პენსიის კანონში ცვლილებებს ხელი არ მოაწერა. ამის შესახებ ბრიფინგზე მისმა საპარლამენტო მდივანმა, გიორგი მსხილაძემ განაცხადა. კანონი პარლამენტს უკან დაუბრუნდა.

განხორციელებული ცვლილებებით, საპენსიო ფონდის მმართველი საბჭოს წევრებს დანიშნავს პრემიერმინისტრი მაშინ, როცა ადრე მოქმედი მოდელით ფონდის საინვესტიციო საბჭოს წევრებს ირჩევდა პარლამენტი. როგორც მსხილაძემ თქვა, ამ პროცესის პარლამენტიდან გატანა და პრემიერმინისტრის ხელში “ძალაუფლების ამგვარი კონცენტრაცია”, მიუღებელი და დაუშვებელია.

“აღნიშნული ცვლილება აჩენს რისკს, რომ საბჭო დაკომპლექტდეს მმართველი ძალის ინტერესების გამტარებელი კადრებით. ეს კი შესაძლებელს გახდის, ფონდის ინვესტიციები განხორციელდეს მმართველი ძალის პოლიტიკური გადაწყვეტილებებით სხვადასხვა სამთავრობო ნაკლებად მომგებიან პროექტებში და არ მოემსახურება მოსახლეობის საუკეთესო ინტერესებს.

პენსიის რეფორმა საქართველოში ერთ-ერთ წარმატებულ რეფორმად ითვლებოდა, რის გამოც გაუმართლებელია ასეთი ცვლილებების მიღება, რომლებიც რეპუტაციულად აზიანებს ამ რეფორმას, არყევს მის მიმართ მოსახლეობის ნდობას. მყარი საპენსიო სისტემა და მისი სანდოობა პირდაპირ დაკავშირებულია მოქალაქეთა კეთილდღეობასთან”, – აღნიშნა საპარლამენტო მდივანმა.

გარდა ამისა, მსხილაძემ განმარტა, რომ ეს არ არის პარლამენტში მოტივირებული შენიშვნებით კანონის დაბრუნება ე.წ ვეტო. პრეზიდენტი იყენებს კონსტიტუციურ უფლებას აგზავნის კანონს უკან პარლამენტში, რომელსაც პარლამენტის თავმჯდომარე 5 დღის ვადაში მოაწერს ხელს.

პარლამენტმა კანონში ცვლილებები ივნისის ბოლოს მიიღო.

დამტკიცებული პროექტის მიხედვით, მმართველობითი სტრუქტურის დანიშვნის ძირითადი უფლებამოსილება პარლამენტიდან პრემიერმინისტრზე გადადის.

ცვლილებების თანახმად, სააგენტოში ორი მმართველი საბჭოს – საინვესტიციო და სამეთვალყურეო საბჭოების – ნაცვლად გაჩნდება ერთი ორგანო – მმართველობითი საბჭო. სწორედ ეს საბჭო იქნება პასუხისმგებელი დაგროვებითი საპენსიო სქემის ერთიან მართვაზე.

ამჟამინდელი ნორმით, სამეთვალყურეო საბჭო შედგება 4 წევრისგან, ხოლო საინვესტიციო საბჭო – 5 წევრისგან. სამეთვალყურეო საბჭოში შედიან: საქართველოს ფინანსთა მინისტრი; საქართველოს ეკონომიკისა და მდგრადი განვითარების მინისტრი; საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი; საინვესტიციო საბჭოს თავმჯდომარე. თავის მხრივ საინვესტიციო საბჭოს წევრებს 5 წლის ვადით თანამდებობაზე ირჩევს საქართველოს პარლამენტი სრული შემადგენლობის უმრავლესობით. სწორედ საბჭოს წევრებიდან ირჩევა შემდგომში საინვესტიციო საბჭოს თავმჯდომარეც.

ცვლილებით, ორივე საბჭო გაუქმდება და მმართველობითი საბჭო ჩამოყალიბდება. აღნიშნული ორგანო შედგება არანაკლებ 9, ხოლო არაუმეტეს 15 წევრისგან, რომელთაგან 9 წევრის შემთხვევაში საქართველოს მთავრობა 1 წევრს ნიშნავს თანამდებობრივად, ხოლო 9 წევრზე მეტის შემთხვევაში უფლებამოსილია თანამდებობრივად დანიშნოს 2 წევრი. პროფესიონალ წევრებს ნიშნავს პრემიერმინისტრი, კანდიდატურები კი მას შესარჩევმა კომისიამ უნდა წარუდგინოს. რაც შეეხება მმართველობითი საბჭოს წევრების გათავისუფლებას, ცვლილებების თანახმად, მმართველობითი საბჭოს პროფესიონალ წევრს თანამდებობიდან ათავისუფლებს საქართველოს პრემიერ-მინისტრი კანონით განსაზღვრული საფუძვლების არსებობისას.

