დიდმა ბრიტანეთმა ლევან მურუსიძეს და მიხეილ ჩინჩალაძეს ფინანსური სანქციები დაუწესა

დიდმა ბრიტანეთმა მოსამარტლეთა კლანის სათავეში მდგომ მოსამართლეებს, მიხეილ ჩინჩალაძესა და ლევან მურუსიძეს სანქციები დაუწესა. სასანქციო სიაში სულ 12 პირი და 1 კომპანია მოხვდა – ჩინჩალაძე და მურუსიძე მათ შორის არიან – ამის შესახებ განცხადებას დიდი ბრიტანეთის მთავრობა ავრცელებს. სანქცირებულ პირთა სია საგარეო საქმეთა სამინისტრომ განაახლა. საუბარია ამ პირებისა და მათ საკუთრებაში არსებული კომპანიების აქტივების დაყადაღებაზე. ყადაღა შეეხება ანგარიშებს, სხვა საშუალებებსა და ეკონომიკურ რესურსებს.

დოკუმენტის მიხედვით, სანქცირებულ მოსამართლეებს გაეყინებათ ბრიტანეთის ტერიტორიაზე, მათ კუთვნილებაში არსებული ყველა სახის ქონება, მათ შორის, ფინანსური ანგარიშები.
ამასთან, აღნიშნულ პირებთან ფინანსური საქმიანობა იკრძალება, ხოლო სანქციების დარღვევა ან მათთვის თავის არიდება ჩაითვლება სისხლის სამართლის დანაშაულად.
“i. შეამოწმეთ, გაქვთ თუ არა ანგარიშები, ფინანსები ან ეკონომიკური რესურსები აღნიშნული პირების ან მათ მიერ კონტროლირებადი სუბიექტების მფლობელობაში

ii. გაიყინოს ასეთი ანგარიშები, სხვა სახსრები და ეკონომიკური რესურსები

iii. თავი შეიკავეთ იმ სახსრებითა და ფინანსური რესურსებით ვაჭრობისგან, რომელიც პირდაპირ ან ირიბად სარგებელს მოუტანს აღნიშნულ პირებს, თუ ამაზე ნებართვა არ გასცა ფინანსური სანქციების განხორციელების ოფისმა [OFSI];

iv. ეჭვის შემთხვევაში, ნებისმიერი ინფორმაცია მიწოდებული უნდა იქნას ფინანსური სანქციების განხორციელების ოფისისთვის [OFSI]. თუ ინფორმაცია ეხება სახსრებსა ან ეკონომიკურ რესურსებს, მისი რაოდენობა და ღირებულება ასევე უნდა იყოს მოხსენებული”, – წერია დოკუემტნში.

როგორც დოკუმენტშია აღნიშნული, “არსებობს საფუძვლიანი ეჭვი, რომ მიხეილ ჩინჩალაძე ჩართულია ან იყო ჩართული სერიოზულ კორუფციაში”. კერძოდ, დოკუმენტში წერია, რომ მან “მიიღო ფინანსური სარგებელი, როგორც ჯილდო მისი საჯარო ფუნქციების არასათანადოდ შესრულებისთვის, რათა უზრუნველყოფილი ყოფილიყო სასამართლოს დანიშვნები და გადაწყვეტილებები “ქართული ოცნების” სასარგებლოდ”. სანაცვლოდ ის დაინიშნა თბილისის სააპელაციო სასამართლოს თავმჯდომარედ, რათა ეს პრაქტიკა გაეგრძელებინა.

ამავე დოკუმენტის მიხედვით, “არსებობს საფუძვლიანი ეჭვი”, რომ “სერიოზულ კორუფციაში” თბილისის სააპელაციო სასამართლოს კიდევ ერთი მოსამართლე, ლევან მურუსიძეც იყო/არის ჩართული. დოკუმენტის თანახმად, მურუსიძე იყენებდა თავის ძალაუფლებას, როგორც იუსტიციის უმაღლესი საბჭოს წევრი, რათა უზრუნველყოფილი ყოფილიყო სასამართლოს დანიშვნები და გადაწყვეტილებები “ქართული ოცნების” სასარგებლოდ”. დიდი ბრიტანეთის გლობალური ანტიკორუფციული სანქციების აქტი ფინანსური და ეკონომიკური რესურსების გაყინვას ითვალისწინებს.