პრეზიდენტად დასმულმა ყაველაშვილმა შინაგან საქმეთა სამინისტროს სანქცირებულს მაღალჩინოსნებს ღირსების ორდენები გადასცა
კოლეგიის მიერ “ქართული ოცნების” ხმათა უმრავლესობით პრეზიდენტად არჩეულმა მიხეილ ყაველაშვილმა, “კანონიერებისა და მართლწესრიგის განმტკიცების საქმეში შეტანილი განსაკუთრებული წვლილისთვის” პოლიციის მაღალჩინოსნები დააჯილდოვა. მათ უმრავლესობას დასავლეთში სანქციები აქვს დაწესებული.
ორბელიანის სასახლეში 30 იანვარს გამართულ ღონისძიებას ესწრებოდნენ “ქართული ოცნების” მთავრობის პრემიერ-მინისტრი ირაკლი კობახიძე და პარლამენტის თავმჯდომარე შალვა პაპუაშვილი, რომელთა წარდგინებითაც ჯილდოები გადაეცათ „ქართული ოცნების“ მთავრობის შინაგან საქმეთა სამინისტროს მაღალჩინოსნებს:
შინაგან საქმეთა მინისტრს, ვახტანგ გომელაურს;
მინისტრის პირველ მოადგილეს, პოლიციის გენერალ-მაიორ შალვა ბედოიძეს;
მოადგილეებს პოლიციის გენერალ-მაიორი- იოსებ ჭელიძეს;
პოლიციის პოლკოვნიკი-ალექსანდრე დარახველიძეს;
პოლიციის პოლკოვნიკი-გიორგი ბუთხუზს.
ღირსების ორდენებით ასევე დაჯილდოვდნენ:
ოცნების შინაგან საქმეთა სამინისტროს განსაკუთრებულ დავალებათა დეპარტამენტის დირექტორი, პოლიციის პოლკოვნიკი ზვიად ხარაზიშვილი – ხარება.
ოცნების შინაგან საქმეთა სამინისტროს ქ. თბილისის პოლიციის დეპარტამენტის დირექტორი, პოლიციის პოლკოვნიკი სულხან თამაზაშვილი;
ოცნების შინაგან საქმეთა სამინისტროს საპატრულო პოლიციის დეპარტამენტის დირექტორი, პოლიციის პოლკოვნიკი ვაჟა სირაძეს;
ოცნების შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორი, პოლიციის პოლკოვნიკი თეიმურაზ კუპატაძე;
ოცნების შინაგან საქმეთა სამინისტროს განსაკუთრებულ დავალებათა დეპარტამენტის დირექტორის მოადგილე, პოლიციის პოლკოვნიკი მილერი ლაგაზაური
ოცნების შინაგან საქმეთა სამინისტროს განსაკუთრებულ დავალებათა დეპარტამენტის დირექტორის მოადგილე, პოლიციის პოლკოვნიკი მირზა კეზევაძე.
ღირსების ორდენით დაჯილდოებული მაღალჩინოსნების უმრავლესობას ევროკავშირის ქვეყნებისა და შეერთებული შტატების მიერ სანქციები აქვს დაწესებული, თბილისში მიმდინარე პროდასავლური დემონსტრაციების სასტიკი დარბევის გამო.
აშშ-მა, რომელიც წლების განმავლობაში საქართველოს მთავარი სტრატეგიული პარტნიორი იყო, სანქციები დაუწესა შინაგან საქმეთა მინისტრ ვახტანგ გომელაურსა და განსაკუთრებულ დავალებათა დეპარტამენტის დირექტორის, სანქცირებული ზვიად ხარაზიშვილის („ხარებას„) მოადგილეს, მირზა კეზევაძეს. ორივე მათგანი გლობალურ “მაგნიტსკის სიაში” შეიყვანეს.
მანამდე შინაგან საქმეთა მინისტრ ვახტანგ გომელაურსა და უწყების კიდევ ოთხ მაღალჩინოსანს დიდი ბრიტანეთისა და ჩრდილოეთ ირლანდიის გაერთიანებულმა სამეფომ დაუწესა სანქციები.
ბრიტანეთის მთავრობის განმარტებით, სანქციებს უწესებენ, რადგან ისინი პასუხისმგებელნი არიან ჟურნალისტებსა და მშვიდობიან დემონსტრანტებზე ძალადობრივ თავდასხმებზე.
