რუსეთმა უკრაინაზე მორიგი იერიში მიიტანა უპილოტო საფრენი აპარატებით

რუსეთმა უკრაინაზე მორიგი იერიში მიიტანა უპილოტო საფრენი აპარატებით. უკრაინის საჰაერო ძალების სარდლის, მიკოლა ოლეშჩუკის მიერ დილით გამოქვეყნებული მონაცემებით, გასული ღამის განმავლობაში, საოკუპაციო ძალებმა უკრაინას შეუტიეს „შაჰედის“ ტიპის 20 დრონით.

გენერალ-ლეიტენანტ ოლეშჩუკის თანახმად, უკრაინელმა სამხედროებმა ხარკოვის, პოლტავის, ვინიცის, ოდესის და ნიკოლაევის ოლქების ფარგლებში 20-ვე დრონი ჩამოაგდეს.
“17 მაისის ღამეს რუსებმა უკრაინას შეუტიეს “შაჰიდის” ტიპის 20 დრონით. საჰაერო ბრძოლის შედეგად, მტრის 20-ვე “შაჰიდი” ჩამოვაგდეთ ხარკოვის, პოლტავის, ვინიცის, ოდესისა და მიკოლაევის რეგიონებში,” – ნათქვამია განცხადებაში.
უწყება ასევე აღნიშნავს, რომ ოკუპანტებმა უპილოტო საფრენი აპარატები რუსეთის ფედერაციის ტერიტორიიდან, კერძოდ, პრიმორსკო-ახტარსკიდან და კურსკიდან გაუშვეს.

საოლქო-სამხედრო ადმინისტრაციებს შედეგებზე ჯერჯერობით არაფერი უთქვამთ.
რუსეთის მონაცემების მიხედვით, ღამის განმავლობაში 102 „უკრაინულ დრონს” ებრძოდნენ
17 მაისს რუსეთმა დრონებით მასირებულ შეტევაში უკრაინაც დაადანაშაულა. რუსეთის თავდაცვის სამინისტრომ დილით განაცხადა, რომ ღამის განმავლობაში მოიგერიეს 100-ზე მეტი უპილოტო საფრენი აპარატი.
ბოლო 24 საათის განმავლობაში რუსულმა მხარემ სუმის რეგიონი 32-ჯერ დაბომბა. ამის შესახებ ინფორმაციას ადგილობრივი ხელისუფლება ავრცელებს.

თავდასხმა რაკეტებითა და უპილოტო საფრენი აპარატებით განხორციელდა ხარკოვზეც.

ადგილობრივი ხელისუფლების ინფორმაციით, რუსმა სამხედროებმა ხარკოვს, სულ მცირე, ხუთი უპილოტო საფრენი აპარატით შეუტიეს. შედეგად, ხანძარი გაჩნდა ერთ-ერთ რაიონში. შემთხვევას მსხვერპლი არ მოჰყოლია.

გამთენიისას დრონებით შეტევა იყო რუსეთის კრასნოდარის მხარის ქალაქების, ნოვოროსიისკის და ტუაფსეს პორტსა და ნავთობგადამამუშავებელ ქარხანაზე. ამის შესახებ რუსული ტელეგრამ-არხები იუწყებოდნენ. დრონებით თავდასხმა დაადასტურა ადგილობრივმა ხელისუფლებამ. უპილოტო საფრენი აპარატებით მასირებული შეტევა იყო უკრაინის ქალაქ სევასტოპოლზეც, რომელიც 2014 წლიდან რუსეთის მიერაა ანექსირებული.