მნიშვნელოვანიმსოფლიოსიახლეები

აშშ-ის სატელიტებს დიდი ძლიერი რუსეთის ეშინიათ-რუსეთი NATO-სთან ომს არ აპირებს-პუტინი

პუტინის თქმით, ევროპა თავის მოსახლეობას რუსეთით აშინებს, რათა მეტი ფული გამოსძალოს

დასავლეთის განცხადებები იმის შესახებ, რომ რუსეთი უკრაინის შემდეგ ევროპაზე თავდასხმას გეგმავს სისულელე და ბოდვაა, რომელიც მიზნად ისახავს საკუთარი მოსახლეობის დაშინებას, – ამის შესახებ რუსეთის პრეზიდენტმა, ვლადიმერ პუტინმა განაცხადა.

მისი მტკიცებით, აშშ-ის სატელიტებს დიდი, ძლიერი რუსეთის ეშინიათ, თუმცა რუსეთს ამ სახელმწიფოების მიმართ აგრესიული განზრახვა არ აქვს.

”ეს სრული სისულელეა – სხვა ქვეყნებზე თავდასხმის შესაძლებლობა უბრალოდ სისულელეა. ეს საკუთარი მოსახლეობის მოტყუების და ხალხისგან დამატებითი ხარჯების ამოღების კიდევ ერთი გზაა“, – აღნიშნა პუტინმა.

მისი მტკიცებით, რუსეთი NATO-სთან ომს არ აპირებს და ეს უბრალოდ სისულელეა. პუტინის თქმით, აშშ-ის სამხედრო ხარჯებმა 2022 წელს 811 მილიარდი დოლარი შეადგინა, ხოლო რუსეთის სამხედრო ხარჯები – 72 მილიარდი აშშ დოლარი იყო.

”ამ თანაფარდობის გათვალისწინებით, ვაპირებთ თუ არა NATO-სთან ომს? ეს უბრალოდ სისულელეა. ჩვენ არავის შევხებივართ, ისინი თავად გვიახლოვდებოდნენ. ისინი გვიახლოვდებიან და მოგვიახლოვდნენ. ჩვენ რას ვაკეთებთ? ჩვენ უბრალოდ ვიცავთ საკუთარ ხალხს ჩვენს ისტორიულ ტერიტორიებზე“, – განაცხადა პუტინმა.

ბოლო პერიოდში არაერთმა პოლიტიკოსმა და სამხედრო მაღალჩინოსანმა გამოთქვა მოსაზრება, რომ თუ რუსეთი უკრაინაში გაიმარჯვებს, აუცილებლად დაესხმება თავს NATO-ს წევრ რომელიმე ქვეყანასაც.

პუტინის თქმით, ევროპა თავის მოსახლეობას რუსეთით აშინებს, რათა მეტი ფული გამოსძალოს. რუსეთის პრეზიდენტმა ამ კონტექსტში ახსენა პოლონეთი, ჩეხეთი და ბალტიის ქვეყნები. პუტინმა სამხედრო მფრინავებს კიდევ ერთხელ უამბო კრემლის ვერსია, რომ უკრაინის წინააღმდეგ არაფერს გეგმავდნენ, მაგრამ აიძულეს, რადგან რუსეთის ინტერესები არ გაითვალისწინეს.

რუსეთის არმია უკრაინის ტერიტორიაზე 2022 წლის 24 თებერვალს შეიჭრა.
პრეზიდენტმა პუტინმა “სპეციალური სამხედრო ოპერაციის” მიზნად გამოაცხადა უკრაინის “დემილიტარიზაცია და დენაციფიკაცია”.
უკრაინაში რუსული არმიის ფართომასშტაბიან შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების “დამოუკიდებლობის” აღიარება. მანამდე, რუსეთმა მოითხოვა, რომ უკრაინა არ გახდეს ნატოს წევრი.
2022 წლის 30 სექტემბერს, რუსეთმა თავის ტერიტორიებად გამოაცხადა უკრაინის ხერსონის, ზაპოროჟიეს, დონეცკის და ლუგანსკის ოლქები, თუმცა სრულად ვერცერთ მათგანს ვერ აკონტროლებს.
უკრაინას მიზნად გამოცხადებული აქვს ტერიტორიული მთლიანობის სრულად აღდგენა, რუსეთის მიერ 2014 წლიდან ანექსირებული ყირიმის ჩათვლით.

მსგავსი პოსტები

Back to top button