ამასთან, შესარჩევი კომისია შედგება 7 წევრისგან: საქართველოს ფინანსთა მინისტრი, საქართველოს ეკონომიკისა და მდგრადი განვითარების მინისტრი, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, საქართველოს პარლამენტის 3 წევრი, 1 დამოუკიდებელი წევრი. შესარჩევი კომისიის დამოუკიდებელ წევრს წარადგენს ეროვნული ბანკი. დამოუკიდებელი წევრი, მათ შორის, არ შეიძლება იყოს ეროვნული ბანკის თანამშრომელი ან ეროვნული ბანკის საბჭოს წევრი.

საპენსიო ფონდის მმართველობითი საბჭო ანგარიშვალდებულია საქართველოს პრემიერმინისტრის და ეროვნული ბანკის წინაშე.

მმართველობითი საბჭო სამ კომიტეტს შექმნის: საინვესტიციო კომიტეტი; რისკის კომიტეტი; აუდიტის კომიტეტი.

იცვლება საინვესტიციო პორტფელები ინვესტირების არეალები და ლიმიტები. მაგალითად, ამჟამად ნაკლებრისკიანი პორტფელიდან ინვესტიციების გაკეთება შეიძლება კორპორაციული სასესხო ფასიანი ქაღალდებსა და წილობრივ ფასიან ქაღალდებში. ცვლილებით კი ჩნდება “სხვა აქტივებიც”.
პარლამენტის თავმჯდომარემ დღეს გამართულ ბიუროს სხდომაზე თქვა, რომ “დაგროვებითი პენსიის” შესახებ კანონში ცვლილების თაობაზე პაკეტს დღეს ხელს ის მოაწერს. სადავო ცვლილებებს ხელი პრეზიდენტმა არ მოაწერა.

მსხილაძემ „დაგროვებითი პენსიის შესახებ“ კანონში ცვლილებების პროექტზე განმარტა მიზეზები

კანონი ძალაში გამოქვეყნებისთანავე შევა.

“საგაზაფხულო სესიის ფარგლებში, ჩვენ მივიღეთ პაკეტი „დაგროვებითი პენსიის“ შესახებ კანონში ცვლილების თაობაზე. ამასთან დაკავშირებით, ქალბატონი სალომე ზურაბიშვილისგან მოგვივიდა წერილი, რომ ის არც ხელს აწერს კანონს და არც მოტივირებული შენიშვნებით აბრუნებს მას, ანუ ვეტო არ არის. იმის გათვალისწინებით, რაც ჩვენ ვიხილეთ წინა ვეტოებთან დაკავშირებით, რომ არგუმენტად „იმიტომ“ იყო მოყვანილი, როგორც ჩანს, ამჯერად „იმიტომ“ არგუმენტით არ სურდა ქალბატონ სალომეს საპარლამენტო მდივანს პარლამენტში მოსვლა და ამიტომ ხელი არ მოაწერა მას. აქედან გამომდინარე, საქართველოს კონსტიტუციის თანახმად, მე მოვაწერ ამ კანონს დღეს ხელს”, – თქვა პაპუაშვილმა.

მოგვიანებით საკითხზე ბრიფინგი გამართა პრეზიდენტის საპარლამენტო მდივანმა, გიორგი მსხილაძემ. მან განმარტა, რომ აღნიშნული არ ნიშნავს პარლამენტში შენიშვნებით კანონის დაბრუნებას და რომ პრეზიდენტმა გამოიყენა კონსტიტუციური უფლება, უკან გაეგზავნა კანონი პარლამენტში.

პარლამენტმა “დაგროვებითი პენსიის” შესახებ კანონში ცვლილებები მესამე მოსმენით 27 ივნისს მიიღო.
საპენსიო სააგენტოს 30 ივნისის სტატისტიკური მონაცემებით, საპენსიო სქემაში გაწევრიანებულ მონაწილეთა რაოდენობა მილიონ 529 ათასი ადამიანია.

ამავე მონაცემების მიხედვით, საპენსიო აქტივების ღირებულება შეადგენს 5.2 მლრდ ლარს, მათ შორის, დაგენერირებულმა ამონაგებმა 1.15 მლრდ ლარს გადააჭარბა.

ამასთან, საპენსიო სააგენტოს ცნობით, დაგროვებითი პენსიით ისარგებლა სხვადასხვა კატეგორიის 11,114-მა პირმა, მათზე პენსიის სახით გაიცა 38.9 მლნ ლარი.