სანქცირებული არიან:
ვახტანგ გომელაური – შინაგან საქმეთა მინისტრი;
ალექსანდრე დარახველიძე – შსს-ის მინისტრის პირველი მოადგილე;
სულხან თამაზაშვილი – თბილისის პოლიციის დეპარტამენტის დირექტორი;
ზვიად ხარაზიშვილი („ხარება“) – განსაკუთრებულ დავალებათა დეპარტამენტის უფროსი;
მილერი ლაგაზაური – განსაკუთრებულ დავალებათა დეპარტამენტის უფროსის, ზვიად ხარაზიშვილის მოადგილე.
„ქართული ოცნების“ ხელისუფლების მიმართ საერთაშორისო სანქციების დაწესება დაიწყო 2023 წელს და 2024 წელში გააქტიურდა.
„ძლიერი ქართული პოლიცია ძლიერი და სუვერენული სახელმწიფოს სიმბოლოა, გარანტია იმისა, რომ ქვეყანაში განუხრელად იქნება დაცული წესრიგი. გეცვას პოლიციელის ფორმა და ატარებდე მუნდირს, მხოლოდ იმ ღირსეულ ადამიანთა ხვედრია, ვინც მზადაა, დაუფიქრებლად გაწიროს საკუთარი სიცოცხლე სხვათა გადასარჩენად. ფასდაუდებელია თითოეული პოლიციელის მიერ ჩვენი ქვეყნის წინაშე გაღებული ღვაწლი. თქვენი დაუღალავი შრომა, სიფხიზლე და თავდადება უზრუნველყოფს ჩვენი შვილების კეთილ მომავალს. მშვიდობა, წესრიგის დაცვა და სტაბილურობა ფუნდამენტური მნიშვნელობისაა თითოეული სახელმწიფოსთვის. სწორედ ამაზე დგას ქვეყნის განვითარება, ეკონომიკური წინსვლა, სოციალური კეთილდღეობა, სრულფასოვანი განათლება, საჯარო სერვისების გამართული მუშაობა და ხელმისაწვდომობა. ამიტომაა ჩვენი ქვეყნის არაკეთილმოსურნეების მიერ მიზანში ამოღებული წესრიგისა და სტაბილურობის, შესაბამისად, სახელმწიფოებრიობის შერყევა. დარწმუნებული ვარ, მსგავსი მცდელობები მომავალშიც ისეთივე წარუმატებელი იქნება, როგორც აქამდე. ვერავინ შეძლებს, შეარყიოს ქართველი ხალხის ნება. გავაგრძელოთ ძლიერი, ეროვნულ ინტერესებზე დაფუძნებული სახელმწიფოს მშენებლობა, სადაც დაცული იქნება ჩვენი ისტორია, კულტურა, სარწმუნოება, ოჯახური ღირებულებები და ეროვნული თვითმყოფადობა. თქვენ ხართ ადამიანები, ვინც, სირთულეების მიუხედავად, სრულფასოვნად ართმევთ თავს ქართული სახელმწიფოსა და ქართველი ხალხის მიერ დაკისრებულ მოვალეობას, დაიცვათ წესრიგი ქვეყანაში და ჩვენი თითოეული მოქალაქის უსაფრთხოება. თქვენ ხართ ადამიანები, ვინც ყოველდღიურად იცავთ სამშობლოს სანუკვარ იდეას, რომელსაც საქართველო ჰქვია. სწორედ ამიტომ, მსურს, კანონიერებისა და მართლწესრიგის განმტკიცებაში შეტანილი განსაკუთრებული წვლილისათვის ღირსების ორდენით დაგაჯილდოოთ. გისურვებთ ერთიან, ძლიერ და წარმატებულ საქართველოში ცხოვრებას“, – განაცხადა პრეზიდენტმა.
შინაგან საქმეთა სამინისტროს ხელმძღვანელ პირებს ჯილდოს მიღება მიულოცეს საქართველოს პრემიერ-მინისტრმა, ირაკლი კობახიძემ და პარლამენტის თავმჯდომარემ, შალვა პაპუაშვილმა.
დაჯილდოების ცერემონიის დასასრულს საქართველოს ვიცე-პრემიერმა, შინაგან საქმეთა მინისტრმა ვახტანგ გომელაურმა მადლობა გადაუხადა საქართველოს პრეზიდენტს, პრემიერ-მინისტრსა და პარლამენტის თავმჯდომარეს დაფასებისთვის და თანამშრომლებს სახელმწიფო ჯილდოს – ღირსების ორდენის მიღება მიულოცა.
