რუსეთმა საქართველოს ოკუპირებული ტერიტორიებიდან უკრაინაში 2000-მდე სამხედრო მოსამსახურე გაგზავნა
რუსეთმა საქართველოს ოკუპირებული ტერიტორიებიდან უკრაინაში 2 000-მდე სამხედრო მოსამსახურე გაგზავნა. ინფორმაციას უკრაინის შეიარაღებული ძალების გენერალური შტაბი ავრცელებს.
“რუსეთის ფედერაციის შეიარაღებული ძალების რეკრუტირების მიზნით, საქართველოს ოკუპირებული ტერიტორიებიდან ქ. უკრაინის ტერიტორიაზე მე-4 და მე-7 სამხედრო ბაზები გადაიყვანეს.
მე-4 სამხედრო ბაზიდან უკრაინაში გაგზავნეს სამი ჯავშანტრანსპორტიორი, ასევე 1200-მდე რუსი და ოსი სამხედრო მოსამსახურე, ხოლო მე-7 სამხედრო ბაზის ქვედანაყოფებიდან ორი ჯავშანტრანსპორტიორი და დაახლოებით 800 ადამიანი“, – ნათქვამია განცხადებაში.
ამასთან უკრაინის შეიარაღებული ძალების გენერალური შტაბი არ გამორიცხავს, რომ რუსეთის გადაწყვეტილება კიევის და ჩერნიგოვის ოლქებიდან სამხედრო ქვედანაყოფების გაყვანის შესახებ, მიზნად ისახავს უკრაინის არმიის სარდლობის შეცდომაში შეყვანას.
უკრაინის გენერალური შტაბის მიერ წუხელ გამოქვეყნებული ოფიციალური ინფორმაციით, გრძელდება რუსეთის შეიარაღებული ძალების ქვედანაყოფების გაყვანა კიევის და ჩერნიგოვის ოლქების ტერიტორიიდან, თუმცა არის ნიშნები, რომ მოწინააღმდეგე ახორციელებს ქვედანაყოფების გადაჯგუფებას, ძირითადი ძალისხმევის აღმოსავლეთის მიმართულებით კონცენტრირებისთვის.
უკრაინის გენერალური შტაბის განცხადებით, ე.წ. “ჯარების გაყვანა” სავარაუდოდ, ცალკეული ქვედანაყოფების როტაციაა, რომლის მიზანია უკრაინის შეიარაღებული ძალების სარდლობის შეცდომაში შეყვანა და ცრუ წარმოდგენის შექმნა იმის შესახებ, რომ ოკუპანტებმა უარი თქვეს ქალაქ კიევის ალყაში მოქცევის ჩანაფიქრზე.
კიევის და ჩერნიგოვის მიმართულებებით “სამხედრო აქტივობის კარდინალურად შემცირების“ გადაწყვეტილება 29 მარტს, სტამბოლში, უკრაინის დელეგაციასთან შეხვედრის შემდეგ გამოაცხადა რუსეთის დელეგაციის წევრმა, თავდაცვის მინისტრის მოადგილემ, ალექსანდრ ფომინმა.
„იმის გამო, რომ უკრაინის ნეიტრალიტეტისა და არაბირთვული სტატუსის და უკრაინისთვის უსაფრთხოების გარანტიების შესახებ ხელშეკრულების მოსამზადებლად მოლაპარაკებები გადადის პრაქტიკულ ჭრილში, დღეს განხილული პრინციპების გათვალისწინებით, თავდაცვის სამინისტრომ ურთიერთნდობის ასამაღლებლად და შემდგომი მოლაპარაკებისთვის პირობების შესაქმნელად მიიღო გადაწყვეტილება, კარდინალურად შეამციროს სამხედრო აქტივობა კიევის და ჩერნიგოვის მიმართულებებით“, – განაცხადა ფომინმა.
