ძალადობისა და რეპრესიების მეექვსე დღე-პრეზიდენტი
რუსთაველის გამზირზე მომიტინგეთა დარბევასა და დაკავებებს საქართველოს პრეზიდენტი, სალომე ზურაბიშვილი X-ზე ეხმაურება.
ძალადობისა და რეპრესიების მეექვსე დღე, – ამის შესახებ საქართველოს პრეზიდენტი, სალომე ზურაბიშვილი სოციალურ ქსელში წერს.
„მშვიდობიანი პროევროპელი დემონსტრანტები „ქართული ოცნების“ „ომონის“ ძალებმა სასტიკად დაარბიეს. ცრემლსადენი გაზი და წყლის ჭავლი არაპროპორციულად გამოიყენეს, მასობრივი დაკავებები და არასათანადო მოპყრობა.
განათლების სამინისტრო ინფორმატორებისთვის ცხელ ხაზს ხსნის, სასწავლო პროცესის დამრღვევთა შესახებ ინფორმაციის შესაგროვებლად, საბჭოთა კავშირი დაბრუნდა?“, – წერს სალომე ზურაბიშვილი
რუსთაველის გამზირზე მომიტინგეების დაკავება დაიწყო. სპეცრაზმმა პარლამენტის წინა ტერიტორია, ასევე, ჩიტაძისა და ჭიჭინაძის ქუჩები სრულად დაიკავა.
ამ დროისთვის, მომიტინგეებმა სასტუმრო მერიოტის მიმდებარე ტერიტორიაზე გადაინაცვლეს. რამდენიმე სპეცრაზმელი კი მომიტინგეებს დაედევნა და დააკავა.
მანამდე იყო გამაფრთხილებელი სიგნალი და გაუშვეს წყლის ჭავლი.
მოქალაქეები, რომლებიც აპროტესტებენ საქართველოს მთავრობის გადაწყვეტილებას, 2028 წლის ბოლომდე დღის წესრიგში არ დააყენოს ევროკავშირთან მოლაპარაკების გახსნის საკითხი, რუსთაველის გამზირზე დღეს 19:00 საათიდან შეიკრიბნენ. დაახლოებით 22:30 საათიდან სპეცრაზმმა პარლამენტის წინ მომიტინგეების წინააღმდეგ წყლის ჭავლის გამოყენება დაიწყო. 23:30 საათიდან კი სპეცრაზმმა სრულად გაათავისუფლა რუსთაველის გამზირზე უშუალოდ, პარლამენტის შენობის პერიმეტრი და მიმდებარე ქუჩები, დააკავეს აქციის რამდენიმე მონაწილეც. საპოლიციო ძალებმა დაშლის ღონისძიების მიმდინარეობისას გამოიყენა წყლის ჭავლი და სხვა სპეციალური საშუალებები.