ირაკლი კობახიძემ 2024 წლის დეკემბერში განაცხადა, რომ პოლიციის სანქცირებულ მაღალჩინოსნებს დააჯილდოებდნენ, თუმცა ამის განხორციელება ვერ მოხერხდა სალომე ზურაბიშვილის პრეზიდენტობის პირობებში.
შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს ყოფილმა უფროსმა, ირაკლი შაიშმელაშვილმა, ფორმულას ეთერში თქვა, რომ საპატრულო პოლიციის უფროსი ვაჟა სირაძე და შინაგან საქმეთა სამინისტროს კრიმინალური პოლიციის დეპარტამენტის დირექტორი თეიმურაზ კუპატაძე “შეძლება რაღაც საკითხებს არასწორად თვლიან, მაგრამ ამ სისტემაში უკვე გარეულები არიან”.
“ორივე განათლებული პიროვნებაა, სისტემა დღეს ასე არის მოწყობილი, ამ ერთი კაცის ირგვლივ გაერთიანდნენ და მიჰყვებიან სამარეში ბოლომდე. შეიძლება ვაჟაც და თემურიც რაღაც საკითხები თვლიდნენ, რომ არასწორია, მაგრამ უკვე ისე არიან ამ სისტემაში გარეულები, რომ ასე ვთქვათ, ჩაყოლილები არიან, მიჰყვებიან ბოლომდე გომელაურსაც და ივანიშვილსაც, გომელაური ივანიშვილს და ამით ინარჩუნებენ”, – თქვა შაიშმელაშვილმა.
საქართველოს პრეზიდენტმა მიხეილ ყაველაშვილმა, ვიცე-პრემიერი, შინაგან საქმეთა მინისტრი, გენერალ-პოლკოვნიკი ვახტანგ გომელაური და პოლიციის სხვა ხელმძღვანელი პირები კანონიერებისა და მართლწესრიგის განმტკიცებაში შეტანილი განსაკუთრებული წვლილისათვის ღირსების ორდენით დააჯილდოვა.
დაჯილდოების ცერემონიას, რომელიც ათონელის საპრეზიდენტო სასახლეში გაიმართა, პრემიერ-მინისტრი და პარლამენტის თავმჯდომარე დაესწრნენ.
ვახტანგ გომელაურმა საქართველოს პრეზიდენტს, პრემიერ-მინისტრს, ასევე, პარლამენტის თავმჯდომარეს მიღებული ჯილდოსთვის მადლობა გადაუხადა.
მინისტრმა, ასევე, მადლობა გადაუხადა პოლიციელებსა და შინაგან საქმეთა სამინისტროს ყველა თანამშრომელს.
“ბატონო პრეზიდენტო, ბატონო პრემიერ-მინისტრო, ბატონო პარლამენტის თავმჯდომარევ, მინდა, მადლობა გადაგიხადოთ ამ დაფასებისთვის, სახელმწიფო ჯილდოს – ღირსების ორდენის გადმოცემისთვის. მერწმუნეთ, ეს ყველა ჩვენგანისთვის ძალიან დიდი პატივია. არ შემიძლია, ხაზი არ გავუსვა და არ აღვნიშნო თქვენი ყოველდღიური მხარდაჭერა, გვერდში დგომა, რომელსაც თითოეული პოლიციელი, როგორც რიგითები, ასევე, ჩვენ – ხელმძღვანელი პირები ვხედავთ და ძალიან მნიშვნელოვანია ჩვენთვის.
მინდა, ვისარგებლო შემთხვევით და ყველა პოლიციელს, შინაგან საქმეთა სამინისტროს ყველა თანამშრომელს მადლობა გადავუხადო იმ შრომისთვის, რასაც ეს ადამიანები აკეთებენ 24 საათის განმავლობაში ჩვენი მოქალაქეებისა და ჩვენი სამშობლოს დასაცავად. ასევე, მინდა, მადლობა გადავუხადო მათ ოჯახებს გვერდში დგომისთვის.
და ბოლოს, მინდა მოგცეთ პირობა, რომ გადმოცემულ ღირსების ორდენებს, თითოეული ჩვენგანი მთელი ცხოვრება ღირსეულად ვატარებთ. დიდი მადლობა!”, – განაცხადა ვახტანგ გომელაურმა.
